Litli Bergþór - 01.07.2014, Blaðsíða 42

42 Litli-Bergþór
Dæturnar Margrét, Alexandra og Droplaug
Auk búskaparins er ég svo í hálfu stöðugildi í þjónustu
við Skálholtsstað, sinni ýmsu viðhaldi og eftirliti, og
sé um hitaveituna á staðnum auk meðhjálparastarfi í
kirkjunni.
Signý: Ég hef kennt við Reykholtsskóla, sem nú heitir
Bláskógaskóli, frá því að ég kom í sveitina 1993, undir
stjórn fjögurra skólastjórnenda. Þeim Unnari, Kristni,
Arndísi og Hrund. Aðal kennslugreinar hafa verið
handmennt/textíl og danska, en einnig önnur fög ef
þannig stendur á. Ég er orðin elsti starfsmaður skólans
og ég segi krökkunum stundum að ég sé 107 ára og
skólinn hafi verið byggður utan um mig! Tilfellið er
að Guttormur er líka elsti starfsmaður Skálholtsstaðar,
svo við erum að verða gömul í hettunni hér.
Dagurinn hjá mér lítur annars þannig út að ég fer
í fjósið kl. 6 á morgnana, er komin inn kl. 8 og fer
síðan beint í skólann. Kenni kl 9 til 17, kem heim, set
kvöldmatinn í ofninn og er komin í fjós kl. 18.
Hér áður fyrr var ég einnig með alla umsjón með
sumarbúðunum þ.e. þrif, þvotta og bókhaldið, en nú er
það bara eftirlit með húsum og viðhald sem við sjáum
um. Bókanir og fjármál hafa verið flutt á skrifstofu
Skálholtsskóla.
Það hefur ekki verið mikið um frí þessi búskaparár
okkar, allavega ekki sameiginleg frí, því kýrnar bjóða
ekki upp á fjarveru. Ég segi stundum að fyrsta skipti
sem ég sleppti mjöltum var þegar ég átti Margréti,
yngstu dóttur okkar. Mjólkaði morgunmjaltirnar fórum
síðan til Reykjavíkur í fjölskylduboð og seinnipartinn
þann dag fékk ég verkina. Guttormur keyrði í loftinu
heim, mjólkaði og keyrði svo beint í bæinn aftur og
kom í tæka tíð til að vera viðstaddur fæðinguna. Síðan
aftur heim um nóttina til að mjólka morguninn eftir!
- Eldri dæturnar voru fæddar áður en við gerðumst
bændur.
En þetta er lífið sem við vildum og okkur hafði dreymt
um. Það hefur líka marga kosti og við höfum átt alveg
yndislegan tíma hér í Skálholti.
Dæturnar hafa alist upp í búskapnum, tekið þátt í
störfunum og haft yndi af því að umgangast dýrin. Svo
er lærdómsríkt að alast upp á svona menningarsetri.
Mér er minnisstætt þegar Rannveig og Bernharður
bjuggu hér í rektorshúsinu og gömlu biskupshjónin,
Sigurbjörn og Magnea, voru stundum hjá þeim. Þá kom
það fyrir að Sigurbjörn gamli kom í fjósið til okkar,
bara til að spjalla og finna fjósalyktina eins og hann
sagði. - Einu sinni var Alexandra að temja kálf úti á
túni, sem hún ætlaði að sýna á landbúnaðarsýningu og
gamli maðurinn labbaði til hennar, kjassaði kálfinn og
spjallaði við hana. Það var fallegt að horfa á það. Við
höfum haft mjög gott samband við alla þá fjölskyldu,
einnig Karl Sigurbjörnsson fv. biskup.
En kúabúskapur er líka bindandi starf og dæturnar
eru ekki tilbúnar í þessa bindingu, enda allar í
námi eða komnar í góða vinnu. Droplaug er master
í alþjóða viðskiptafræðum frá HR og vinnur hjá
fasteignafélaginu Regin. Hún býr með Jóhanni Pétri
Jenssyni í Hveragerði og þau eiga von á sínu fyrsta
barni, og þar með fyrsta barnabarni okkar, í ágúst.
Alexandra er að ljúka námi í sjúkraþjálfun nú í vor
og líkar mjög vel í því fagi og Margrét er á 2. ári í
Kvennaskólanum og lýkur stúdentsprófi á næsta ári.
L-B: Hvernig hafa samskiptin við Kirkjuráð gengið?
Guttormur: Jú, við leigjum jörð og hús af kirkjuráði
og höfum að jafnaði ekki þurft að kvarta yfir þeim
samskiptum. En nú á seinni árum hafa þó verið
einhverjar vöflur á þeim varðandi búskapinn og við,
og ekki síður nágrannar og sveitarstjórn haft vaxandi
áhyggjur af því. Ekki laust við að ýmislegt skrýtið
og óígrundað hafi frá þeim komið. Fyrir jól 2010,
rétt eftir að sr. Sigurður dó, var okkur t.d. tilkynnt að
okkur myndi verða sagt upp ábúðinni, en sú ákvörðun
síðan dregin til baka. Nú sögðum við upp um áramót
og það var ekki fyrr en nú í apríl að auglýst var eftir
nýjum ábúendum og einungis einn og hálfur mánuður
í fardaga. Það er ekki langur tími til stefnu og hlýtur
að vera erfitt að finna framtíðar bændur með svo
stuttum fyrirvara. Þeir sem taka við búi á stað sem
Skálholti þurfa að vera tilbúnir til að halda ásýnd
staðarins snyrtilegum og reisulegum og taka á sig þær
skyldur sem fylgja búskap á svona stað. Oddvitanefnd
uppsveitanna hefur sent kirkjuráði áskorun um að
halda ábúð á jörðinni og við hjónin höfum rökstutt það