Skólavarðan - 01.10.2005, Blaðsíða 6

6
GESTASKRIF
SKÓLAVARÐAN 7.TBL. 5. ÁRG. 2005
Sköpun, tjáning og samvinna er kjarni
leiklistarinnar og ómetanleg þau fræ sem
fjölmargir kennarar og leiðbeinendur
hafa sáð með því að gera sér grein fyrir því
hve leiklistin er stór hluti af lífinu. En það
þarf ekki útreikninga til þess að sjá þetta
því fullorðnir leika sér í leiklist ekki síður
en börnin; um allt land, í hverju plássi, í
fyrirtækjum og á heimilum eru sett upp
leikrit eða leikþættir eða söngskemmtanir
með leiknum atriðum, í einni eða annarri
mynd.
Áhugaleikfélögin eiga sennilega
stærsta partinn af leiklistariðkun fullorð-
inna. Samkvæmt nýjustu tölum frá
landssamtökum áhugafélaga, Bandalagi
íslenskra leikfélaga, um leikárið 2004
– 2005 þá tóku 1309 manns þátt í samtals
69 uppsetningum. Þessi 69 verk voru sýnd
samtals 485 sinnum. Áhorfendur voru
26.383. Samkvæmt skýrslum til styrk-
umsókna frá þeim 38 leikfélögum sem
settu þessar sýningar upp var fjöldi félaga
í þeim samtals 2.192. Inni í þessum tölum
eru ekki leikfélög framhaldsskólanna með
allan þann fjölda sem tekur þátt í eða sækir
sýningar þeirra. Þetta eru skemmtilega
háar tölur sem sýna að mjög margir stunda
leiklist í frístundum og gríðarmargir sækja
leiksýningar áhugafélaga fyrir utan allan
þann fjölda fólks sem fer að sjá leiksýningar
atvinnuhópa og stóru leikhúsanna. Þó eru
tölurnar ekki tæmandi þar sem ekki sækja
allir, sem setja upp sýningar, um styrki til
BÍL. Síðastliðin ár hef ég farið víða um
land til þess að skrifa gagnrýni um leiklist
fyrir Morgunblaðið og fengið staðfestan
þann grun minn að það pláss þekkist varla
á landinu þar sem ekki er verið að æfa
leikrit. Eftir vinnu á kvöldin og um helgar.
Menntamálayfirvöld styrkja áhugaleik-
starf í landinu. En eins og á mörgum
öðrum póstum hafa styrkir ríkisins til
menningar og mennta skroppið saman.
Til samanburðar við tölurnar hér að ofan,
frá síðasta leikári, birti ég hér líka tölur
frá leikárinu þar á undan en ég trúi því
að færri sýningar og færri áhorfendur
eigi rót sína að rekja til niðurskurðar
ríkisins. Leikárið 2003 -2004 tók 1681 þátt
í107 uppsetningum sem voru sýndar 533
sinnum af 44 leikfélögum en áhorfendur
voru 43.614. Árið þar á undan voru
tölurnar hærri og þær voru enn hærri frá
árinu þar á undan.
Menntamálayfirvöld vilja veg barna
sem bestan og breiðastan, hvort sem er í
borg eða bæ, og þau vilja líka að fólkið
í landinu geti stundað áhugamál sín um
landið allt; jafnvel með því að skreyta
byggðarlögin af menningarlegri elju. En
yfirvöld vilja líka reisa sér minnisvarða
úr steinsteypu um landið allt, til dæmis
í formi menningarhúsa. Og á meðan er
hætt við að stuðningurinn við aukna
leiklistarkennslu og tómstundir verði
útundan. Það er hætt við að leiklistarfræin
sem leiðbeinendur barnanna okkar hafa
sáð verði ekki þeir safaríku stönglar sem
þeir þurfa að vera til þess að geta seinna
borið fögur blóm.
Hrund Ólafsdóttir
Höfundur er bókmenntafræðingur,
framhaldsskólakennari, leikskáld,
áhugaleikari og leikstjóri.
Þann 18. nóvember nk. verða stofnuð
á Selfossi Samtök áhugafólks um
skólaþróun. Samtökunum er öðru
fremur ætlað að verða umræðu- og
samstarfsvettvangur þeirra sem áhuga
hafa á markvissri þróun skólastarfs,
skólaumbótum og rannsóknum. Stofn-
þingið er haldið á Hótel Selfossi og
síðasti skráningardagur er 5. nóvember.

Þess er vænst að til liðs við samtökin gangi
kennarar, stjórnendur, kennsluráðgjafar
og kennaramenntunarfólk sem áhuga
hefur á að efla þátt virkra kennsluaðferða,
s.s. sjálfstæðra viðfangsefna, skapandi
starfs, samkennslu, teymiskennslu, heild-
stæðrar kennslu, einstaklingsmiðaðs
náms og samvinnunáms. Samtökin eru
ætluð áhugafólki um skólaþróun á öllum
skólastigum. Samtökin munu gangast fyrir
árlegum ráðstefnum þar sem fólk miðlar
af reynslu sinni, skiptist á skoðunum og
lærir hvert af öðru. Þá stefnir félagið að
útgáfu-starfi, m.a. rekstri upplýsingavefjar
um skólaþróun.
Í tengslum við stofnþingið á Selfossi
verður fjölbreytt dagskrá. Þema þingsins er
Kennarinn sem leiðtogi í breytingastarfi.
Aðalfyrirlesari verður Barry Murphy skóla-
stjóri frá Minneapolis. Þá munu kennarar
og skólastjórar af öllum skólastigum
ræða stöðu skólaþróunar á viðkomandi
skólastigi. Efnt verður til málstofa um
ýmis efni og má þar nefna teymiskennslu,
lýðræði í skólastarfi, námsmat, nýtingu
kennslurýmis, sjálfstæði og ábyrgð í námi
og samkennslu aldurshópa.
Einnig er vakin athygli á því að sam-
tökin munu gangast fyrir námskeiði
um nýja strauma í námsmati þann 17.
nóvember. Námskeiðið verður haldið í
Skriðu, aðalfyrirlestrasal KHÍ, og stendur
yfir frá kl. 15 – 17. Leiðbeinandi verður
Barry Murphy, sá hinn sami og flytur
inngangserindi á stofnþinginu.
Nánari upplýsingar um samtökin,
stofnþingið og námskeiðið er að finna
á vef samtakanna. Slóðin er vefir.khi.
is/skolathroun
Þar er einnig hægt að skrá sig til þátt-
töku í stofnþinginu.
Samtök áhugafólks um skólaþróun
verða stofnuð 18. nóvember
- takið daginn frá -
Gátuverðlaun

Krossgátulausnir eftirtaldra þriggja lesenda
Skólavörðunnar voru dregnar af Hrafnhildi
Kristbjörnsdóttur í Kennarahúsinu, úr
hattkúfi ritstjórans. Handhafar þeirra fá
senda bók að gjöf.

1. Sólveig Kristjánsdóttir Sóleyjargötu
15 í Reykjavík.
2. Anna M. Birgisdóttir Ásvegi 28
í Breiðdalsvík.
3. Sverrir Kolbeinsson Furugerði 13
í Reykjavík.

Í jólablaði Skólavörðunnar, sem jafn-
framt er næsta tölublað, geta lesendur
skemmt sér við að leysa myndagátu. Þuríður
dóttir Hjartar sem er krossgátusmiður
Skólavörðurinn mun taka að sér að semja
þá gátu. Að sjálfsögðu verða verðlaun í
boði. En hver? Það verður ekki upplýst fyrr
en í jólablaðinu!