Morgunblaðið - 18.06.2021, Blaðsíða 27

Ljósmynd/Hákon Þór Svavarsson
81 Sigurður íhugar að leggja byss-
una á hilluna eftir farsælan feril.
„Ég hef ekki gert upp hug minn
varðandi framtíðina í skotfimi,“
sagði Sigurður Unnar Hauksson,
landsliðsmaður í skotfimi og marg-
faldur Íslandsmeistari í greininni, í
Dagmálum, frétta- og menningar-
lífsþætti Morgunblaðsins.
Sigurður Unnar, sem er 26 ára
gamall, kemur úr mikilli veiði-
fjölskyldu og hann fór í sinn fysta
veiðitúr eins árs. Áhuginn á skotfimi
kviknaði út frá veiðiáhuganum og
hann byrjaði að æfa skotfimi með
haglabyssu þegar hann var fimmtán
ára en undanfarin ár hefur hann
gert lítið annað en að keppa fyrir Ís-
lands hönd á erlendri grundu. Þá á
hann Íslandsmetið í greininni í ung-
lingaflokki, fullorðinsflokki og í liða-
keppni en hann er sem stendur í 81.
sæti heimslistans.
„Þetta er dýrt sport og ég get ekki
staðið undir þessu sjálfur eins og
staðan er í dag,“ sagði Sigurður.
„Ég er 26 ára gamall og búinn
með tvær háskólagráður. Ég sé
fram á að mennta mig meira eftir
sumarið og kannski er þetta fínn
tímapunktur til þess að fara að sinna
öðrum hlutum í lífinu. Á sama tíma
finnst mér þetta ennþá ótrúlega
gaman en ég get líka horft mjög
sáttur til baka. Ég hef afrekað allt
sem hægt er að afreka hér á landi en
auðvitað vill maður líka geta borið
sig saman við þá bestu alþjóðlegum
vettvangi.“
Getur ekki staðið undir þessu sjálfur
ÍÞRÓTTIR 27
MORGUNBLAÐIÐ FÖSTUDAGUR 18. JÚNÍ 2021
_ Bjarki Már Elísson skoraði níu mörk
fyrir Lemgo þegar liðið vann 35:31-
útisigur gegn Erlangen í þýsku 1. deild-
inni í handknattleik í gær. Bjarki var
markahæsti leikmaður vallarins en
hann er í þriðja sæti yfir markahæstu
leikmenn deildarinnar með 221 mark í
35 leikjum. Ómar Ingi Magnússon,
Magdeburg, er markahæsti leikmaður
deildarinnar með 247 mörk og Marcel
Schiller, Göppingen, er í öðru sæti
með 242 mörk þegar þremur umferð-
um er ólokið í Þýskalandi.
_ Haraldur Franklín Magnús komst
ekki í gegnum niðurskurðinn á Chal-
lenge de Espana-mótinu á Áskor-
endamótaröð Evrópu í golfi í Cadíz á
Spáni. Haraldur náði sér ekki á strik á
fyrsta hring sem hann lék á 75 högg-
um, þremur höggum yfir pari. Hann
gerði mun betur á öðrum hring, lék á
69 höggum og lauk því leik á parinu.
_ Spænski tennisleikarinn Rafael
Nadal hefur dregið sig úr keppni á
Wimbledon-mótinu á Englandi og mun
sömuleiðis ekki taka þátt í Ólympíu-
leikunum í Tókýó í Japan sem hefjast
23. júlí. Kvaðst hann þurfa á hvíld að
halda eftir langt og strangt tímabil.
Nadal hefur lengi verið á meðal
fremstu tennisleikara heims.
_ Hlynur Bergsson, kylfingur úr GKG,
er úr leik á Opna breska áhugamanna-
mótinu í golfi í Inverness í Skotlandi
eftir tap gegn Skotanum Calum Scott
í 32 manna úrslitum mótsins í gær-
morgun. Scott hafði betur á 19. holu
eftir bráðabana en Hlynur sigraði
Wales-verjann Matt Roberts í fyrstu
umferð útsláttarkeppninnar í fyrra-
dag.
_ Knattspyrnumaðurinn Sergio Ram-
os mun yfirgefa Real Madrid um
næstu mánaðamót eftir 16 ára dvöl hjá
félaginu, en samningur hans rennur út
í lok mánaðarins. Ramos, sem er 35
ára, mun róa á önnur mið eftir að hafa
gengið til liðs við félagið frá Sevilla að-
eins 19 ára gamall árið 2005. Óhætt er
að segja að hann hafi verið sigursæll
hjá félaginu, þar sem hann vann Meist-
aradeild Evrópu fjórum sinnum og
spænsku 1. deildina fimm sinnum.
Hann á að baki
671 leik fyrir
félagið í öllum
keppnum þar
sem hann hef-
ur skorað 101
mark.
