Bændablaðið - 28.03.2019, Blaðsíða 10

Bændablaðið | Fimmtudagur 28. mars 201910
FRÉTTIR
Þröstur Þorsteinsson á Moldhaugum tekur við nautgriparæktarverðlaunum BSE fyrir árið 2018.
Mynd / Búnaðarsambandi Eyjafjarðar
Nautgriparækt til fyrirmyndar
á Moldhaugum í Hörgársveit
Þröstur Þorsteinsson og fjöl­
skylda hans á Moldhaugum í
Hörgársveit hlutu nautgripa­
ræktarverðlaun BSE fyrir árið
2018 fyrir góðan árangur í
greininni.
Þröstur Þorsteinsson er fæddur
á Moldhaugum og ólst þar upp
en foreldrar hans keyptu jörðina
1947 og hóf hann búskap með
þeim 1987. Frá árinu 1999 hefur
Þröstur búið þar með konu sinni,
Söru Saard Wijannarong, ásamt
tveimur sonum þeirra hjóna.
Í hópi afurðahæstu búanna
Lengi hefur verið vel búið á
Moldhaugum en nýtt fjós með
mjaltaþjóni var tekið í notkun árið
2013 og í kjölfar þess hækkuðu
afurðir búsins um nálægt 2000 kg
af mjólk á hverja kú á tveimur árum.
Síðustu fjögur ár hafa Moldhaugar
verið í hópi 15 afurðahæstu kúabúa
landsins. Árið 2016 skipuðu þau
annað sæti listans með 8.274 kg af
mjólk eftir 61 árskú. Á síðasta ári var
bú þeirra hjóna í 7. sæti með 8.149 kg
eftir tæplega 64 kýr. Á þessum árum
hefur búið verið í fyrsta til fjórða
sæti afurðahæstu búa á félagssvæði
BSE. Einnig eru þau hjón með
talsverða nautakjötsframleiðslu og
á síðasta ári voru lögð inn nálægt 5
tonnum af 20 gripum. /MÞÞ
Embluverðlaunin, sem eru norræn
matarverðlaun, verða veitt í Hörpu
í Reykjavík 1. júní næstkomandi
í tengslum við norrænt kokka­
þing. Verðlaununum er ætlað
að auka sýnileika og vekja
áhuga almennings á norrænni
matarhefð og matvælum sem
framleidd eru á Norðurlöndunum.
Embluverðlaunin eru veitt á
tveggja ára fresti en þau voru
fyrst afhent í Kaupmannahöfn
árið 2017. Að verðlaununum
standa norræn bændasamtök
með stuðningi Norrænu ráðherra­
nefndarinnar.
Tilnefningar til og með 31. mars
Opnað var fyrir tilnefningar í
byrjun mars á vefsíðunni www.
emblafoodawards.com en frestur
til að skrá tilnefningar er til og með
31. mars nk. Tilnefningum er safnað
saman á öllum Norðurlöndunum en
allir geta tilnefnt fulltrúa frá sínu
landi. Þátttaka kostar ekkert. Þriggja
manna dómnefnd í hverju landi fyrir
sig ákveður hverjir verða tilnefndir
sem fulltrúar hvers lands.
Verðlaunaflokkar eru sjö talsins:
Hráefnisframleiðandi
Norðurlanda 2019
Verðlaunin verða veitt bónda,
sjómanni, veiðimanni, safnara
o.s.frv. sem stendur fyrir hráefni
af miklum gæðum. Sem nýtir
menningarlegar og náttúrulegar
rætur sínar á Norðurlöndum og sem
sjálfur framleiðir, veiðir eða safnar
hráefninu.
Matvælafrumkvöðull
Norðurlanda 2019
Veitt einstaklingi, fyrirtæki eða
stofnun sem hefur þróað nýja
aðferð með breiða skírskotun og
markaðsmöguleika og sem gjarnan
er byggð á gömlum hefðum.
Matvælaiðnaðarmaður
Norðurlanda 2019
Verðlaunin verða veitt
matvælaiðnaðarmanni sem hefur
þróað einstaka gæðaafurð sem
byggist á norrænum hráefnum og
aðferðum.
Matarblaðamaður/Miðlun um
mat 2019
Veitt einstaklingi, sögumanni,
miðli eða útgáfu sem ber út hróður
norrænnar matarmenningar.
