Skólavarðan - 01.01.2002, Qupperneq 2

Annað þing Kennarasambands Íslands verður haldið 8.
og 9. mars nk. Auk hefðbundinna þingstarfa verður unn-
ið með þema sem verður eins konar yfirskrift þingsins.
Megininntak þess er hvernig gera má kennarastarfið að
aðlaðandi og eftirsóknarverðu ævistarfi. Í kjarasamning-
um fyrir grunn-, framhalds-, leik- og tónlistarskóla er að
finna sameiginleg markmið samningsaðila um að gera
skólana samkeppnisfæra og kennarastarfið eftirsóknar-
vert. Leiðir til að mæta kennaraskorti hafa mikið verið
ræddar á Norðurlöndum og víðar í Evrópu. Svíar hafa
ráðist í verkefni sem þeir kalla „Attraktiv skola“ með það
að markmiði að efla gæði skólastarfs og gera skólann að
eftirsóknarverðum vinnustað í hugum fólks.
Líðan á vinnustað
Kennarastarfið verður ekki eftirsóknarvert nema kenn-
urum líði vel í skólanum og þar ríki góður starfsandi.
Kennarasambandið og aðildarfélögin þurfa að móta sér
stefnu um það hvernig koma má félagsmönnum til að-
stoðar vegna vanlíðunar í starfi. Danmarks Lærerforen-
ing hefur skipulagt sérstaka ráðgjafarþjónustu fyrir
félagsmenn sem telja sig búa við andlega vanlíðan í starfi
(psykiske arbejdsmiljøproblemer). Skólastjórnun skiptir
að sjálfsögðu höfuðmáli í að skapa góðan starfsanda, sér-
staklega þegar dregið er úr miðstýringu kjarasamninga
eins og hér hefur verið gert og fleiri ákvarðanir færðar út
í skólana.
Fyrsta kjörtímabilið senn á enda
Fyrir rétt rúmum tveimur árum sameinuðust allir
grunnskólakennarar í einu félagi, Félagi grunnskólakenn-
ara, sem er stærsta aðildarfélag KÍ. Kjörtímabilið hefur
verið viðburðaríkt og ber þar hæst kjarasamningagerðina
en einnig að forysta félagsins ákvað að rækta sem best
sambandið við félagsmenn. Í þeim tilgangi var gerð viða-
mikil skoðanakönnun meðal allra félagsmanna og verður
þeim seint fullþakkað hve vel þeir brugðust við en þátt-
taka var mjög góð þrátt fyrir á áttunda tug spurninga.
Samskipti við trúnaðarmenn voru efld með auknu upp-
lýsingastreymi í gegnum trúnaðarmannabréf og fleiri
fundi auk árvissra námskeiða. Síðast en ekki síst var
ákveðið að heimsækja félagsmenn á vettvangi og stefnt að
því að fara í alla skóla á kjörtímabilinu. Umræðuefni í
skólaheimsóknum voru fyrst og fremst starfsemi félagsins
og samningamálin. Enn á eftir að heimsækja fáeina skóla
á landinu en í aðra hefur verið farið oftar en einu sinni.
Kosningar og stefnumörkun
Allt bendir til líflegrar umræðu og kosninga á aðal-
fundi Félags grunnskólakennara sem haldinn verður 6. og
7. mars nk. Þar verður m.a. kosin forysta félagsins, samn-
inganefnd og skólamálanefnd. Uppstillingarnefnd hefur
nú lagt fram tillögu sína og það ánægjulega kemur í ljós
að fjölmargir félagsmenn gefa kost á sér til trúnaðarstarfa
og vilja leggja félaginu lið. Er það til merkis um félags-
lega virkni og áhuga meðal kennara sem vilja láta rödd
sína heyrast. Á aðalfundinum verða lagðar línur fyrir
næsta kjörtímabil og ný kjara- og skólamálastefna auk
fjölda annarra stefnumála, m.a. um innri starfsemi félags-
ins, tekin til afgreiðslu. Þá verða lögin endurskoðuð í ljósi
reynslunnar, til dæmis er lagt til að varamönnum í stjórn
og skólamálanefnd verði fjölgað og kosnir varamenn í
samninganefnd. Ennfremur verða lagðar fram tillögur til
samræmis við þær breytingar sem lagt er til að gerðar
verði á lögum KÍ, einkum m.t.t. aukins sjálfstæðis aðild-
arfélaganna.
Undirbúningur fulltrúa
Aðalfundarfulltrúar voru kjörnir af svæðafélögum og
eru þeir alls 78. Að auki eiga stjórn FG og formenn
svæðafélaga sæti á aðalfundinum þannig að samtals verða
aðalfundarfulltrúar 92. Stjórnir svæðafélaga munu skipu-
leggja undirbúning fulltrúa fyrir aðalfundinn og boða þá
á sérstaka undirbúningsfundi þar sem því verður við
komið. Mikilvægt er að aðalfundarfulltrúar og trúnaðar-
menn á landinu öllu efni til umræðufunda í skólunum um
þau mál sem lögð verða fyrir aðalfundinn og fái þannig
fram skoðanir sem flestra til að þær endurspeglist í sam-
þykktum fundarins.
Sigurjón Pétursson
Sigurjón Pétursson deildarstjóri grunnskóladeildar Sam-
bands íslenskra sveitarfélaga fórst í sviplegu bílslysi 11. jan-
úar sl. Við í Félagi grunnskólakennara áttum við hann
mikið samstarf, hann átti sæti í samninganefnd Launa-
nefndar sveitarfélaga, samstarfsnefnd vegna kjarasamninga
og í samráðsnefnd með fulltrúum kennara, skólastjóra og
menntamálaráðuneytis. Fáum mönnum treystum við betur
en Sigurjóni og hann var mikilvægasti samstarfsaðili okkar
í öllu er lýtur að kjarasamningi grunnskólakennara. Það
verður erfitt að fylla skarðið sem Sigurjón skilur eftir sig.
Félag grunnskólakennara þakkar Sigurjóni Péturssyni góð
kynni og vottar honum virðingu sína.
Guðrún Ebba Ólafsdóttir
Formannspist i l l
Kennsla - aðlaðandi
ævistarf!
3