Morgunblaðið - 29.06.2016, Qupperneq 30

30 MENNING
MORGUNBLAÐIÐ MIÐVIKUDAGUR 29. JÚNÍ 2016
Hoist Vinnulyftur • Víkurhvarf 4 • Sími 517 6000 • hoist@hoist.is • www.hoist.is
Umboðsaðili Alimak Hek á Íslandi
Turnlyftur
Sala og þjónusta
Sérhæfum okkur
í sölu og þjónustu
á lyftum af öllum
stærðum og gerðum
517 6000
Silja Björk Huldudóttir
silja@mbl.is
„Þessi tónleikaröð er eðlilegt framhald af starfi
mínu gegnum árin, en ég hef staðið fyrir mjög
mörgum tónleikaröðum bæði hér- og erlendis,“
segir Nína Margrét Grímsdóttir, píanóleikari
og listrænn stjórnandi nýrrar tónleikaraðar
sem nefnist Reykjavík Classics.
Tónleikaröðin hefur göngu sína í Eldborg á
morgun, fimmtudag, og stendur til og með 14.
ágúst. Á framangreindu tímabili verður boðið
upp á tónleika daglega sem hefjast kl. 12.30 og
eru 30 mínútur að lengd án hlés. „Alls verða sjö
efnisskrár fluttar á tímabilinu, en fjórar efnis-
skrárnar eru leiknar í viku, tvær í fjóra daga og
ein í tíu,“ segir Nína Margrét og tekur fram að
annir tónlistarfólksins skýri mismunandi tón-
leikafjölda hverrar dagskrár. „Á sumrin hefur
verið minna um tónleikahald í Eldborgarsal
Hörpu og mér fannst tilvalið að bæta úr því,“
segir Nína Margrét og bendir á að efnisskrá
tónleikanna verði klassísk meistaraverk flutt af
einleikurum úr fremstu röð.
Lyftir áheyrendum á æðra svið
Á opnunartónleikum Reykjavík Classics á
morgun kl. 12.30 munu Áshildur Haraldsdóttir
flautuleikari, Ari Þór Vilhjálmsson fiðluleikari,
Þórunn Ósk Marinósdóttir víóluleikari og Sig-
urður Bjarki Gunnarsson sellóleikari flytja tvö
verk eftir W.A. Mozart. „Mér fannst gaman að
byrja á fantasíu í d-moll K. 397 sem er fallega
íhugult verk. Síðan heyrum við flautukvartett í
D-dúr K. 285 sem eitt af mínum uppáhalds-
verkum. Kvartettinn lyftir áheyrendum á æðra
svið, enda er ekki hægt annað en vera glaður
þegar maður heyrir þennan flautukvartett.“
Spurð um val sitt á listamönnunum tólf sem
fram koma á tónleikaröðinni í sumar segir Nína
Margrét að allt séu þetta frábærir tónlist-
armenn sem hún hafi unnið mikið með á umliðn-
um árum, en auk framangreindra listamanna
koma fram Þóra Einarsdóttir sópran, Hrólfur
Sæmundsson baritón, Svanur Vilbergsson gít-
arleikari og trompetleikararnir Guðmundur
Hafsteinsson, Jóhann Ingvi Stefánsson, Vil-
hjálmur Ingi Sigurðarson og Baldvin Oddsson.
Að sögn Nínu Margrétar varð efnisskrá sum-
arsins til í samtali. „Ég kem með mínar tillögur
og spyr flytjendur um þeirra hugmyndir. Mér
finnst ágætt að hafa ákveðinn fókus á hverjum
tónleikum,“ segir Nína Margrét og tekur fram
að áhersla sé lögð á klassíska tónlist sem höfði
til sem flestra tónlistarunnenda. „Mér fannst
mikilvægt að fólk gæti gengið að upplifun á fag-
urri klassískri tónlist með frábærum flytj-
endum í þessum stórbrotna sal og líka að það
væru hæfilega langir tónleikar.“
Aðspurð segir Nína Margrét tónleikaröðina
hugsaða jafnt fyrir erlenda ferðamenn og Ís-
lendinga sem vilja skreppa á klassíska tónleika í
hádegishléi sínu. „Ef maður væri að koma til
New York í fyrsta sinn og væri boðið að skoða
Carnegie Hall myndi maður auðvitað vilja
heyra tónlist til að upplifa salinn í sinni réttu
mynd. Okkur finnst mikilvægt að erlendir
ferðamenn fái tækifæri til að njóta Eldborgar
Hörpu. Enda spyrja þeir sem koma í Hörpu á
sumrin iðulega hvort þeir geti ekki fengið að
njóta hljómburðarins í Eldborg og þetta er
náttúrlega einstakt tækifæri til þess. Mér finnst
líka mikilvægt að minna á að klassísk tónlist er
ekki áberandi í okkar daglega umhverfi. Við
sem störfum sem tónlistarmenn þurfum að
auka þátt klassískrar tónlistar í samfélaginu
með því að auðvelda aðgengi að henni og undir-
strika að áheyrendur þurfi ekki að setja sig í
ákveðnar stellingar,“ segir Nína Margrét og
bendir á að Reykjavík Classics njóti stuðnings
mennta- og menningarmálaráðuneytisins og
Höfuðborgarstofu. „Enda eykur verkefnið
framboð menningar á höfuðborgarsvæðinu yfir
sumartímann.“
Geti átt dásamlega stund
Innt eftir því hvort stærð Eldborgar hafi kall-
að á fjölmennari flytjendahóp eða stærri verk
heldur en ef tónleikaröðin færi fram í minni sal
svarar Nína Margrét því neitandi. „Fyrst og
fremst langaði mig til að bjóða upp á þessi elsk-
uðu meistaraverk. Fókus tónleikaraðarinnar er
gömlu meistaraverkin sem gleðja okkur á hvaða
tímapunkti sem er. Ég horfði alls ekki til þess
að verkin þyrftu að vera fjölmenn í flutningi.
