Morgunblaðið - 12.12.2003, Blaðsíða 31

SUÐURNES
MORGUNBLAÐIÐ FÖSTUDAGUR 12. DESEMBER 2003 31
Reykjanesbær | Börnin á leik-
skólanum Gimli í Njarðvík heim-
sóttu Árna Sigfússon bæjarstjóra
á skrifstofur Reykjanesbæjar í
vikunni. Færðu þau bæjarstjór-
anum jólakúlur sem þau höfðu
unnið á leikskólanum og sungu
jólalag.
Árni ræddi við börnin um hlut-
verk bæjarstjórans og komu fram
nokkrar ábendingar frá börn-
unum um það sem betur mætti
fara í bænum. Börnin voru síðan
leyst út með gjöf áður en þau
héldu ferð sinni áfram um bæinn. Ljósmynd/Dagný Gísladóttir
Færðu
bæjarstjóra
jólakúlur
Keflavík | Stjórnendur Heilbrigðis-
stofnunar Suðurnesja hafa sett sér
það takmark að stofnunin verði fyrsti
viðkomustaður Suðurnesjabúa sem
leita eftir heilbrigðisþjónustu. Stefnt
er að því að auka mjög þjónustuna til
þess að fólk þurfi minna að leita á
Landspítala – háskólasjúkrahús og
jafnvel að taka við sjúklingum úr öðr-
um héruðum í greinum þar sem bið-
listar eru miklir. Tillögur ráðherra-
skipaðrar nefndar miðast að þessu en
nauðsynlegt fjármagn er ekki á fjár-
lögum næsta árs.
Ýmislegt hefur gengið á það ár sem
Sigríður Snæbjörnsdóttir hefur gegnt
embætti framkvæmdastjóra Heil-
brigðisstofnunar Suðurnesja. Lækn-
islaust var á heilsugæslustöðinni þeg-
ar hún kom til starfa og hefur mikill
tími farið í að manna stöðina, fyrst frá
degi til dags en nú að undanförnu frá
mánuði til mánaðar. Sigríður er von-
góð um að heilsugæslan komist í samt
lag innan tíðar. Segir að læknum hafi
fjölgað jafnt og þétt og hjúkrunarþjón-
ustan verið efld. Þá hafi verið ráðinn
sérfræðingur í heimilislækningum til
að taka við starfi yfirlæknis. Hins veg-
ar segir Sigríður að enn vanti lækna á
heilsugæsluna og meiri samfellu í
þjónustuna þannig að fólk geti leitað
til síns ákveðna heimilislæknis.
Framkvæmdastjórinn segir að
fjöldi góðra lækna starfi við stofn-
unina, þeir séu um 25, þótt ekki séu
nærri allir í fullu starfi. Hún hefur
áhuga á að auka samvinnu sjúkrahúss
og heilsugæslu og notar orðið heilsu-
gæslusjúkrahús um það. Átt er við
samtengda heilsugæslu og sjúkra-
hússtarfsemi þar sem starfsfólk fer
milli sviða, eftir þörfum sjúklinga
hverju sinni og sérþekkingu sem fyrir
hendi er hverju sinni.
Sigríður var ráðin við erfiðar að-
stæður. Hún segist líta á það sem
fimm ára verkefni að gera nauðsyn-
legar breytingar á stofnuninni. Hún
telur að það versta sé yfirstaðið og
ákveðið jafnvægi að nást og tími upp-
byggingar framundan. „Það er komið
mikið af nýju fólki til starfa. Ekki má
heldur gleyma því góða starfsfólki sem
fyrir var en á því hefur auðvitað mikið
mætt. Ég tel að tekist hafi að skapa
góða liðsheild fólks sem hefur sameig-
inlega sýn á framtíðina,“ segir Sigríð-
ur.
Ný framkvæmdastjórn HSS tekur
til starfa um áramót. Hún á meðal
annars að vera framkvæmdastjóra
stofnunarinnar til ráðuneytis um þjón-
ustu og rekstur. Samkvæmt lögum
skulu lækningaforstjóri og hjúkr-
unarforstjóri skipa stjórnina með
framkvæmdastjóra en auk þess hefur
Sigríður skipað fjármálastjóra stofn-
unarinnar í hana. Konráð Lúðvíksson,
yfirlæknir sjúkrahússviðs, verður
hjúkrunarforstjóri um áramót en
Hildur Helgadóttir hjúkrunarforstjóri
og Pálína Reynisdóttir fjármálastjóri
komu til starfa fyrr á árinu.