Norðurlandaverðlaun fyrir mat
fyrir marga 2019
Veitt einstaklingi eða stofnun sem
hefur unnið mikið starf til að auka
gæði og efla norræna matarmenningu
í opinberum máltíðum.
Mataráfangastaður Norðurlanda
2019
Veitt samtökum, stofnun eða
samfélagi sem hefur sameinað
hráefnisframleiðendur, veitingastaði
og aðra viðkomandi í að efla tiltekinn
stað með matarmenningu, samstarfi
og samvinnu.
Norðurlandaverðlaun fyrir mat
fyrir börn og ungmenni 2019
Verðlaunin verða veitt einstaklingi
eða samtökum sem hafa þróað
hugmynd eða hugmyndafræði sem
stuðlar með marktækum hætti að
því að auka þekkingu og kunnáttu
komandi kynslóða hvað norræn
matvæli og matarmenningu varðar.
Skráning til og með 31. mars
Hægt er að skrá þátttakendur í Emblu
til og með 31. mars. Skráningin er
einföld og fljótleg á vefsíðunni
www.emblafoodawards.com. Þar má
einnig fræðast betur um verðlaunin
og tilurð þeirra. /TB
Óskað er eftir tilnefningum
til Embluverðlaunanna
Fulltrúar sveitarfélaga, fjarskiptasjóðs og ráðuneytisins við undirritun samninga við sveitarfélög um ljósleiðaravæðingu
í dreifbýli.
Ljósleiðaravæðing í dreifbýli:
Samið við 23 sveitarfélög um styrki
Samningar um ljósleiðaravæðingu
gefa 23 sveitar félögum kost á
samtals um 1.475 milljónum króna
í styrki á árunum 2019 til 2021
til þess að tengja með ljósleiðara
allt að 1.700 styrkhæfa staði auk
fjölda annarra bygginga samhliða
sem ekki hljóta styrk.
Eigið framlag sveitarfélags og
íbúa er umtalsvert og að lágmarki
500.000 kr. fyrir hvern tengdan
styrkhæfan stað. Samningar árin
2020 og 2021 eru með fyrirvara
um fjárlög.
Sigurður Ingi Jóhannsson
samgöngu- og sveitarstjórnar-
ráðherra, Páll Jóhann Pálsson,
formaður fjarskiptasjóðs, og
forsvarsmenn sveitarfélaga,
hafa skrifað undir samninga um
samvinnustyrki frá fjarskiptasjóði
og byggðastyrki frá samgöngu-
og sveitarstjórnarráðuneytinu til
ljósleiðaravæðingar sveitarfélaga
í tengslum við landsátakið Ísland
ljóstengt. Fjórtán sveitarfélög eiga
að þessu sinni kost á byggðastyrk
á grundvelli byggðaáætlunar
og 22 sveitarfélög eiga kost á
samvinnustyrk.
Ísland ljóstengt
Styrkveitingarnar miðast við að
tryggja verklok hjá allflestum
sveitarfélögum sem um ræðir og
þar með að náð verði að mestu
leyti markmiði ríkisstjórnarinnar um
ljósleiðaravætt dreifbýli landsins.
Stefnt er að því að lokaúthlutun á
grundvelli Ísland ljóstengt verði
á næsta ári með það að markmiði
að öll áhugasöm sveitarfélög ljúki
lagningu ljósleiðara í dreifbýli fyrir
árslok 2021 hið síðasta.
Verkefnið Ísland ljóstengt hófst
formlega vorið 2016. Er þetta því
fjórða úthlutun fjarskiptasjóðs
og jafnframt þriðja úthlutun
ráðuneytisins á grundvelli byggða-
áætlunar á jafn mörgum árum.
Um sex þúsund styrkhæfir staðir
Útlit er fyrir að verkefnið nái
þegar upp er staðið til um það bil
5.850– 6.000 styrkhæfra staða
um allt land. Með þessum og
fyrri samningum er þegar búið
að semja um 5.750 staði. Hlutfall
styrkhæfra staða sem tengdir verða
í verkefninu öllu stefnir í að verða
vel yfir 90%. /VH
Framleiðnisjóður landbúnaðarins:
Sigríður Bjarnadóttir ráðin framkvæmdastjóri
Starf framkvæmdastjóra Fram­
leiðni sjóðs landbúnaðarins var
auglýst laust til umsóknar um
miðjan janúar. Stjórn Fram­
leiðnisjóðs fékk ráðningar fyrir­
tækið Hagvang í lið með sér og
höfðu starfsmenn þess umsjón
með ráðningarferlinu.
