Ársrit Ræktunarfélags Norðurlands - 01.01.1984, Side 15

ÆVIFERILL
Ungi er klipptur 6-8 vikna gamall. Kallast það hreiðurklipp-
ing og fást af honum 20-40 g af ull. Þá eru ungarnir teknir frá
móðurinni og settir í hlaupabúrið. Það ætti að vera minnst 2-3
metrar á lengd og helst með smáhindrunum svo ungarnir
þurfi að hoppa yfir þær. Þetta er betra til að ungarnir styrkist
og myndi meiri vöðva. Þarna eru þeir hafðir í 2 mánuði mest,
en eru þá látnir í einstaklingsbúr. Venjulega verða ungarnir
kynþroska 7-9 mánaða gamlir, en geta orðið það mun fyrr, 5-6
mánaða. Ekki borgar sig að láta kanínu sem er notuð til
ullarframleiðslu verða eldri en þriggja og hálfs til fjögurra ára,
þar sem með aldrinum dregur úr hárvexti dýranna, það er
hins vegar sjálfsagt að láta þær kanínur sem notaðar eru til
undaneldis (kynbótadýrin) lifa eins lengi og þau endast til
þeirra hluta, sem getur verið nokkuð lengur.
Önnur klippingin er þegar ungarnir eru 5 mánaða gamlir,
síðan þriðja við 8 mánaða aldur. Þá má sjá mun á ullarmagni
dýranna. Þá er rétt að setja ullarminni dýrin í eldi og slátra
þeim svo eftir V2 til 1 mánuð, en þá er ullin orðin 1-2 sm á
lengd og skinnið mátulegt til sútunar. Best er að höggva dýrið
með góðri öxi, rétt eins og alifugla. Útbúa þarf lítinn gálga,
hengja skrokkinn upp á afturfæturna, spretta fyrir og smeygja
skinninu af í heilu lagi. Tekið er innanúr en lifur og hjarta
hirt. Skinnin hefur okkur ekki tekist að loðsúta, en hugsum
okkur að safna skinnum og láta verksmiðju súta nokkur skinn.
Kanínufeldir eru fallegir en ekki slitsterkir né í háum verð-
flokki.
Kvendýr beiðir gjarna innan viku eftir klippingu, þá má
prófa að setja það inn í búrið til karldýrsins. Sé kvendýrið að
beiða ræðst það á karldýrið og hefur uppi mikla tilburði.
Vissara er að fylgjast mjög vel með til að missa ekki af beiðsli.
Mökun gerist mjög snöggt, en annars dylst engum hafi hún
átt sér stað, því karldýrið steinliggur. Beiðslið stendur um
einn sólarhring og eru um 17 dagar á milli. Þegar 30-36 dagar
eru liðnir frá því dýri er haldið er komið got. Kvendýrin beiða
síður eftir klippingu, nema 10-15 stiga hiti sé í kanínuhúsinu.
2
17