Fréttablaðið - 16.06.2022, Blaðsíða 18

Ragnhildur segist lengi hafa haft
gaman af því að klæða sig upp
og þarf ekki tilefni til þess. „Til
dæmis núna, á þriðjudagsmorgni
í vinnunni, þá er ég í sama kjól og
þeim sem ég klæddist í afmælis­
veislu um daginn. Ég er yfirleitt
aðeins fínni en ég þarf að vera, og
ef einhver býður mér í kokteil eftir
vinnu, þá ég reiðubúin. Ég myndi
eiginlega lýsa mínum fatastíl
þannig, ef ég má sletta smá, að ég
sé „always a little overdressed“,“
segir Ragnhildur. „En vegna þess,
þá setur fólk oft athugasemd við
klæðnað minn, og ég fæ mikið af:
„Þú ert alltaf svo fín!“ Mér finnst
það bara skemmtilegt.
Ég veit alveg að ég er fínni en ég
þarf að vera, en ég er bara þann­
ig, það er partur af því sem ég er.
Litlar stelpur líta líka oft upp til
mín, það finnst mér gaman. Hver
ákveður líka hversu fín ég má
vera á hverjum degi fyrir sig? Það
gengur vinsæll póstur um Insta­
gram núna þar sem fólk talar um
að fötin sem það deyi í muni verða
eilífðar draugabúningur þess.
Þú verður bókstaflega í þessum
fötum það sem eftir er. Af hverju
ekki að vera fínn?“ segir Ragn­
hildur og hlær.
Skapandi að klæða sig
Ragnhildi þykir það pínu fyndið
að blaðamaður Fréttablaðsins sé
að taka viðtal við sig um tísku.
„Ég fylgi ekki tískunni, heldur fer
mína eigin leið, þannig séð. Þess
vegna þykir mér þetta svolítið
fyndið. Fyrir mér er það skapandi
verknaður að klæða sig. Ég hugsa
mikið í litum og þykir gaman
að tefla saman ólíkum litum í
klæðnaðinum. Það þarf að vera
samspil á milli naglalakks, vara­
litar og mynsturs í kjól. Ég slepp
með að klæðast nánast hvaða
lit sem er, nema lillafjólubláum.
Mér finnst hann mjög fallegur, en
hann gengur ekki fyrir mig. Það er
einhver bleikur tónn í húð minni
sem passar ekki við lillafjólubláan.
Annars sæki ég mikið í sterka liti
og er minna í pastellitum.
Ég var með eldrautt litað hár
í um ellefu ár, og það er þannig
sem margir muna eftir mér. En
ég var orðin þreytt á að lita það.
Núna er ég með ljóst hár sem er
næst mínum náttúrulega háralit.
Áður en ég fór í ljósa litinn litaði
ég hárið svart á tímabili. Það var
skemmtilegt um sinn. Þegar ég
var með rauða hárið fann ég að
ég gat ekki farið í ákveðna tóna af
bleikum. Það bara passaði ekki, en
núna þegar ég er með ljósa hárið
þá gengur það mun betur upp.
Núna er ég að bíða eftir að hárið
verði almennilega hvítt eða grátt.
Það er fullkominn strigi sem gefur
mér tækifæri til að leika mér með
hvaða liti sem er í fatnaði.“
Tvískiptur fataskápur á hreyfingu
Ragnhildur laðast að kjólum og
pilsum frá ólíkum tímabilum. „Ég
versla mest í búðum með notuð föt
og er 80% af fataskápnum mínum
„vintage“ eða „second hand“ fatn­
aður. Ég á kjóla sem eru frá sjöunda
áratugnum, en líka þeim áttunda,
níunda og svo tíunda. „Eightees“
tískan höfðar kannski minnst til
mín af þessum áratugum, en sixtís
og seventís kjólana kann ég vel
að meta. Núna er ég mjög hrifin
af kjólum frá tíunda áratugnum,
það er 1990 og upp úr, sérstaklega
þegar þeir vitna í sixtís kjólana,
með útvíðum pilsum og belti eða
bandi í mittið.
Ég sæki mjög mikið í litríka
og mynstraða kjóla og er alltaf í
annaðhvort pilsi eða kjól. Hins
vegar geng ég ekki í buxum. Mér
finnst þær fínar á öðrum konum,
en mér finnst þær bara ekki
þægilegur fatnaður. Þær fara oft
óþægilega inn í mittið, eru þröngar
og oft úr óþægilegum efnum. Fyrir
um tuttugu árum síðan gekk ég
alveg í buxum, en í dag líður mér
einfaldlega best í kjól. Og ég á sko
sumarkjóla og vetrarkjóla. Já, vina
mín, það eru til vetrarkjólar sem
henta fyrir kaldara veður. Þetta er
alveg tvískiptur fataskápur.“
En hefurðu einhverja tölu á því
hversu marga kjóla þú átt? „Mig
grunaði að þú myndir spyrja
að þessu. Fataskápurinn minn
er mjög lifandi og það er mikil
hreyfing á honum. Eins og er á ég
örugglega um 50 kjóla sem ég nota.
