Skessuhorn - 21.04.2021, Blaðsíða 10

MiðVikudAGur 21. ApríL 202110
Síðastliðinn föstudag var gengið frá
sölu á hinum rótgróna Hreðavatns-
skála í Borgarfirði. Lítil starfsemi
hefur verið í húsunum síðustu árin
en nú verður breyting þar á. kaup-
endur eru ungt par sem býr og starf-
ar í sveitinni, þau Adam Logi og
Hera Jóhannsdóttir. Hreðavatns-
skáli er á fjögurra hektara eign-
arlandi en auk veitingaskálans er
gistihús á lóðinni, tankar fyrir elds-
neyti fylgja fasteigninni og í brekk-
unni ofan við skálann er íbúðarhús
og tvö sumarhús. Aðspurð segja þau
Adam og Hera að kaupverðið sé 86
milljónir króna og sé það ásættan-
legt verð í ljósi þess að framundan
eru töluvert miklar lagfæringar á
húsum með það fyrir augum að þar
verði hægt að opna veitingastað og
gistiþjónustu í sumar. unga fólkið
mun sjálft ekki reka skálann en það
munu hins vegar foreldrar Heru
gera, þau Brynja Brynjarsdóttir og
Jóhann Harðarson, ferðaþjónustu-
bændur á Hraunsnefi sveitahóteli.
Samreka tvo staði
í Norðurárdal
Blaðamaður Skessuhorns hitti nýja
kaupendur og verðandi rekstrar-
aðila í Hreðavatnsskála síðastlið-
inn föstudag. Fyrr um daginn hafði
verið gengið frá kaupunum og voru
nýir eigendur fullir tilhlökkunar að
skoða húsin sem slíkir í fyrsta skipti.
Nú ætlar fjölskyldan frá Hraunsnefi
að spýta í lófana því framundan eru
miklar lagfæringar á húsnæðinu til
að hægt verði að opna eftir rétta
tvo mánuði. „Við stefnum ótrauð á
að opna hér veitingasölu, nýlendu-
vöruverslun og hostel 16. júní í
sumar. Þann dag verða rétt 16 ár frá
því við tókum á móti fyrstu nætur-
gestunum á Hraunsnefi sveitahót-
eli,“ segir Brynja. Hún segir að fyr-
irkomulagið verði þannig að þótt
unga fólkið eigi húseignir og lóðina
að þá muni Hraunsnef sveitahótel
taka allan rekstur af þeim á leigu.
„Við stefnum á að samreka þessa tvo
staði; Hraunsnef og Hreðavatns-
skála en hvor um sig haldi þó sínum
sérkennum. Hér í Hreðavatnsskála
er hugmyndin að bjóða upp á létt-
ar veitingar og að hér geti ferðafólk
átt stutt stopp í mat og drykk. Mat-
urinn sem hér verður seldur verð-
ur forunninn í eldhúsinu á Hrauns-
nefi og við munum leggja áherslu
á að nýta allt það hráefni sem við
framleiðum sjálf, eins og við höfum
gert á veitingastaðnum okkar. Með
því að maturinn verður forunninn
á Hraunsnefi erum við að draga
úr starfsmannaþörf hér í skálan-
um. Veitingarnar hér verða í anda
Food Truck veitingastaða, ódýrari
matur og öðruvísi en það sem við
erum með á matseðlinum okkar á
Hraunsnefi.“
Hostel og hótel
Brynja segir að þau ætli einnig að
opna litla nýlenduvöruverslun þar
sem fólk á ferð um þjóðveginn en
ekki síður þeir sem dvelja í sum-
arhúsum í nágrenninu og á Bif-
röst geti keypt það helsta. „Varð-
andi gistiþjónustuna munum við
í gegnum Hraunsnef sveitahótel
bjóða upp á Hostel gistingu hér í
Hreðavatnsskála. Þannig samnýt-
um við bókunarkerfi og vonumst til
að í því felist samlegðaráhrif. Við
bjóðum þannig upp á tvenns kon-
ar gistingu, á hóteli og svo ódýr-
ari gistingu hér,“ segja þau Brynja
og Jóhann. Þau segja reksturinn
á Hraunsnefi hafa verið að ganga
ágætlega, auðvitað ef undan er skil-
inn sá tími sem allt var lokað vegna
Covid-19. Nú sé hins vegar ástand-
ið að batna, vel er bókað á hótel-
ið hjá þeim um helgar og mikið að
gera í veitingasölu og frekar bjart
útlit með sumarið.
