Lögmannablaðið - 2022, Side 4

4 LÖGMANNABLAÐIÐ TBL 01/22
STÖÐNUN
KYNJAHLUTFALLS
FÉLAGSMANNA
LMFÍ
Í árskýrslum LMFÍ má finna ýmsar fróðlegar upplýsingar.
Á hverju ári er þar gerð grein fyrir „þróun kynjahlutfalls
félagsmanna LMFÍ“ en við nánari skoðun sést að þróunin
er nánast engin. Árið 2013 voru konur 30,2% félagsmanna,
en átta árum síðar voru þær 31,2% félagsmanna. Nærtækara
væri því að kalla stöplaritið „stöðnun kynjahlutfalls
félagsmanna LMFÍ“. Hlutfallið er enn verra ef litið er til
sjálfstætt starfandi lögmanna og fulltrúa þeirra. Samkvæmt
síðustu árskýrslu LMFÍ voru konur 27,2% þeirra lögmanna
sem eiga eða starfa á lögmannstofum. En hvað veldur?
Einhverjir kynnu að halda að kynjaskiptingin héldist í
hendur við kynjahlutföll útskriftarárganga lagadeilda
landsins. Svo er ekki. Samkvæmt upplýsingum frá öllum
lagadeildum landsins voru konur 57,5% brautskráðra á
árunum 2012-2021. Á hverju þessara ára hafa lagadeildirnar
brautskráð fleiri konur en karla. Samt breytist kynjahlutfall
LMFÍ nánast ekki neitt. Ef kynjahlutfall LMFÍ yrði yfirfært
á útskriftarárgangana væri eins og 380 konur hefðu ekki
útskrifast á þessu tímabili. En það gerðu þær sannanlega.
Þær bara skila sér ekki inni í félagið eða staldra stutt við.
Það er sameiginlegt verkefni okkar að breyta þessu. En
hvernig?
Í fyrsta lagi mætti kynna betur lögmennsku sem starfsvettvang
fyrir fjölbreyttari hóp. Það væri til að mynda einfalt mál fyrir
LMFÍ að óska þess að halda slíkar kynningar í lagadeildum
háskólanna. En það væri ekki nóg.
Í öðru lagi þarf að gæta þess að konur fái sömu tækifæri og
karlar. Hvort heldur er við nýráðningar, þróun í starfi og
framgang. Í þessu samhengi má nefna að Lögmannablaðið
kannaði hlutfall kvenna í hópi eigenda á tíu stærstu
lögmannstofum landsins árið 2014, en þar kom fram að
einungis 14,5% eigenda voru konur. Það er tímabært að
kanna þetta aftur og þá líka hvert eignarhlutfall þessara
kvenna er, enda virðist algengara að konur hafi ekki jafnan
eignarhlut á við karlana.
Í þriðja lagi þarf að huga betur að starfsumhverfi lögmanna.
Það er að mörgu leyti gamaldags bæði hvað varðar vinnutíma
og vinnulag. Í síðasta pistli mínum nefndi ég könnun á
meðal ungra danskra lögmanna en þar kom skýrlega fram
að svigrúm til fjölskyldulífs og gott vinnuumhverfi skiptu
mestu við val ungra karla sem kvenna á vinnustað. Við þessu
þurfa vinnuveitendur að bregðast ætli þeir sér að sækja sér
besta starfsfólkið. Svo vinna lögmenn líka utan skrifstofu
sinnar þar sem gæta þarf að sömu sjónarmiðum, eins og
t.d. hjá dómstólunum.
Í fjórða lagi þarf að huga að brottfalli úr stéttinni og
ástæðum þess. Til að mynda gæti LMFÍ kannað ástæður
innlagnar réttinda og hvort meira brottfall sé að ræða af
hálfu kvenna og karla.
Til viðbótar við ofangreint mætti svo nefna skýrslu starfshóps
LMFÍ um starfsumhverfi lögmanna frá árinu 2017. Þar má
finna ágætis samantekt á málefninu og nokkrar tillögur að
úrbótum. Ég hvet áhugasama að kynna sér efni hennar.
SIGURÐUR ÖRN HILMARSSON LÖGMAÐUR
FORMAÐUR
Lagadeild Háskólans í Reykjavík býður upp á endurmenntun
fyrir lögfræðinga með námskeiðum á meistarastigi.
Útskrifuðum lögfræðingum frá HR stendur til boða
að sækja námskeiðin með 50% afslætti.
Endurmenntun
fyrir lögfræðinga
Dæmi um námskeið í boði:
– Fjölmiðlaréttur
– Höfundaréttur í upplýsingasamfélagi
– International Law and Litigation on Climate Change
– Auðgunar- og efnahagsbrot
– EU Constitutional Law
@haskolinnireykjavik
@haskolinnireykjavik
Sjá úrval námskeiða og nánari upplýsingar á:
hr.is/lagadeild