Börn og menning - 01.04.2012, Qupperneq 35

Hann finnst mér fólginn í þeim hugmyndum
um virkjun innri afla sem krauma stöðugt
undir yfirborði textans. Jinghua hemur til
dæmis hatur sitt í garð eftirlitskonunnar
Li með því að ímynda sér að það sé
glæsileg orkídea sem hún nostri við. Það
hljómar kannski öfugsnúið að tala um það
á jákvæðum nótum að rækta hatur en
aðstæður Jinghua eru öfgafullar og kannski
er það einmitt það sem bjargar henni að
geta beint því í ákveðinn farveg. Hugmyndin
um orkídeuna veitir í senn nauðsynlega útrás
fyrir erfiðar tilfinningar og gefur um leið
aukinn styrk. Hann notar hún til að vinna
að því sem skiptir mestu máli: að komast
burtu. Ari virðist upplifa eitthvað svipað á
ögurstundu í sínu lífi:
„Ari vissi ekki nákvæmlega hvað það
var sem fékk hann til að ákveða
að fara aftur ( skólann. Það var
bara eitthvað sem gerðist þarna við
kvöldverðarborðið [...] Honum fannst
eins og allt ( kringum hann væru
hlutir að gerast sem einhverjir aðrir
stjórnuðu, hann lét aldrei neitt gerast,
hann varð fyrir hlutum sem einhver
annar hafði sett af stað. Og hann var
orðinn hundleiður á því!
Ari gekk inn í skólann og honum
fannst eins og hann gengi fyrir nýjum
orkugjafa. Allt óöryggið og vanlíðan
hafði vikið fyrir eldsneytínu sem brann
í honum. Hann var búinn að kveikja í
kjaftasögunni sem átti að spæla hann.
Hún var að brenna upp og verða að
engu." (s. 134)
Hann finnur áður óþekktan kraft og ákveður
að nota hann til að taka völdin yfir eigin
lífi. Eldfjallið Katla, frænka hans, virðist svo
gera fátt annað en að virkja eigin orku og
beina henni í gagnlega farvegi eins og að
bjarga heiminum - eða alla vega eins og
einu barni. Sýndarveruleiki WuX er svo enn
ein birtingarmynd þessa stefs en þar velja
þátttakendur sér hverju af frumöflunum
fimm þeir vilja þjóna og hafa í sinni þjónustu,
vatn, eld, jörð, við eða málm. Þessa krafta
er svo hægt að nota til bæði góðs og ills.
Þegar hæst lætur sendir Varun til dæmis
gjöreyðandi flóðbylgju yfir allt umhverfið en
Sandor og Aponi taka höndum saman og
nýta mátt eldsins og jarðarinnar á skapandi
hátt, búa til gríðarstóran gíg sem þau leiða
vatnssvelginn í til að gera hann óskaðlegan.
Þannig er stefið um að beisla krafta og
beina þeim í ákveðinn farveg leikið í ólíkum
útgáfum á öllum sviðum bókarinnar. Og
ég verð að segja að fyrir mína parta get ég
varla ímyndað mér öflugri eða mikilvægari
skilaboð í unglingabók. Ég vona að sem
flest orkumikil ungmenni muni lesa Með
heiminn í vasanum og upplifa að þau búi yfir
ofurkröftum sem þau geti virkjað og nýtt,
hvort sem það er til að takast á við flóknar
aðstæður í einkalífinu - eða bjarga eins og
250 milljón börnum.
Höfundur er bókmenntafræðingur