Auk heilsugæslustöðva í Keflavík og
Grindavík rekur HSS heilsugæslusel í
Vogum, Garði og Sandgerði, sjúkra-
hús í Keflavík og hjúkrunardeildina
Víðihlíð í Grindavík.
Mikil sóknarfæri
Stjórnendur Heilbrigðisstofnunar-
innar hafa sett saman framtíðarsýn
stofnunarinnar til ársins 2010 og var
hún innlegg í vinnu starfshóps heil-
brigðisráðherra sem nú hefur lagt fyr-
ir ráðherra tillögur um framtíðarupp-
byggingu, þróun og skipulag HSS til
ársins 2010.
Í skýrslu starfshópsins kemur fram
að Suðurnesjamenn leita mikið út fyrir
svæðið eftir heilbrigðisþjónustu.
Þannig samsvara legudagar þeirra á
Landspítala – háskólasjúkrahúsi því
að liðlega 32 Suðurnesjamenn séu þar
alla daga ársins. Hluta þeirra á að vera
hægt að sinna í heimabyggðinni. Telur
nefndin að sóknarfæri liggi í almennri
lyflæknisþjónustu, almennri skurð-
þjónustu, bæklunarskurðþjónustu,
slysa- og bráðaþjónustu og kven-
sjúkdóma- og fæðingarhjálp. Er talið
að unnt sé að veita þessa þjónustu á
hagkvæmari hátt á Heilbrigðisstofnun
Suðurnesja en nú er gert á stóra há-
tæknisjúkrahúsinu í Reykjavík.
Í skýrslunni er vakin athygli á því
að lyflækningum hafi lítið verið sinnt á
sjúkrahúsinu og þær þurfi að efla. Sig-
ríður segir að ýmsar breytingar hafi
þegar verið gerðar á starfseminni sem
miðist að þessu, meðal annars með
ráðningu nokkurra lyflækna í hluta-
störf. Við það hafii sérfræðiþjónusta
stóraukist á mörgum sviðum. Dag-
deild hafi verið efld og svokölluð fimm
daga deild verði opnuð í byrjun nýs
árs. Meðal annarra nýjunga er sál-
félagsleg þjónusta sem farið er að
veita fólki sem lent hefur í erfiðleikum.
Einnig ljósameðferð sem psorias-
issjúklingar hafa aðgang að á dag-
deild. „Fullyrða má að nú sé veitt
meiri hjúkrunar- og læknisþjónusta
við Heilbrigðisstofnunina en nokkru
sinni áður. Hins vegar er stefnt að því
að þjónusta við sjúklinga verði enn
aukin, þegar tillögum ráðherraskipuðu
nefndarinnar verður að fullu hrint í
framkvæmd,“ segir Sigríður.
Hún segir stefnt að því að auka hér-
aðshlutdeild sjúkrahússins upp í 80%
en hún er nú um 50%, samkvæmt út-
reikningum í skýrslu ráðherraskipuðu
nefndarinnar. Er þar átt við fjölda
legudaga Suðurnesjamanna á sjúkra-
húsinu og annars staðar.
Peningar fylgja ekki
Í skýrslunni er lagt til að ráðist
verði í ýmsar endurbætur til að unnt
verði að auka þjónustuna. Fjárfrek-
asta framkvæmdin er að innrétta
þriðju hæð D-álmu spítalans. Gert er
ráð fyrir að þar verði tvær skurð-
stofur, speglunarherbergi og tólf rúma
legudeild. Kostnaður við D-álmuna,
viðhald og breytingar er áætlaður um
500 milljónir og gerð er áætlun um
skiptingu kostnaðar niður á ár allt til
ársins 2010. Sigríður segir að viðhald
húsnæðis stofnunarinnar hafi verið
vanrækt í mörg ár og ekki gengið frá
lóð. Þetta skapi stofnuninni slæma
ímynd og þurfi að lagfæra.
Sigríður segir að kostnaður við
breytingarnar sé ekki mikill þegar litið
sé til þess hvað fáist á móti. Óþarfi sé
fyrir fólk að sækja á höfuðborgar-
svæðið þjónustu sem mjög vel sé hægt
að veita í heimabyggð. Því fylgi einnig
kostnaður fyrir viðkomandi sjúklinga
að aka á milli.
Tillögurnar gerðu ráð fyrir að 160
milljóna króna fjárveiting kæmi á
næsta ári í nýframkvæmdir, viðhald
og endurnýjun, mest vegna D-álm-
unnar. Ekki er hins vegar gert ráð fyr-
ir þessu í nýsamþykktum fjárlögum
ríkisins. Sigríður segir að sú niður-
staða komi sér vissulega á óvart í ljósi
þeirrar vinnu sem fram hafi farið við
undirbúning málsins og stuðnings-
yfirlýsingar heilbrigðisráðherra og
ráðuneytis. Hún segist eiga eftir að fá
skýringar ráðuneytisins á þessu.
