Gerðir kirkjuþings - 2010, Qupperneq 152

152
• Að tilheyra söfnuðinum.
Mikilvægt er að börnin finni að þau séu hluti af söfnuðinum. Þetta þýðir að taka
þarf tillit til þarfa þeirra og skapa þarf aðstæður fyrir þau í kirkjunni. Mikilvægt er
að gera börnin kirkjuvön.

2. Barnið og skírnarfræðslan
Mikilvægt er að hafa haldgóða þekkingu á þroska og því hvernig börn læra, til að geta
skapað góðar forsendur fyrir fræðsluna. Börn eru stöðugt að læra og afla sér nýrrar
þekkingar.
Fyrstu ár ævinnar eru miklir breytingatímar og börnin þroskast samtímis á mörgum
sviðum. Barnið tekur mót af erfðum og upplagi en auk þess mótast það af nánasta
umhverfi.
Viðhorf tengd trú og siðferði mótast í gegnum samskipti við aðra. Heimilin hafa á
þessu æviskeiði mestu áhrifin og leggja grunninn fyrir framtíðina. Gildi og viðhorf
sem barnið tileinkar sér í uppvexti hefur síðar meir áhrif á val og viðhorf
einstaklingsins.
Barnið er ekki einvörðungu vitsmunavera heldur einnig félags- og tilfinningavera.
Mæta þarf öllum þessum sviðum í fræðslunni þó megináherslan sé lögð á trúar- og
siðferðisþroska barnsins. Börn hafa hæfileika á mismunandi sviðum, taka þarf tillit til
þessa í starfi meðal barna. Þegar barnastarfið er undirbúið og skipulagt þarf að ganga
út frá forsendum barnsins. Taka þarf tillit til eftirfarandi þátta:
o Barnið í brennidepli. Öll fræðsla á að ganga út frá forsendum barnsins. Það
þýðir að fræðslan á að taka mið af þörfum þess. Fjöldi fræðara þarf að vera í
hlutfalli við fjölda barnanna.
o Barnið sem einstaklingur. Barnahópurinn er myndaður af einstaklingum. Börnin
þurfa, eins og hægt er, að fá fræðslu við sitt hæfi.
o Börn hafa ólíkan bakgrunn. Börn alast upp við ólíkar aðstæður. Til kirkjunnar
koma börn með ólíkan menningarbakgrunn. Mæta þarf öllum börnum með
opnum hug og án fordóma. Börnin þurfa að læra að sýna hvert öðru virðingu og
umburðalyndi. Huga þarf að því að sum börn hafa annað móðumál en íslensku
og taka þarf tillit til þess.
o Börn eru ólík. Þarfir barna eru ólíkar. Sum vilja stöðugt vera að, en önnur kjósa
frekar að hafa hægt um sig. Mikilvægt er að átta sig á því að fræðsluefnið getur
þess vegna átt misvel við börnin.
o Börn með sérþarfir. Sum börn eiga við fötlun að stríða eða einhverja aðra
erfiðleika. Viss börn eiga við hegðunarvanda að stríða og önnur glíma við
athyglisbrest og ofvirkni. Taka þarf tillit til þess að börnin eru ólík og mæta þarf
þeim eins og þau eru. Aðgengi fyrir fatlaða þarf að vera í góðu lagi. Öll börn eru
velkomin í kirkjuna sína.
o Heildstæður þroski. Barnastarfið leggur fyrst og fremst áherslu á hið trúarlega
og siðferðilega. Barnastarfið á að þroska hugsun barnsins um Guð og hafa áhrif
á siðgæðisvitund þess. Þrátt fyrir þetta á barnastarfið að höfða til allra
þroskaþátta barnsins. Starfið á að ýta undir þroska hugsunar og máls, upplifunar
og tjáningar, samskipti við aðra og sköpunarþáttinn.