En svo á ég fleiri kjóla líka. Ég leigi
reglulega bás í Verzlanahöllinni
og sel flíkurnar sem ég er hætt að
nota, og stuttu síðar er ég búin að
kaupa nýjar í staðinn fyrir þá sem
ég seldi.
Það sem ég hef tekið eftir með
aldrinum er að ég er orðin mun
viðkvæmari fyrir gerviefnum en
ég var. Margir af gömu „vintage“
kjólunum, þó svo þeir séu í fal­
legum litum og mynstrum sem ég
sogast að, eru úr gerviefnum. Því
þarf ég að velja betur þegar kemur
að efnum.“
Gott mótvægi við túristatískunni
Ragnhildur Jóhanns situr vaktina
í versluninni Hjarta Reykja­
víkur á Laugavegi, sem hún rekur
ásamt manninum sínum, Jóhanni
Ludwig Torfasyni. „Núna þegar
túrisminn er kominn aftur í gang
er aftur mjög mikið um ferðamenn
og alltaf nóg að gera hjá okkur.
Ég er alltaf fín í tauinu í búðinni,
eins og mér einni er lagið og fæ
mikið af hrósi, sérstaklega frá
ferðamönnunum. Það er náttúru­
lega frekar fyndið að bera saman
minn klæðnað og þeirra, þar sem
ferðamenn á Íslandi klæðast lang­
flestir hátækni útivistarfatnaði og
fjallgönguskóm, jafnvel í miðbæ
Reykjavíkur, eins og þeir séu ávallt
reiðubúnir að klífa fjall. Það kvarta
sumir yfir því að ferðamenn klæði
sig ekki upp, til dæmis þegar þeir
fara fínt út að borða, en mér finnst
þetta bara aðallega fyndið. Margir
eru líka með risabakpoka, bara
að labba Laugaveginn, jafnvel
pör hvort með sinn bakpokann.
Ég hugsa oft með mér hvað sé í
þessum bakpokum og hvernig sá
búnaður nýtist á verslunargötu í
miðbæ Reykjavíkur,“ segir Ragn­
hildur.
Lífið og listin
Ragnhildur Jóhanns er þekktur
myndlistarmaður og má segja
að einn rauður þráður í verkum
hennar sé kvenleiki og kynjahlut­
verk. Föngulegir sokkabuxna­
klæddir leggir eru áberandi
myndmál í klippiverkum hennar
sem finna má á Instagram­síðu
hennar: Ragnhildur Jóhanns.
Bækurnar úr Rauðu seríunni má
einnig sjá í mörgum verka hennar
sem og draumaráðningar og efni
úr gömlum bókum sem kenna
konum að leika kynhlutverk sitt.
„Það er alveg klárlega tenging
þarna á milli,“ segir Ragnhildur
um listina og svo kjólana. „Lífið og
listin samtvinnast þarna hjá mér.
Vissulega eru kjólar kvenlegir,
en það geta allir klæðst kjólum.
Karlar geta klæðst kjólum og
pilsum þó svo að samfélagið
f lokki þessar f líkur enn þá sem
kvenlega tísku, ásamt nælon­
sokkum. Upp úr 1960 brutust
konur gegn ríkjandi hefðum með
því að klæðast buxum, en í dag
finnst mér það líka femínismi að
geta sem kona, leyft mér að taka
hið kvenlega í mér opnum örmum
og fagna því. Ég þarf ekki að vera
í buxum í dag til þess að vera
femínisti.“ n
Ragnhildur Jóhanns myndlistarkona er kjóladrottningin í Hjarta Reykjavíkur.
Að hennar mati
er það skapandi
verk að klæða
sig á morgnana.
Tefla saman
áferð og litum,
mynstruðum
kjólum, nagla-
lakki og varalit.
FRÉTTABLAÐIÐ/
SIGTRYGGUR ARI
Jóhanna María
Einarsdóttir
jme
@frettabladid.is
Það
er
alveg
klárlega
tenging
þarna á
milli. Lífið
og listin
samtvinn-
ast þarna
hjá mér.
Ragnhildur
Allt er kynningarblað sem býður auglýsendum
að kynna vörur og þjónustu í formi viðtala og
umfjallana. Í blaðinu er einnig hefðbundið rit-
stjórnarefni. Blaðið fylgir Fréttablaðinu daglega.
Umsjónarmenn efnis: Elín Albertsdóttir, elin@frettabladid.is, s. 550 5761 | Oddur Freyr
Þorsteinsson, oddurfreyr@frettabladid.is s. 550 5766 | Sandra Guðrún Guðmundsdóttir,
sandragudrun@frettabladid.is, s. 550 5762 | Starri Freyr Jónsson starri@frettabladid.is,
s. 550 5767 | Þórdís Lilja Gunnarsdóttir, thordisg@frettabladid.is, s. 550 5768
Útgefandi:
Torg ehf
Ábyrgðarmaður:
Jón Þórisson
Sölumenn: Arnar Magnússon, arnarm@frettabladid.is, s. 550 5652,
Jón Ívar Vilhelmsson, jonivar@frettabladid.is, s. 550 5654, Jóhann
Waage, johannwaage@frettabladid.is, s. 550 5656, Ruth Bergsdóttir,
ruth@frettabladid.is, s. 694 4103.
2 kynningarblað A L LT 16. júní 2022 FIMMTUDAGUR