Skólavarðan - 01.08.2006, Side 17

17
SKÓLAVARÐAN 5.TBL. 6. ÁRG. 2006
ef þau vilja og uppistaða hádegisverðar
er fiskur og grænmeti, það er vegna þess
að ekki borða allir kjöt af mismunandi
ástæðum en allir borða fisk. Börnin taka
þátt í að undirbúa matartíma alveg frá
grunni. Mikil áhersla er lögð á að halda
sykri í lágmarki og börnin koma ekki með
neitt með sér þegar þau eiga afmæli en
haldið er upp á það með því að bjóða upp
á eitthvað hollt.
Við fengum að sjá myndband sem
tekið var þegar farið var í veiðiferð. Úti
var bæði snjór og kuldi, farið var með
strætó og börnin höfðu með sér nesti.
Þegar komið var að veiðistaðnum sem var
ísilagt vatn var byrjað á að gera gat á ísinn.
Veiðarfærið var veiðistöng með tilheyrandi
línu og öngli. Þessi vettvangsferð var tekin
upp á myndbandstökuvél og foreldrar
fengu eintak af myndinni. Myndbönd og
ljósmyndir eru mikið notuð í starfinu til að
auðvelda tjáskipti við foreldra sem hafa
ekki vald á norsku. Það er auðveldara að
sýna foreldrum myndirnar til að útskýra
starfið heldur en að nota talmálið. Hver
deild hefur stafræna myndavél til umráða,
börnin læra að taka myndir sjálf, þau læra
hvert af öðru, sýna hvert öðru og þannig
m.a. læra þau málið.
Öðlast sjálfstraust við
að reyna á sig
Eftir 1. maí er farið í „útilegu“. Þá er
dvalið úti í náttúrunni, útbúið skýli úr
plastdúk og börnin sofa í kuldagöllum
í svefnpokunum. Sjálfstraust barnanna
eykst þegar þau þurfa að reyna á sig. Þau
þora kannski ekki í fyrstu en það kemur
fljótt. Það er frekar einhæft að vera ein-
göngu á leikvellinum og nauðsynlegt að
nota nágrennið. Alltaf finnst eitthvað í
skóginum sem er erfiðara, til dæmis hærra
tré til að klifra í. Mikilvægt er að finna
svæði sem eru mismunandi og ögrandi.
Þar finna allir eitthvað við sitt hæfi sem
eflir bæði fínhreyfingar, grófhreyfingar
og hlutverkaleiki.
Bækur eru teknar með út og stundum
eru sögurnar heimfærðar upp á um-
hverfið, til dæmis „Geiturnar þrjár“. Þá
er leitað að brú og börnin leika söguna í
náttúrulegri sviðsmynd. Í leikskólanum er
talið mikilvægara að skoða sig um en að
vera með mikið af leikföngum.
Börnin syngja daglega og þá aðallega
lög sem þau hreyfa sig við. Lögð er
áhersla á að yngstu börnin fái sinn skerf af
vettvangsferðum, það er bara farin styttri
leið með þau eða eins og hæfir aldri þeirra
og þroska. Til dæmis er mjög stutt að fara
í skóginn og tína jarðarber.
Það vakti athygli okkar hvað allar girð-
ingar voru lágar svo að auðvelt var fyrir
börnin að komast yfir. Aðspurt svaraði
starfsfólkið að þau færu ekkert í burtu.
Gítarar úr krossviði
Tónlist er allsráðandi í Dumpa Musikk-
barnehage og mikið lagt upp úr því að
börnin kynnist alls kyns tónlist. Þau læra
ekki nótur heldur hugtök og fá að búa til
hljóðfæri sem þau spila á. Það er mikið
sungið og unnið með hrynjandi, bæði í
stórum og litlum hópum. Starfsfólkið býr
til geisladiska fyrir börnin með lögum sem
þau hafa gaman af.
Í leikskólanum hefur verið útbúið svið
þar sem börnin koma fram og líkja eftir
hinum ýmsu tónlistarmönnum og þau voru
ekki feimin við að sýna okkur listir sínar.
Þegar við komum voru nokkrir strákar
úti að spila af miklum móð á gítara sem
voru sagaðir úr krossviði og málaðir í
allskyns litum, undir háværri rokktónlist
sem barst úr hljómflutningstækjum í
einum glugganum. Við áttum þó von á að
sjá miklu fleiri hljóðfæri en raun bar vitni
en þau hljóðfæri sem börnin höfðu búið
til sjálf voru bæði eiguleg og frumleg.
Börnin hafa góða aðstöðu til slökunar
og bókalesturs í litlu herbergi þar sem þau
geta lokað að sér og virkaði það mjög vel
á okkur að sjá að börnin gátu valið að vera
í næði.
Þá er einnig mikið farið í vettvangsferðir
og skógurinn óspart nýttur til útivistar.
Í Dumpa eru ekki heitar máltíðir í
hádeginu og sykur í algjöru lágmarki.
Mikið er lagt upp úr því að upphefja
afmælisbarn á annan hátt en með
sætindum, til dæmis með því að leyfa
barninu að vera með sérstaka kórónu
og í skikkju. Leikskólastjórinn, Vigdis, vill
ekki að maturinn sé aðalatriðið í fjörinu/
afmælisveislunni hjá börnunum.
Ánægðustu börnin í Osló
Vigdis talaði mikið um hvernig hún sér
leikskólann í framtíðinni. Hún vill að í
boði verði stöðvar/verkstæði þar sem einn
starfsmaður hefur umsjón. Börnin eiga
svo að geta valið sér stöðvar/verkstæði,
gengið á milli og kynnst öllu. Þannig fá þau
tækifæri til að kynnast öllum fullorðnum
sem vinna í leikskólanum en það finnst
Vigdisi mikilvægt. Einnig fór hún með
okkur um allt húsið til að sýna hvaða
árangur hafði náðst í að lækka alla hluti í
hæð barnanna og gera leikskólann þannig
aðgengilegri fyrir þau. Að lokum sagði
Vigdis okkur að aðalmarkmið leikskólans
hennar væri að hafa ánægðustu börnin í
Osló!
Mikil eftirvænting var í Noregi vegna
Leikskólinn Rudshögda Naturbarnehage
Leikskólinn Dumpa Musikkbarnehage
NORSKIR LEIKSKÓLAR