Tónlistin sem flutt er í Eldborg er oftast flutt af
sinfóníuhljómsveit, en hljómburðurinn í salnum
er svo frábær að hann ber allt frá einleik upp í
kammerverk og sinfóníuverk og allt þar á milli.
Þetta á við um bestu húsin og í því samhengi get
ég aftur nefnt Carnegie Hall. Markmiðið með
þessari nýju tónleikaröð er að skapa vingjarn-
lega stemningu þannig að áheyrendur geti átt
dásamlega stund og notið hljómburðarins.
Áheyrendur þurfa ekki að vera neinir sérfræð-
ingar í klassískri tónlist. Þetta er allt tónlist sem
okkur finnst gaman að flytja, okkur líður vel og
ég er sannfærð um að það mun endurspeglast í
andrúmslofti tónleikanna,“ segir Nína Margrét
að lokum.
Allar nánari upplýsingar um Reykjavík
Classics má finna á vefnum harpa.is.
„Upplifa salinn í sinni réttu mynd“
 Ný tónleikaröð í Hörpu hefur göngu sína í hádeginu á morgun  Markmiðið að auðvelda aðgengið að
klassískri tónlist  Áheyrendur þurfa ekki að setja sig í ákveðnar stellingar segir listrænn stjórnandi
Morgunblaðið/Ófeigur
Listafólk Þórunn Ósk, Áshildur, Nína Margrét, Þóra, Sigurður Bjarki og Ari Þór á æfingu í Tónlistarskólanum í Reykjavík fyrr í vikunni.
 30. júní til 6. júlí
Flautukvartett í D-dúr og píanófantasía í d-moll
eftir W.A. Mozart. Flytjendur eru Ari Þór Vilhjálms-
son, Áshildur Haraldsdóttir, Nína Margrét Gríms-
dóttir, Sigurður Bjarki Gunnarsson og Þórunn Ósk
Marinósdóttir
 7. júlí til 13. júlí
Ljóðaflokkurinn Frauenliebe und leben eftir Robert
Schumann. Flytjendur eru Þóra Einarsdóttir og
Nína Margrét Grímsdóttir
 14. júlí til 23. júlí
Frönsk tónlist fyrir flautu og píanó eftir Francis
Poulenc og Cécile Chaminade. Flytjendur eru Ás-
hildur Haraldsdóttir og Nína Margrét Grímsdóttir
 24. júlí til 27. júlí
Bandarísk alþýðulög í umritun Aaron Copland og
ljóðaflokkurinn Mélodies Passagères op. 27 eftir
Samuel Barber. Flytjendur eru Hrólfur Sæmunds-
son og Nína Margrét Grímsdóttir
 28. júlí til 3. ágúst
Píanókvartett í g-moll K. 478 eftir W.A. Mozart.
Flytjendur eru Ari Þór Vilhjálmsson, Nína Margrét
Grímsdóttir, Sigurður Bjarki Gunnarsson og Þórunn
Ósk Marinósdóttir
 4. ágúst til 10. ágúst
Tónverk fyrir fjóra trompeta frá ýmsum löndum.
Flytjendur eru Guðmundur Hafsteinsson, Jóhann
Ingvi Stefánsson, Vilhjálmur Ingi Sigurðarson og
Baldvin Oddsson.
 11. ágúst til 14. ágúst
Sjaldheyrð sónata mexíkanska tónskáldsins Manuel
Ponce fyrir gítar og píanó og La Muerte del Angel
eftir tangótónskáldið Astor Piazzolla. Flytjendur
eru Svanur Vilbergsson og Nína Margrét Gríms-
dóttir
Fjölbreytt efnisskrá
DAGSKRÁ REYKJAVÍK CLASSICS Í ELDBORG SUMARIÐ 2016
W.A. Mozart
Francis Poulenc
Astor Piazzolla