Eitt
ogannað
HANDKNATTLEIKUR
Seinni úrslitaleikur karla:
Ásvellir: Haukar – Valur...................... 19.30
KNATTSPYRNA
1. deild karla, Lengjudeildin:
Hásteinsvöllur: ÍBV – Fjölnir .................. 18
SaltPay-völlur: Þór – Kórdrengir............ 18
Grindavík: Grindavík – Grótta ............ 19.15
Varmá: Afturelding – Selfoss .............. 19.15
2. deild karla:
Ásvellir: Haukar – Njarðvík..................... 18
2. deild kvenna:
Grýluvöllur: Hamar – Álftanes ........... 19.15
Þróttarvöllur: SR – KH ....................... 19.15
Framvöllur: Fram – KM...................... 19.15
Í KVÖLD!
HANDBOLTINN
Jóhann Ingi Hafþórsson
johanningi@mbl.is
Valur og Haukar mætast í kvöld í
hreinum úrslitaleik sem sker úr um
hvort liðið verður Íslandsmeistari
karla í handbolta 2021. Leikið verður
á Ásvöllum í Hafnarfirði og fara Vals-
menn með þriggja marka forskot inn í
leikinn eftir 32:29-sigur á heimavelli í
fyrri leik liðanna. Samanlögð úrslit
beggja leikja einvígisins gilda.
„Þetta er ekki mikið forskot og
Valsmenn geta ekki leyft sér að slaka
mikið á. Þeir verða að sýna eins góða
frammistöðu og síðast því ég geri ráð
fyrir því að Haukarnir verði betri á
sínum heimavelli, með bakið upp við
vegg og ósáttir við sinn leik. Ég á von
á því að þeir komi og gefi allt í þetta.
Valmenn þurfa að standast það
áhlaup til að klára þetta,“ sagði Seb-
astian Alexandersson, sem nýverið
samdi við HK eftir að hafa stýrt Fram
í efstu deild karla, í samtali við Morg-
unblaðið.
Valur verður að fá markvörslu
Sebastian, sem er fyrrverandi
markvörður, segir Valsmenn verða
að fá markvörslu í ljósi þess að
Haukar munu alltaf fá sína mark-
vörslu með Björgvin Pál Gústavsson
á milli stanganna.
„Það skiptir miklu máli fyrir Val
að fá markvörslu. Haukar munu allt-
af fá sína vörðu bolta og þeir eru ekki
með bestu vörnina á landinu fyrir
ekki neitt. Hún hefur ekki litið sann-
færandi út í síðustu tveimur leikjum
en það er bara tímaspursmál hvenær
hún hrekkur í gang aftur. Haukar
munu alltaf fá einhverja markvörslu
og þá verður Valur að fá sína til að
eiga möguleika,“ sagði Sebastian.
Hann segir Val eiga meira inni frá
Agnari Smára Jónssyni, sem skoraði
ekki eitt einasta mark í fyrri leikn-
um. Þá bendir hann sömuleiðis á
leikmenn sem Haukar verða að fá
meira frá.
„Valur á inni meira frá Agnari
Smára sem náði sér ekki á strik í síð-
asta leik. Það eitt og sér er kannski
ekki lykilatriði því þeir eiga nóg af
hæfileikum til að spila úr því. Það er
hægt að leysa þetta með rétthentum
manni og Arnór Óskarsson gæti
dottið í gír eins og hann gerði á móti
ÍBV. Rétt eins og Valur átti inni
meira frá Agnari eiga Haukar líka
meira inni frá sínum mönnum. Geir
Guðmundsson var flottur og ég veit
ekki af hverju hann spilaði svona lít-
ið. Kannski er hann eitthvað meidd-
ur. Þeir eiga svo helling inni hjá
Tjörva og öðrum útispilurum.“
Línumenn Hauka mikilvægir
Þá bendir Sebastian á að línumenn
Hauka skipti gríðarlega miklu máli.
Valsmenn þurfi að verjast þeim vel og
Haukar að fá meira út úr þeim en í
fyrri leiknum.
„Ef Haukar ætla að vinna þetta
einvígi þurfa þeir að koma línumönn-
unum sínum inn í spilið. Þegar Vals-
menn hafa áhyggjur af línumönn-
unum opnast pláss fyrir skytturnar
og hornamennina. Ef Valur getur
leyft sér að skilja bara eftir einn varn-
armann á línumanninum verður þetta
erfitt fyrir Haukana. Línan hjá Hauk-
um nýttist voðalega lítið á meðan Val-
ur náði upp forskoti í fyrri leiknum.
Þegar Haukar eru í stuði þarftu yf-
irleitt að fórna meira en einum manni
í línuna hjá þeim. Þá er hitt liðið yf-
irleitt í eltingaleik,“ sagði hann.
Valsmenn voru lengi í gang í vetur
og töpuðu átta af 22 leikjum sínum í
deildinni. Valur tapaði m.a. á útivelli
gegn Fram undir stjórn Alexanders í
janúar, 22:26. Sebastian segir liðið
hins vegar vera að toppa á réttum
tíma.
