Bændablaðið - 28.03.2019, Blaðsíða 46

Bændablaðið | Fimmtudagur 28. mars 201946
Brimborg afhjúpaði nýjan
Citroën C5 Aircross 23. febrúar
síðastliðinn, í kynningu fyrir
frumsýninguna var talað um að
þetta væri jeppi.
Það að Citroën væri að koma með
jeppa vakti forvitni mína á bílnum
þar sem að mér er minnisstætt þegar
finnski rallíkappinn Ari Vatanen
vann sinn fjórða sigur í röð, þá
á nýjum framúrstefnulegum og
fjórhjóladrifnum Citroën í Paris-
Dakarrallíinu 1991.
Alltaf fundist framsætin
í Citroën-bílnum þægileg,
en í þessum eru þau æði
Ég skoðaði bílinn nokkrum dögum
eftir frumsýninguna og varð fyrir
smá vonbrigðum því að bíllinn
var alls ekki fjórhjóladrifinn,
ekki í fyrsta sinn sem ég hef lesið
eitthvað sem var ekki alveg heilagur
sannleikur við lestur á DV.
Ég fékk bílinn til prufuaksturs
helgina 16. til 17. mars og tók góðan
bíltúr á bílnum. Marga bíla hef ég
prófað í gegnum árin og bílarnir
misgóðir, eitt af því sem þarf að vera
sérstaklega gott er ökumannssætið,
í Citroën C5 eru einhver albestu
framsæti í bíl sem ég hef prófað um
ævina. Að keyra bíl og láta nudda á
sér bakið í leiðinni er bara til þess
að bíltúrinn verður aðeins lengri. Séu
sæti góð í bílum er sá sem bílinn
keyrir ánægður jafnvel þó að bíllinn
sé algjört flak.
Síðastliðin 30 ár hefur einn
fjölskyldumeðlimur næstum alltaf
átt góða Citroën-bíla og í þeim öllum
hefur mér fundist framsætin það
besta við Citroën.
Nokkrar misdýrar útgáfur af C5
Bíllinn sem var prófaður er sá
næstdýrasti, nefnist Shine og
kostar 5.630.000, með 180 hestafla
bensínvél, sjálfskiptur með átta
þrepa sjálfskiptingu.
Uppgefin eyðsla í prufubílnum er
5,7 lítrar á hundraðið í blönduðum
akstri, en ég var töluvert fyrir ofan
það því að ég var ekkert að spara
hægri fótinn, enda skemmtileg
snerpa og viðbragð í 180 hestafla
mótornum.
Ódýrasti C5 nefnist Live og
kostar beinskiptur frá 3.890.000,
en miðbíllinn nefnist Feel og er á
verði frá 4.190.000.
Live kemur á 17 tommu felgum
og er með varadekk. Feel kemur á
18 tommu felgum og er líka með
varadekk, en Shine-bílarnir eru á
19 tommu felgum og hafa ekkert
varadekk. Svolítið undarlegt að
maður borgar mikið og fær minna
með dýrasta bílnum.
Nítján tommu felgurnar eru
ekki skemmtilegar á malarvegi
og á hraðahindrunum sem kallast
„hattar“. Hins vegar skemmtilega
mjúkur á hefðbundnum hraða-
hindrunum. Á móti kemur að 19
tommu felgurnar eru æðislegar
á góðu malbiki, sérstaklega í
beygjum.
Prufuaksturinn
Fyrst var bíllinn prófaður í
innanbæjarakstri og var lipur við
þröngar aðstæður, snöggur af stað
og þægilegur sem „borgarbíll“.
Næst var það hringur í kringum
Hafravatn þar sem er holóttur
malarvegur. Hörð 19 tommu
dekkin gefa litla sem enga fjöðrun
á holóttum malarveginum og bíllinn
jós drullunni full mikið upp á
afturhlerann. Þá var bíllinn að höggva
leiðinlega mikið í dæmigerðum
holum á malarveginum. Í þessu
tilfelli hefði ég frekar viljað vera
á ódýrasta C5 bílnum sem að mínu
mati hentar betur á malarvegum þar
sem hann er á 17 tommu felgum með
dekk með hærri prófíl sem gefa
betur eftir á malarvegi. Sennilega
er það að hluta til vegna harðra
dekkjanna að bíllinn var aðeins laus
að aftan á malarveginum, en að öðru
leyti virkaði fjöðrunin vel á möl.
Margir góðir punktar
og fáir mínusar
Af því góða í bílnum eru framsætin
númer 1, einfaldlega slá öllum
öðrum framsætum við. Mikið vildi
ég að vinnubíllinn minn væri með
svona sæti.
Hægt er að stilla sjálfskiptinguna
á fjóra mismunandi vegu, venjulegan
akstur, snjó, sand og drullu. Eina
stillingin sem ég fann mun á var
snjóstillingin þar sem að bíllinn tók
mýkra á í snjónum með þá stillingu.
Blindhornsvarinn í speglunum er
með rautt ljós þegar bíll er á blinda
horninu sem mér finnst betra heldur
en guli liturinn sem er í flestum
öðrum bílum.
Akreinalesarinn les ótrúlega
ógreinilegar línur í vegköntunum
og ef maður er að nálgast aðra hvora
línuna beygir bíllinn sjálfkrafa inn
á miðju vegarins. Næstum hægt að
láta bílinn stýra sjálfan með því að
sleppa stýrinu, en strax og stýrinu
er sleppt kvartar mælaborðið með
ljósi og hljóði.
Eftir því sem leið á prufuaksturinn
var ég alltaf sáttari og sáttari við
bílinn og eftir 135 km akstur á
bílnum var ég orðinn nokkuð
sáttur við bílinn, fyrir utan 19
tommu felgustærðina sem höggva
leiðinlega mikið við hverja holu og
malbiksskemmd.
Eini mínusinn er að ekkert varadekk
er í bílnum, tjakkur eða felgulykill
þannig að á dýrustu útgáfunni er
maður algjörlega bjargarlaus ef maður
heggur í sundur dekk í dæmigerðri
malbiksskemmd sem eru svo algengar
á þessum tíma árs.
Persónulega hefði dugað
mér ódýrasti bíllinn, sex gíra
beinskiptur, 130 hestöfl, svo lengi
sem að framsætin séu þau sömu og
í bílnum sem ég prófaði, og kostar
ekki nema 3.890.000 og kemur á
felgum og dekkjum sem fjaðra betur
og varadekki í skottinu. Ég verð að
bíða eitthvað eftir fjórhjóladrifnum
Citroën-jeppling, en þó að þessi C5
líkist jeppling er hann fólksbíll í
mínum skilningi.
VÉLABÁSINN
Hjörtur L. Jónsson
liklegur@internet.is
Framdrifinn nýr Citroën C5
Citroën C5, flott litasamsetning. Myndir / HLJ
Svolítill sóði á sjálfan sig á möl. Tuttugu og þrír sentímetrar upp í lægsta punkt.
Gerir bíltúrinn enn unaðslegri að vera með baknudd í
framsætunum.
Sætið góða með öllum sínum unaðslegu tökkum.
Tvískipt bakkmyndavélin, sniðugt fyrirkomulag.
Hægt að hlaða vissa síma án snúru
á þar til gerðum stað.
Lengd 4.500 mm
Hæð 1.689 mm
Breidd 2.090 mm
Hæ undir lægsta punkt 230 mm
Helstu mál og upplýsingar