Litli Bergþór - 01.07.2014, Blaðsíða 38

38 Litli-Bergþór
Gullspretturinn fór fram laugardaginn 14. júní.
Sigurvegarar urðu Kári Steinn Karlsson, sem bætti
fyrra met sitt og hljóp á 32:07 mín., og Agnes
Kristjánsdóttir á tímanum 40:41 mín. Forsvarsmenn
hlaupsins eru Gríma Guðmundsdóttir og Sigurður
Halldórsson.
Á fyrsta fundi nýrrar sveitastjórnar 16. júní
var Helgi Kjartansson valinn oddviti og Valgerður
Sævarsdóttir varaoddviti og er hún jafnframt formaður
byggðaráðs. Valtýr Valtýsson var áfram ráðinn sem
sveitarstjóri og Helgi var ráðinn í hálft starf á skrifstofu
sveitarfélagsins. Skipaður var vinnuhópur til að vinna
úr skýrslu Ingvars Sigurgeirssonar „Skipan skóla í
Bláskógabyggð“ og skal hópurinn hraða starfi sínu
sem mest.
Sveitarstjórn styrkir Umf. Laugdæla um 250 þúsund
kr. til gerðar tveggja strandblakvalla við Laugarvatn.
Sveitarstjórn beinir tilmælum til íbúa að eyða
skógarkerfli og sendar hafa verið út leiðbeiningar
þar að lútandi til íbúa sveitarfélagsins. Íbúar eru
þar minntir á að smakka á plöntunum og ef ekki er
lakkrísbragð af þeim þá beri að eyða kerflinum.
Þjóðhátíðardagurinn var haldinn hátíðlegur
í Aratungu þar sem fjallkona var Dýrfinna
Guðmundsdóttir frá Iðu. Flutti hún ljóðið „Land
og þjóð“ eftir Jón Magnússon. Nýstúdentinn Bjarni
Sævarsson Arnarholti flutti hátíðarræðuna í ár.
Haldið var einnig upp á daginn við Héraðsskólann
á Laugarvatni þar sem kynnir var Sigurbjörn Árni
Arngrímsson.
Vígsla nýuppgerðra Tungnarétta fór fram
laugardaginn 21. júní 2014 kl. 14 í góðu veðri.
Þar afhenti Brynjar Sigurðsson á Heiði, f.h. Vina
Tungnarétta, Helga Kjartanssyni oddvita, f.h.
sveitarstjórnar, réttirnar til varðveislu og viðhalds.
Lagði hann sérstaka áherslu á viðhaldsþáttinn, sem
ekki var nægilega sinnt við gömlu réttirnar. Sigurður
Ingi Jóhannsson landbúnaðar- og sjávarútvegsráðherra
klippti á borðann, sr. Hjálmar Jónsson blessaði
mannvirkið og Guðni Ágústsson fyrrverandi
landbúnaðarráðherra hélt eina af sínum rómuðu
ræðum með dyggri aðstoð Jóhannesar Kristjánssonar
eftirhermu sinnar.
Sama dag, 21. júní, opnuðu þau Brynjar og Marta
á Heiði veitingastofuna „Við Faxa“ í brekkunni við
veginn niður að réttunum.