Lögmannablaðið - 2020, Blaðsíða 6

6 LÖGMANNABLAÐIÐ TBL 01/20
AF VETTVANGI
FÉLAGSINS
Um langa hríð hafa tafir á afgreiðslu fjölskyldumála
hjá sýslumanninum á höfuðborgarsvæðinu verið hreint
óviðunandi en biðtími eftir þjónustu er að jafnaði átta
mánuðir frá því erindi berst þar til það er tekið til afgreiðslu
innan embættisins. Ef aðkomu sáttamanna skv. 33. gr. a
barnalaga er þörf tekur við önnur eins bið eða að jafnaði
átta mánuðir til viðbótar. Á vefsíðu sýslumannsembættisins
kemur meðal annars fram að nú í febrúar 2020 hafi erindi
sem varða umgengni, forsjá, lögheimili, meðlag, sérstakt
framlag og menntunarframlag, og bárust fyrir 20. júní 2019,
verið tekin til umfjöllunar og mál sem vísað hafi verið í
sáttameðferð fyrir 25. júní 2019 hafi sömuleiðis verið tekin
til umfjöllunar hjá sáttamönnum.
Í apríl 2019 sendi stjórn Lögmannafélagsins bréf til
sýslumannsins á höfuðborgarsvæðinu þar sem gerðar voru
alvarlegar athugasemdir vegna þess ófremdarástands sem
ríkt hefur í afgreiðslu fjölskyldumála hjá embættinu. Í
bréfi félagsins sem þáverandi dómsmálaráðherra fékk afrit
af, segir meðal annars að fyrir liggi um afar viðkvæman
málaflokk sé að ræða þar sem miklu skipti að mál séu
afgreidd með skjótum hætti. Jafnframt segir í umræddu
bréfi að margra mánaða bið á afgreiðslu svo brýnna mála
sé að mati félagsins óásættanleg stjórnsýsla og þess krafist
að gripið verði til viðeigandi ráðstafana til úrbóta. Í janúar
s.l. sendi umboðsmaður Alþingis bréf til dómsmálaráðherra
þar sem óskað er upplýsinga um hvort ráðuneytið hafi í
hyggju eða hafi þegar gripið til aðgerða til að bregðast
við þeim vanda sem uppi er hjá embætti sýslumannsins
á höfuðborgarsvæðinu og varðar tafir á afgreiðslu
fjölskyldumála. Stjórn Lögmannafélagsins mun fylgja þessu
máli eftir og hefur þegar sent dómsmálaráðherra bréf og
óskað eftir viðbrögðum hans í kjölfar bréfs umboðsmanns
Alþingis.
____________
Innan Lögmannafélags Íslands hefur nú um nokkurt skeið
verið unnið að endurskoðun á lögum um lögmenn og
hafa nokkrar tillögur þess efnis verið sendar ráðuneyti
dómsmála. Þær tillögur hafa ekki náð hljómgrunni til
þessa. Nú hyggst dómsmálaráðherra leggja fram frumvarp
um breytingar á lögum um lögmenn en tilurð þeirra
breytinga má rekja til krafna frá FATF (Financial Action
Task Force) um skyldur lögmanna er lúta að peningaþvætti
og fjármögnun hryðjuverka. Félagsmenn verða upplýstir um
framvindu þess máls þegar frekari upplýsingar liggja fyrir.
______________
Töluverðar umræður hafa verið meðal félagsmanna hvort
það samræmist góðum lögmannsháttum að lögmenn mæti
á slysstaði, bráðamóttökur eða þvílíka staði í því skyni að
bjóða fram þjónustu sína. Samkvæmt 42. gr. siðareglna
lögmanna er lögmanni heimilt að auglýsa og kynna sína
þjónustu svo sem samrýmist góðum lögmannsháttum.
Hingað til hefur ekki þótt ástæða til að útfæra nánar hvað
teljist til góðra lögmannshátta í þessu tilliti en að gefnu
tilefni hefur stjórn Lögmannafélagsins nú beint því til
siðareglunefndar félagsins að taka til skoðunar hvort tilefni
sé til breytinga á siðareglum lögmanna að þessu leyti og
tilgreina nánar inntak góðra lögmannshátta.
_________________
Hæstiréttur Íslands varð hundrað ára hinn 16. febrúar s.l.
og hélt dómstóllinn veglega afmælishátíð af því tilefni.
Vegna hinna merku tímamóta færði Lögmannafélag Íslands
Hæstarétti að gjöf verkið „Hugur“, sem er bronssteypa af
höfði gerð af listamanninum Helga Gíslasyni.
Stofnun Hæstaréttar hinn 16. febrúar 1920 markaði
tímamót í réttarsögu þjóðarinnar og á þeim eitt hundrað
árum sem liðin eru hefur Hæstiréttur Íslands verið kjölfesta
réttarskipunar og þróunar. Lögmannafélag Íslands færir
Hæstarétti Íslands góðar kveðjur og árnaðaróskir í tilefni
aldarafmælisins.
BERGLIND SVAVARSDÓTTIR LÖGMAÐUR
FORMAÐUR