Fréttablaðið - 02.11.2007, Blaðsíða 46

2. NÓVEMBER 2007 FÖSTUDAGUR4 fréttablaðið vetrarlíf
Þegar skauta- og skíðaskórnir eru farnir að þrengja
að fætinum er óhjákvæmilegt að endurnýja. Í Skíða-
þjónustunni á Fjölnisgötu 4b á Akureyri er nokkurs
konar skiptimarkaður á skíðaskóm, skautum, hjólum
og skíðum.
„Við erum með nýtt og notað og tökum notað upp í nýtt og
notað upp í notað,“ segir Viðar Garðarsson, verslunarmaður
í Skíðaþjónustunni, glaðlega. Hann hefur staðið vaktina í
yfir 20 ár og segir alltaf mikið að gera, einkum þegar snjór
sé á jörð. Nú eru Akureyringar farnir að framleiða sinn
eigin snjó í Hlíðarfjalli og auðvitað eykur það viðskiptin
hjá Vidda, en svo er kaupmaðurinn snjalli kallaður.
„Ég sel skíði og skauta á veturna og hjól á sumrin og við
erum bæði með skíðaverkstæði hér og hjólaverkstæði,“
lýsir Viðar hress í bragði. „Sumir fara á skíði, kannski
tvisvar, þrisvar á ári, en vaxa svo upp úr skónum og þeir
eru sem nýir. Krakkar stækka náttúrlega hratt og þurfa að
skipta um skíðaskó og skauta á hverju ári. Þeir fá hér aðra
stærri í staðinn og borga einhvern þúsundkall á milli.“
Viðar bjó til búðina, eins og hann orðar það, fyrir rúmum
20 árum, meira að segja heima í bílskúr til að byrja með.
„Ég var töluvert á skíðum og var skíðaþjálfari líka en svo
fór ég út í verslunarrekstur enda vantaði svona þjónustu.“
Hann telur skiptiþjónustu með skíði og skauta hafa verið
í borginni líka, nánar tiltekið í Sportmarkaðinum, en hún
hafi lognast út af því snjóinn hafi vantað og þar með við-
skiptin. „Nú fæ ég bara Sunnlendingana hingað norður
enda er opið hér frá 10 til 19 bæði laugardaga og sunnu-
daga að vetrinum ef snjór er,“ segir hann kampakátur.
„Oft kemur fólk að sunnan á föstudagskvöldum og áttar
sig á að skórnir eru of litlir. Þá þarf ég að vera á svæðinu
enda er oft fjör hérna hjá okkur. Ég er með stóran lager
og nóg handa öllum.“ Hann segir minna um að fólk endur-
nýi skíðin sín enda þurfi ekki að skipta þeim eins ört út og
skónum. „Skíðin geta dugað lengur og þau mega vera lítil,“
segir hann. „Það gerir ekkert til þótt þau séu stutt.“
Viðar segir bjart yfir haustinu því nýbúið sé að ræsa
snjóvélarnar í fjallinu. „Göngumenn fóru líka um daginn
aðeins að gá hvort færið væri komið. Þeir allra hörðustu.
Menn eru svona í startholunum og þetta lofar góðu.“
gun@frettabladid.is
Notað upp í nýtt og notað upp í notað
Viðar leitar vel og finnur eitthvað handa öllum í Skíðamiðstöðinni. FRÉTTABLAÐIÐ/HEIÐA.IS