Fréttablaðið - 27.11.2020, Side 32

Á fundi skipulags- og samgönguráðs þann 18. nóvember 2020 var lögð fram lýsing að nýju deiliskipulag
fyrir lóðina nr. 1 við Lækjargötu, lóð forsætisráðuneytisins og stjórnarráðshússins, vegna áforma um
viðbyggingu við Stjórnarráðshúsið fyrir starfsemi forsætisráðuneytisins.
Lýsing var samþykkt til kynningar og umsagnar með vísan til 1. mgr. 40. gr. skipulagslaga nr. 123/2010.
Óskað er eftir að ábendingar/umsagnir berist eigi síðar en 18. desember 2020.
Lýsingin er aðgengileg á vef Reykjavíkurborgar, reykjavik.is undir skipulag í kynningu.
Umhverfis- og skipulagssvið Reykjavíkur
Skrifstofa borgarstjóra
Skrifstofa borgarstjóra
Borgarverkfræðingur
Borgarverkfræðingur
Hagdeild
Hagdeild
Dagvist barna
Dagvist barna
Reykjavíkurborg
Umhverfis- og skipulagssvið
Lækjargata 1
Skipulagslýsing vegna nýs deiliskipulags

Borgartúni 12-14, 105 Reykjavík, sími: 411 1111, www.reykjavik.is
2 7 . N Ó V E M B E R 2 0 2 0 F Ö S T U D A G U R30 S P O R T ∙ F R É T T A B L A Ð I Ð
SPORT
FÓTBOLTI Matias Morla, lögmaður
og vinur argentínska knattspyrnu­
mannsins Diego Armando Mara­
dona, tilkynnti það í samtali við
argentínska fjölmiðla í gær að fjöl­
skylda Maradona myndi leita réttar
síns vegna andláts hans.
Þannig telja skyldmenni hans
að heilbrigðisþjónustunni sem
Maradona fékk eftir að hann fékk
hjartaáfall í svefni hafi verið svo
ábótavant að það sé saknæmt.
Morla telur að Maradona hafi
átt að vera undir meira eftirliti en
raun bar vitni eftir að hafa farið í
aðgerð vegna blóðtappa í heila fyrir
nokkrum vikum.
Morla telur að f lytja hefði átt
Maradona á sjúkrahús tólf klukku­
stundum áður en hann lést. Þá sé
það mikil vanræksla að það hafi
tekið sjúkrabílinn um það bil hálf­
tíma að mæta á heimili Maradona
eftir að tilkynning barst um hjálp­
arbeiðni þaðan.
Maradona sem er goðsögn í Arg­
entínu var sextugur þegar hann
lést en Alberto Fernández, forseti
landsins, hefur lýst yfir þriggja daga
þjóðarsorg þar í landi. – hó
Vilja rannsókn
á andláti Diego
KÖRFUBOLTI Ísland náði í lífsnauð­
synleg tvö stig þegar liðið mætti
Lúxemborg í þriðju umferð í for­
keppni fyrir HM 2023 í körfubolta
karla en leikið var í Bratislava í Slóv­
akíu í gær. Fyrir fram var búist við
nokkuð þægilegum sigri íslenska
liðsins en Lúxemborg var án stiga
eftir fyrstu tvo leiki sína í forkeppn­
inni gegn Kósovó og Slóvakíu.
Lúxemborg hóf leikinn af miklum
krafti og var fjórum stigum yfir,
38­34, eftir fyrri hálfleikinn. Skot­
nýting íslenska liðsins var slök
framan af leik og erfiðlega gekk að
finna Tryggva Snæ Hlinason undir
körfunni.
Það var svo um miðbik þriðja leik­
hluta sem Ísland náði að snúa tafl­
inu sér í vil. Umdeilanleg tæknivilla
á Elvar Má Friðriksson hleypti illu
blóði í leikmenn íslenska liðsins og
náðu þeir að nýta mótlætið sér í vil
í stað þess að brotna. Hörður Axel
Vilhjálmsson skoraði í kjölfarið sjö
stig í röð með tveimur þriggja stiga
skotum og stigi af vítalínunni.
Góður kaf li Íslands það sem
eftir lifði þriðja leikhluta lagði svo
grunninn að öruggum sigri íslenska
liðsins í Slóvakíu. – hó
Torsóttur sigur
á Lúxemborg
Elvar Már átti góðar rispur í liði Ís-
lands í gær. FRÉTTABLAÐIÐ/ERNIR
Maradona stýrði liði Argentínu á
HM árið 2010. FRÉTTABLAÐIÐ/GETTY
FÓTBOLTI Ísland sótti dýrmæt þrjú
stig þegar liðið lék við Slóvaka í
næstsíðustu umferð í undankeppni
EM 2022 í knattspyrnu kvenna í
Bratislava í gærkvöldi. Það blés
reyndar ekki byrlega fyrir íslenska
liðinu í fyrri hálf leik en Slóvakar
komust sanngjarnt yfir um miðbik
fyrri hálfleiks.
Lítið gekk í uppspili íslenska liðs­
ins framan af leik og pressa liðsins
var máttlaus allan fyrri hálfleikinn.