„Þeir eru búnir að vera upp og nið-
ur og þurfa að taka nokkur högg á
sig. Þeir eru að toppa á hárréttum
tíma og hafa verið flottir í úrslita-
keppninni. Ég vann þá í fyrri um-
ferðinni og svo unnu þeir okkur í
hörkuleik í seinni umferðinni með
tveimur mörkum. Nú er Magnús Óli
líkari sjálfum sér og Róbert er frá-
bær handboltamaður. Anton er að ná
sér á strik á réttum tíma og Martin í
markinu er búinn að vera mjög góð-
ur upp á síðkastið og hornamenn-
irnir eru komnir með sjálfstraust á
réttu augnabliki,“ útskýrði Sebast-
ian.
Erfitt að vera á toppnum
Hann segir erfitt að vera í þeirri
stöðu sem Haukar eru í en liðið tap-
aði aðeins tveimur deildarleikjum í
vetur og vann deildina að lokum með
níu stigum.
„Þetta minnir mig á þegar ég var
með Fram árið 2000 og við urðum
bikarmeistarar. Við enduðum í öðru
sæti í deildinni og svo fórum við í úr-
slitaeinvígið. Þá töpuðum við í úrslit-
um fyrir Haukum einmitt, sem þá
voru að toppa á réttum tíma. Það er
erfitt að vera á toppnum í heilan vet-
ur á meðan andstæðingurinn fær
meðbyr á hárréttu augnabliki,“ sagði
Sebastian Alexandersson.
Valur að toppa á réttum tíma
- Valur og Haukar bítast um Íslandsmeistaratitilinn í kvöld - Valur með þriggja
marka forskot eftir fyrri leikinn - Haukar munu gefa allt í þetta á heimavelli
Morgunblaðið/Kristinn Magnússon
Mikilvægur Sebastian segir línumenn Hauka mjög mikilvæga.
EM 2021
Bjarni Helgason
bjarnih@mbl.is
Nágrannaþjóðirnar Belgía og Hol-
land tryggðu sér farseðilinn í sextán
liða úrslit Evrópumóts karla í knatt-
spyrnu í gær, líkt og Ítalía gerði á
miðvikudaginn síðasta.
Kevin De Bruyne reyndist örlaga-
valdur Belgíu þegar liðið vann 2:1-
sigur gegn Danmörku á Parken í
Kaupmannahöfn í B-riðli keppninnar.
Youssuf Poulsen kom Dönum
reyndar yfir eftir 99 sekúndur en
Danir hafa aldrei áður skorað jafn
snemma í mótsleik í sögu Evrópu-
mótsins. Þá var þetta næstfljótasta
markið í sögu EM en Dmitrí Kiri-
chenko skoraði fyrir Rússa gegn
Gríkkjum á EM 2004 í Portúgal eftir
65 sekúndna leik.
Danir leiddu með einu marki í hálf-
leik en De Bruyne kom inn á sem
varamaður í hálfleik og lagði upp
jöfnunarmark Belga fyrir Thorgan
Hazard á 55. mínútu áður en hann
skoraði sigurmark leiksins á 70. mín-
útu. Belgar eru komnir áfram í sex-
tán liða úrslitin en liðið er með sex
stig í efsta sæti riðilsins. Danir, sem
eiga enn möguleika á sæti í útslátt-
arkeppninni, eru án stiga og mæta
Rússlandi í lokaumferð riðlakeppn-
innar á Parken í Kaupmannahöfn.
_ Memphis Depay og Denzel
Dumfries skoruðu mörk Hollands
þegar liðið vann 2:0-sigur gegn Aust-
urríki í C-riðli á Johan Cruijff ArenA
í Amsterdam. Holland er með sex
stig í efsta sæti riðilsins og búið að
tryggja sér sigur í C-riðlinum en
Austurríki er með þrjú stig í þriðja
sætinu.
Þá fóru tvær vítaspyrnur for-
görðum í leik Úkraínu og Norður-
Makedóníu í hinum leik C-riðils í
Búkarest en Andriy Yarmolenko og
Roman Yaremchuk skoruðu sitt
markið hvor fyrir Úkraínu í fyrri
hálfleik áður en Ezgjan Alioski
minnkaði muninn fyrir Norður-
Makedóníu á 57. mínútu og lokatölur
því 2:1 í Rúmeníu.
Úkraína er með þrjú stig í öðru
sæti riðilsins og mætir Austurríki í
hreinum úrslitaleik um annað sætið í
Búkarest í lokaumferðinni en Norð-
ur-Makedónía er úr leik.
Belgía og Holland í
útsláttarkeppnina
- Úrslitaleikur Austurríkis og Úkraínu
AFP
Innkoma Belginn Kevin De Bruyne byrjaði á bekknum gegn Dönum.