Þrátt fyrir mikla umbrotatíma og
aukna þjónustu á sumum sviðum er
rekstur HSS í jafnvægi eftir árið, að
sögn framkvæmdastjórans. Fékk
stofnunin 35 milljóna króna auka-
fjárveitingu í vor og 5 milljónir til lag-
færingar á lóð. Svipuð fjárveiting er
fyrir næsta ár.
D-álma fyrir aldraða sjúka
Sigríður hefur áhuga á því að
sjúkrahúsið veiti sérfræðiþjónustu í
ákveðnum greinum á landsvísu, til
þess að minnka biðlista. Hún nefnir
endurhæfingu, bæklunarlækningar og
jafnvel lýtalækningar sem þjónustu
sem hægt yrði að veita.
Upphaflega var ráðist í byggingu
D-álmu sjúkrahússins í Keflavík til
þess að sinna þjónustu við aldraða
sjúklinga en Suðurnesjamenn höfðu
lengi barist fyrir því máli. Nú hefur
húsinu verið ráðstafað til almennra
sjúkrahúsnota. Sigríður Snæbjörns-
dóttir segir að aðstæður hafi breyst og
nú sé ekki sama þörf og áður fyrir
legudeildir aldraðra á sjúkrastofn-
unum. Hún telur að ágætlega sé séð
fyrir þeim málum. D-álman sé og verði
áfram notuð í þágu sjúkra aldraðra
enda hafi þeir ákveðinn forgang að
legurúmum þar. Þá sé ætlunin að inn-
rétta nýja deild í því húsnæði sem
losnar þegar skurðstofurnar flytja og
hún verði miðuð við sérhæfðar þarfir
aldraðra. „Við getum ekki boðið því
aldraða fólki sem þarf að komast á
hjúkrunarheimili að vera á sjúkradeild
á sjúkrahúsi. Það hefur svo mikla
ókosti í för með sér fyrir fólkið,“ segir
Sigríður og vekur athygli á því að auka
megi við þjónustu hjúkrunarheimila á
Suðurnesjum.
„Hlutverk okkar er að þjóna sjúk-
lingum. Ég hef alltaf haft þá trú að
með góðu starfsfólki sem myndar góða
liðsheild og hefur skýra framtíðarsýn
sé hægt að gera frábæra hluti. Ég lít á
þetta starf eins og langhlaup en ekki
spretthlaup, maður tekur stutt skref
en gerir ráð fyrir að þau verði mörg.
Ég er bjartsýn á að eftir tvö til þrjú ár
getum við verið stolt af þeirri þjónustu
sem Heilbrigðisstofnun Suðurnesja
veitir,“ segir Sigríður Snæbjörns-
dóttir.
Morgunblaðið/Helgi Bjarnason
Langhlaup fremur en spretthlaup: Sigríður Snæbjörnsdóttir vinnur að því að auka þjónustu Heilbrigðisstofnunarinnar.
Stjórnendur
vilja auka
héraðshlut-
deild í 80%
Sjúklingum þjónað: Sprautan gerð klár á spítalanum og sjúklingar í iðjuþjálfun hlusta á sögu af segulbandsspólu.
Tillögur lagðar fram um aukna þjónustu Heilbrigðisstofnunar Suðurnesja en fjármagn fylgir ekki
Eignaspjöll | Unnar voru skemmd-
ir á símaklefa sem stendur utan við
húsnæði Landssímans við Hafnar-
götu í Keflavík. Tilkynnt var um
skemmdirnar til lögreglunnar
snemma í gærmorgun.
Brotin var hurð og takkaborð sím-
ans. Tjónið er metið á 300 þúsund
kr. Lögreglan leitar skemmdar-
vargsins og óskar eftir að hugsan-
legir sjónarvottar gefi sig fram.
Slys í hálku | Nokkrir gangandi
vegfarendur lentu í slysum í hálku í
Keflavík í gærmorgun. Tvö alvarleg
tilvik komu til kasta lögreglunnar.
Maður féll í hálku á Framnesvegi
og fótbrotnaði rétt eftir klukkan sjö.
Skömmu síðar datt kona í hálku utan
við heimili sitt við Njarðargötu. Hún
kvartaði undan verkjum í baki og var
eins og maðurinn flutt í sjúkrabifreið
á Heilbrigðisstofnun Suðurnesja.