Smá líf færðist í leikmenn Íslands
undir lok fyrri hálfleiks og Ingibjörg
Sigurðardóttir og Berglind Björg
Þorvaldsdóttir gerðu sig þá líklegar
fyrir framan slóvakíska markið.
Þar er svo ljóst að Jón Þór Hauks­
son náði að kveikja vel í liðinu með
hálfleiksræðu sinni en það var allt
annað að sjá íslenska liðið í seinni
hálfleik. Það var mun meira skipu­
lag og ákefð í hápressu liðsins auk
þess sem sóknaruppbyggingin var
mikið markvissari. Góð byrjun
íslenska liðsins á upphafsmínútum
seinni hálfleiks var reyndar trufluð
þegar rafmagnið sló út á vellinum í
Bratislava.
Það sló hins vegar ekki leikmenn
Íslands út af laginu og Berglind
Björg Þorvaldsdóttir, sem hóf leik­
inn með Elínu Mettu Jensen í fram­
línu íslenska liðsins, jafnaði metin
eftir klukkutíma leik. Agla María
Albertsdóttir, sem var einn þeirra
leikmanna sem vöknuðu hressilega
til lífsins í hálfleik, fann Berglindi
Björgu sem skoraði.
Sara Björk Gunnarsdóttir sá svo
til þess að Ísland færi með sigur af
hólmi með tveimur mörkum úr
vítaspyrnum. Sara Björk náði í fyrra
vítið sjálf og Elín Metta það síðara.
Eftir mörkin hjá fyrirliðanum var
aldrei spurning hvoru megin sigur­
inn myndi enda og íslenska liðið
hefði hæglega getað bætt f leiri
mörkum við.
Með þessum tveimur mörkum er
Sara Björk orðinn fimmta marka­
hæsta landsliðskonan í sögunni
með 22 mörk. Hún varð leikjahæsti
leikmaðurinn í sögunni í tap­
leiknum gegn Svíþjóð á dögunum
en Sara tók það met af Katrínu
Jónsdóttur. Landsliðsfyrirliðinn
skaust svo upp fyrir Katrínu á list­
anum yfir markahæstu leikmenn
sögunnar með mörkunum tveimur
í gær. Nú vantar Söru eitt mark til
þess að komast upp að hlið Ást­
hildar Helgadóttur í fjórða sæti á
þeim lista og sjö mörk til þess að
jafna Dagnýju Brynjarsdóttur sem
er í þriðja sæti á listanum. Hún á þó
enn langt í markametið sem er í eigu
Margrétar Láru Viðarsdóttur sem
skoraði 79 mörk fyrir landsliðið.
Þessi sigur geirneglir það að
Ísland mun enda í öðru sæti í riðli
sínum en liðið hefur 16 stig fyrir
lokaumferð riðlakeppninnar þar
sem íslenska liðið er sex stigum á
undan Slóvakíu fyrir lokaumferð­
ina. Fyrir leikinn átti Slóvakía veika
von um að stela sætinu af Íslandi og
virtist sá draumur ætla að lifa þar
til íslenska liðið vaknaði til lífsins í
Bratislava í gær og gerði út um vonir
Slóvaka.
Ísland mætir Ungverjalandi í
lokaumferðinni í Búdapest á þriðju­
daginn kemur. Það kemur í ljós eftir
þann leik hvort annað sætið fleytir
íslenska liðinu beint í lokakeppni
Evrópumótsins sem leikin verður
í Englandi eða liðið þurfi að fara í
umspil um laust sæti á mótinu. Það
veltur bæði á úrslitum í leik Íslands
og Ungverjalands sem og hvernig
leikir fari í öðrum riðlum undan­
keppninnar.
Misjafnt er hversu margar umferð­
ir hafa verið leiknar í riðlunum níu
í undankeppninni og því erfitt að
lesa í stöðuna fyrir lokaumferðina
eins og sakir standa. Þau þrjú lið
með bestan árangur í öðru sæti í
riðlunum níu í undankeppninni fá
farseðil beint til Englands á meðan
hin liðin sex sem hafna í öðru sæti
fara í umspil um síðustu þrjú sætin á
mótinu. Einn af leikjunum sem fylgj­
ast þarf með er leikur Frakklands og
Austurríki í dag en línurnar ættu að
skýrast eftir leik Íslands á þriðju­
daginn. Sama dag mætast Ítalía og
Danmörk annars vegar og Sviss og
Belgía hinsvegar sem eru í baráttu
við Ísland um stigahæsta liðið í öðru
sæti undankeppninnar.
hjorvaro@frettabladid.is
Sara skaut Íslandi í umspilið
Stelpurnar okkar eru öruggar með annað sætið í riðli sínum í undankeppni EM 2022 eftir sigur gegn
Slóv akíu í gær. Það ræðst í lokaumferðinni hvort það dugi Íslandi fyrir farseðli í lokakeppni mótsins. 
Þegar á hólminn var komið var það landsliðsfyrirliðinn Sara Björk sem tók af skarið í liði Íslands.FRÉTTABLAÐIÐ/VALLI
Mörk Söru Bjarkar í gær
voru hennar fyrstu fyrir
Íslands hönd í átján mánuði.