Nú hefur verið gengið frá
ráðningu Sigríðar Bjarnadóttur í
starfið, en Sigríður var valin úr
hópi margra hæfra umsækjenda.
Sigríður er fædd 1967 og hefur lokið
fjölbreyttri menntun og á að baki
margvíslega starfsreynslu. Hún hefur
lokið meistaragráðu í búfjárrækt
frá Landbúnaðarháskólanum á
Ási í Noregi,
BS-gráðu í
hestafræði frá
Háskólanum
á Hólum, auk
búfræðináms
og diplóma-
náms í ferða-
m á l a f r æ ð i
frá Hólum.
Hún hefur
jafnframt lokið kennslu réttinda-
námi á framhaldsskólastigi frá
Háskólanum á Akureyri.
Sigríður starfaði sem ráðunautur
um árabil, m.a. í ýmsum rekstrar-
tengdum verkefnum. Hún hefur
einnig starfað við bókhald og við
mjólkureftirlit hjá MS. Þá hefur
hún starfað sem tilraunastjóri og
sérfræðingur hjá Rannsóknastofnun
landbúnaðarins og hjá Norræna
búfjárgenabankanum á Ási í Noregi.
Sigríður stundar auk þess búrekstur í
Hólsgerði í Eyjafjarðarsveit og hefur
unnið með útgáfu- og kynningarsviði
Bændasamtaka Íslands að verkefninu
Dagur með bónda. Þá er Sigríður
sveitarstjórnarfulltrúi í sveitarstjórn
Eyjafjarðarsveitar.
Sigríður Bjarnadóttir tekur við
starfinu um mitt sumar en mun
sinna afmörkuðum verkefnum fyrir
sjóðinn fram að þeim tíma.
Sigríður Bjarnadóttir.
Ráðstefna Matvælalandsins Íslands:
Hvað má bjóða þér að borða?
Samstarfsvettvangur um Mat­
væla landið Ísland efnir til ráð­
stefnu um sérstöðu íslenskrar
matvælaframleiðslu mið viku­
daginn 10. apríl kl. 10–12 á Hilton
Reykjavík Nordica. Yfirskriftin er
„Hvað má bjóða þér að borða? –
Sérstaða og samkeppnisforskot í
matvæla framleiðslu“.
Gildi sérstöðunnar
Á ráðstefnunni verður fjallað um
gildi sérstöðunnar og þær áskoranir
sem margar þjóðir standa frammi
fyrir í sinni matvælaframleiðslu.
Kröfur um örugg matvæli, fá
sótspor, virðingu fyrir umhverfinu
og auðlindum, bætta lýðheilsu og
heilbrigt búfé munu hafa mikil áhrif
á matvælaframleiðslu um heim allan
á komandi árum.
Fyrirlesari frá FAO
Henk Jan Ormel, ráðgjafi í
dýrasjúkdómum hjá Matvæla- og
landbúnaðarstofnun Sameinuðu
þjóðanna (FAO), fjallar um
tengsl milli matvælaöryggis og
sjúkdóma í mönnum og dýrum
og hvernig haga má baráttu
gegn matarbornum sjúkdómum.
Þá verður fjallað um sérstöðu
íslenskrar matvælaframleiðslu og
hvernig á að sýna fram á hana og
gefin dæmi um hvernig sérstaða
er nýtt í markaðssetningu. Í
lokin verða pallborðsumræður.
Fundarstjóri verður Erna Bjarna-
dóttir, hagfræðingur og aðstoðar-
framkvæmdastjóri Bænda sam-
takanna.
Að Matvælalandinu standa
Samtök iðnaðarins, Bændasamtök
Íslands, Matís, Íslandsstofa,
Samtök ferðaþjónustunnar, Samtök
fyrirtækja í sjávarútvegi, Matar-
auður Íslands og Háskóli Íslands.
Þetta er sjöunda árið í röð sem
Matvælalandið boðar til ráðstefnu
um þau mál sem eru efst á baugi í
matvælageiranum.
Ráðstefnan er öllum opin og
aðgangur er ókeypis. Nánari dagskrá
og skráningu er að finna á vef
Samtaka iðnaðarins, si.is. /TB