Litli Bergþór - 01.07.2014, Blaðsíða 35
Litli-Bergþór 35
Guttormur Bjarnason og Signý Guðmundsdóttir
sögðu um áramót upp starfi sínu sem ráðsmenn í
Skálholti og ætla að bregða búi á næstu fardögum,
þ.e. um mánaðarmót maí - júní. Þau munu flytja á
höfuðborgarsvæðið. Staða ráðsmanns í Skálholti var
auglýst í apríl og var mikill áhugi á starfinu Sóttu um
15 manns um. Kirkjuráð réði í starfið í lok maí og eru
það hjónin Jóna Þormóðsdóttir og Ásgeir Ásgeirsson
sem eru nýir ráðsmenn í Skálholti. Voru þau áður með
búskap í Álftafirði, en hafa ekki verið við bústörf í
nokkur ár. Hún er búfræðingur frá Hvanneyri.
Skálholtsstaður hélt þeim Signýju og Guttormi
kveðjusamsæti í Skálholtsskóla að lokinni messu á
uppstigningardag 29. maí. Var það fjölmennt og fór
vel fram.
Kirkjuráð auglýsti einnig í febrúar eftir fólki
til að taka við rekstri Skálholtsstaðar, veitinga- og
hótelrekstrinum. Engin niðurstaða var komin í það
mál þegar blaðið fór í prent.
Knútur Ármann og Helena Hermundardóttir voru
ein þeirra, sem hlutu Landbúnaðarverðlaun, sem veitt
voru í 18. sinn á búnaðarþingi í byrjun Mars 2014. Eru
verðlaunin veitt aðilum sem sýna áræðni og dugnað og
eru til fyrirmyndar. Verðlaunin voru steinleirsskúlptúr
á stöpli úr íslensku birki, unninn af Sigríði Helgu
Olgeirsdóttur i Hruna.
Jón K.B. Sigfússon, kokkur í Aratungu, hefur sagt
starfi sínu lausu sem matráður þar og mun einbeita
sér eingöngu að veitingarekstri á Friðheimum. Í apríl
og maí bauð Jón gestum sínum á Friðheimum upp
á brauð með birkisafa, en eingöngu er hægt að nýta
birkisafann frá miðjum apríl fram í maí.
Auglýst var eftir nýjum matráði í Aratungu og
hefur Steinunn Lilja Heiðarsdóttir verið ráðin.
Júlíana Tyrfingsdóttir hefur sagt upp starfi
leikskólastjóra Álfaborgar og tekur við starfi
leikskólastjóra á Selfossi. Staða hennar hefur verið
auglýst laus til umsóknar.
Kristinn J. Gíslason sagði
starfi sínu lausu sem
sviðsstjóri framkvæmda-
og þjónustusviðs Blá-
skógabyggðar og í hans
stað var samþykkt að
ráða nafna hans, Kristinn
Lúðvík Aðalbjörnsson frá
Akranesi.
Hafdís Leifsdóttir hefur látið af störfum sem
umsjónarmaður fasteigna Bláskógabyggðar í
Reykholti en þau hjónin eru að flytja til Reykjavíkur.
Unnið er nú að endurmati á starfi umsjónarmanns
fasteigna í Reykholti á vegum sveitarstjórnar. Nýting
félagsheimilisins Aratungu hefur aukist nokkuð á
síðast liðnu ári. Sveitarstjórn lét yfirfara starfslýsingar
starfsmanna í Aratungu og staða umsjónarmanns hefur
nú verið auglýst laus til umsóknar.
Hjónin Mika og Bozena í Café Mika hafa keypt
húsnæðið Bjarkarhól í Reykholti af Ingu Þyri
Kjartansdóttur og Bergþóri Úlfarssyni. Þau hyggjast
stækka við sig og flytja súkkulaðigerð sem þau hafa
rekið á Flúðum yfir í Bjarkarhól.
Vinningstillögur í hugmynda-samkeppni að skipulagi
á Geysissvæðinu voru kynntar 7. mars. Alls bárust 14
tillögur og sigurvegarar voru Landsmótun sf., sem
inniheldur m.a. Einar E. Sæmundsen, landslagsarkitekt
FÍLA, í samstarfi við Argos arkitekta. Í áliti
dómnefndar um vinningstillögu segir að heildarlausn
sé vel útfærð. Lega stíganna er raunhæf og til þess
fallinn að mynda gott flæði. Upplifunarstígum og
útsýnispöllum sé einnig vel fyrirkomið. Sjónlínum er
haldið hreinum og aðgangur opnaður að fleiri hverum.
Vonir standa til þess að verðlaunaðar hugmyndir verði
nýttar í áframhaldandi vinnu við gerð heildarskipulags
fyrir svæðið og að hefja megi uppbyggingu á svæðinu
á grundvelli þeirrar vinnu.
Landeigendafélag Geysis hóf gjaldtöku fyrir aðgang
að Geysissvæðinu 15. mars. Eftir háværar deilur og
málaferli var landeigendum gert að láta af gjaldtöku,
en beðið er niðurstöðu ríkisins um öflun og deilingu
fjármuna til viðhalds fjölsóttra ferðamannastaða.
Leyndardómar Suðurlands hófust föstudaginn
28. mars og stóðu út sunnudaginn 6. apríl. Fjöldi
fyrirtækja og menningaraðila sýndu sitt besta andlit og
í Bláskógabyggð voru Hótel Geysir með viðburðinn
Upplifðu leyndarmálið á Geysi 4.-6. apríl, Gullkistan,
miðstöð sköpunar var með opið hús í Miðstöðinni á
Laugarvatni báðar helgarnar, Bjarkarhóll var með
stórútsölu alla dagana, Gallerí Laugarvatni var með
íslenskt páskahandverk og skreytingar, á Laugvatni
var líka Laugarvatn í ljúfum draumi, Lindin hélt
upp á Afmælisdag sinn, Efstidalur bauð upp á
Ferðamannafjós og Leyndardómaís, Café Mika bauð
upp á íslenska lambið í aðalhlutverki. Einnig var frítt í
sund í Reykholtslaug þann 29. mars.
Vegagerðin fékk 3. apríl framkvæmdaleyfi sveitar-
stjórnar til breikkunar Biskupstungnabrautar frá Múla
að Neðra-Dal. Vegavinnan mun standa áfangaskipt
yfir í sumar og fram undir lok sumars 2015. Kristinn L. Aðalbjörnsson.