Flytja í nýja húsið sitt
Þau Adam Logi og Hera eignuðust
sitt annað barn fyrir tæpum tveimur
mánuðum en fyrir eiga þau tveggja
ára dóttur. Adam Logi starfar sem
bústjóri á fuglabúinu á Svartagili þar
sem þau hafa einnig átt sitt heim-
ili en nú ætlar unga fjölskyldan að
flytja í íbúðarhúsið ofan við Hreða-
vatnsskála. Adam mun þó áfram
starfa við Svartagilsbúið. Hera segist
hins vegar ætla að opna litla sauma-
stofu í þeim hluta skálans sem kall-
aður er Búðin en það er nýjasti hluti
skálans.
Þurfa að taka
til hendinni
Jóhann Harðarson segir að fjöl-
skyldan hafi af alvöru byrjað að velta
fyrir sér kaupum á Hreðavatnsskála
í janúar á þessu ári en ýmislegt orðið
til þess að ekki hafi orðið af kaupun-
um fyrr en nú. „Okkur grunaði að af
þessum kaupum yrði engu að síður
og höfum nýtt tímann til að ákveða
hvernig húsnæðið verður nýtt og
hvað við byrjum að gera upp,“ seg-
ir Jóhann en Hraunsnefsbændur
eru engir nýgræðingar í lagfæring-
um gamalla húsa. Þegar þau keyptu
jörðina Hraunsnef var til dæmis
fjárhúsum og áburðarkjallara breytt
í hótel og veitingastað og önnur hús
ýmist lagfærð eða rifin og ný byggð
í staðinn. „Það er margt sem þarf að
laga hér í skálanum. Við þurfum að
mála og gera við margt enda hef-
ur húsið staðið lítið notað síðustu
árin og margir haft hér rekstur þar
á undan í misstuttan tíma. Við fjöl-
skyldan reiknum með að hjálpast að
við lagfæringar og erum nú að bæta
við okkur starfsfólki til að ná mark-
miði okkar um opnunardag. Stefn-
an er sú að taka einungis tvo mánuði
í hreinsun og lagfæringar og opna
á deginum okkar 16. júní í sumar,“
segir Jóhann.
Endurvekja
ballstemninguna
Vörumerkið Hreðavatnsskáli er að
stofni til frá árinu 1933 þegar Vigfús
Guðmundsson opnaði fyrst sölu-
skála við þjóðveginn, nokkru neðar í
hrauninu skammt frá þeim stað sem
háskólaþorpið er nú. Eftir að síð-
ari heimsstyrjöldinni lauk var starf-
semin flutt og skálinn byggður á nú-
verandi stað. Byggingarefnið var að
hluta fengið úr hermannaskála sem
lokið hafði hlutverki sínu. Eftir það
hefur oft verið byggt við skálann
og húsið lagfært. Gamla danshúsið
er hins vegar horfið, var rifið þegar
þjóðvegurinn var færður lítið eitt frá
skálanum fyrir nokkrum árum.
En nýir rekstraraðilar í Hreða-
vatnsskála hafa þann draum að end-
urvekja ballstemninguna, sem skál-
inn er ekki hvað síst þekktur fyrir
hjá þeim sem komnir eru um eða
yfir miðjan aldur. „Hingað ætlum
við að fá tónlistarfólk og hugsan-
lega slá upp samkomum að sveita-
ballasið. í ferðaþjónustu þarf alltaf
að huga að fjölbreytni afþreying-
ar og okkur finnst það heillandi að
geta boðið upp á lifandi tónlist. Við
erum meira að segja búin að kaupa
okkur litla rútu þannig að við get-
um til dæmis boðið þeim sem gista á
Hraunsnefi sveitahóteli skutl niður í
skála; í dans og veitingar og svo skutl
heim að balli loknu. í það minnsta
eru möguleikarnir fjölmargir sem
opnast hjá okkur með þessari nýju
aðstöðu til viðbótar við þá starfsemi
sem við höfum verið með undan-
farin 16 ár,“ segja þau Brynja og Jó-
hann ferðaþjónustufólk á Hrauns-
nefi og Hreðavatnsskála.
mm
Auglýsing um ball sem haldið var í Hreðavatnsskála um hvítasunnuhelgina 2013,
á 80 ára afmæli skálans. Nú er draumur nýrra rekstraraðila að endurvekja ball-
stemninguna.
Hafa keypt Hreðavatnsskála og hefja rekstur í sumar
Nýir eigendur og rekstraraðilar í Hreðavatnsskála; Brynja og Jóhann; Hera og Adam Logi með börnin sín.
Adam Logi og Hera með börnin sem nýverið urðu tvö. Lyklana fengu þau afhenta
á föstudaginn þegar gengið hafði verið frá kaupunum.
Hreðavatnsskáli í dag.