Fréttablaðið - 03.12.2007, Blaðsíða 16

16 3. desember 2007 MÁNUDAGUR
nær og fjær
„ORÐRÉTT“
Þeir eru fáir sem hafa kom-
ið meiru í verk á sinni ævi
en hinn lífsglaði Sveinn
Jónsson, betur þekktur sem
Sveinn í Kálfskinni. Hann er
fullur af fjöri og hefur yndi
af lífinu en segir þó hátt sinn
lítt til eftirbreytni.
Tekinn í jórdanskri lögsögu
„Mér hefur alltaf þótt gaman að
því að sjá eitthvað gerast,“ segir
Sveinn eftir að hann er kominn
heim eftir vel unnið dagsverk.
Hann er orðinn 75 ára gamall en
það er engu líkara en unglingur sé
þar á ferð. „Það á því vel við mig
að eiga við mannvirkjagerð því þá
sér maður eitthvað liggja eftir
sig.“ Hann á og rekur bygginga-
fyrirtækið Katla með syni sínum
Jóni Inga en með hinum syninum
Marinó rekur hann fjölþætta
ferðaþjónustu. Hann er með átta
sumarhús og býður ferðamönnum
upp á köfun, siglingar, sjóstang-
veiði og margt fleira sem hægt er
að gera í Eyjafirðinum. Þar að
auki þvælist hann með ferða-
mennina um fjöll og firnindi í
snjósleðaferðum eða gönguferð-
um. En eins og verða vill um menn
sem eru hamhleypur til flestra
verka fara sumir hlutir á annan
veg en ætlað var. Eitt sinn var
Sveinn til dæmis á seglbretti á
Dauðahafinu í Ísrael þegar kappið
varð forsjánni yfirsterkara. „Það
var nú þannig að ég var ágætur í
því að sigla undan vindi en var
ekki búinn að ná lagi á því að fara
á móti,“ rifjar hann upp. „Ég var
ekki mikið að velta þessu fyrir
mér þar sem ég var á góðu róli en
þá kemur lögreglubátur að og ég
var stöðvaður enda kominn í jór-
danska lögsögu. En þeir mega
eiga það að ég fékk ókeypis ferð
til baka, sem kom sér nokkuð vel
því ég hefði sennilegast verið
nokkuð lengi að koma mér sjálf-
ur,“ segir hann og hlær við.
Allir eiga sínu góðu hliðar
Þó að Sveinn sé víðförull er hann
vanari því að sinna ferðamönnum
en vera sjálfur ferðamaður í
háska enda má segja að hann sé
frumkvöðull í ferðaþjónustu á
landsbyggðinni. „Það er svo
skemmtilegt við ferðamennskuna
að þar kynnist þú svo mörgu fólki.
Vissulega sé ég líka eitt og annað
sem ekki er mikill sómi að. Sér-
staklega þykir mér sárt að sjá
ungt fólk sem hefur misstigið sig
í öldurótinu. En ég lendi þó nær
aldrei í neinum vandræðum með
mitt ferðafólk enda haga ég
venjulega ráðum mínum þannig
að ef einhver vill sýna á sér ljóta
hlið þá sný ég mér bara að góðu
hliðinni; það eiga sér nefnilega
allir góðar hliðar.“
En þó að Sveinn eigi ýmis góð
ráð handa þeim sem yngri eru
eftir erilsama ævi á fjölmörgum
vígstöðvum telur hann sig alls
enga fyrirmynd. „Ég er náttúru-
lega ekkert eðlilegur og það er
ekkert hollt að miða við mig, því
ofan á þetta stúss allt saman hef
ég líka verið bóndi með stórt bú í
fjörutíu ár. Þetta er alls ekki til
eftirbreytni. Hvernig heldur þú
til dæmis að það sé fyrir hana Ásu
mína að vera gift svona manni?“
Þó að einhverjum finnist oft
nóg um hamaganginn í Sveini
hafa enn fleiri notið góðs af verk-
um hans. Meðal þeirra er fyrr-
verandi prestur í Hrísey en
Sveinn gerði fyrir hann heilan
flugvöll.
„Hann Helgi Hróbjartsson
prestur í Hrísey var einnig flug-
maður og hann vantaði flugvöll
svo hann kæmist nú á milli sókn-
arbarna sinna. Þá fékk ég leyfi
til að laga gamla þjóðveginn, það
þurfti bara að fletja hann út og
slétta aðeins, þá var það komið.
En guðsmaðurinn naut þessa
ekki lengi því hann var ekki hjá
okkur nema tvö ár blessaður
karlanginn, þá var hann farinn
til Afríku.“
Vilja gera krá á Hlíðarfjalli
En þó að margt hafi verið gert og
ýmislegt sýslað segir Sveinn
margt eftir enn. „Mig langar til
dæmis að gera miklu meira í
ferðaþjónustunni eins og að gera
eigin hitaveitu og jafnvel heilsu-
hótel í framhaldinu. Svo geng ég
enn með þann draum í maganum
að byggja krá á Hlíðarfjalli og
svo kláfferju þangað upp.
Þetta myndi auka ferðamanna-
strauminn á sumrin og á veturna
mætti nota hana við skíðaiðkun.
Svona eru nú tækifærin óteljandi,
bara ef við Íslendingar sem eigum
svo mikinn pening bærum nú
gæfu til að eyða honum í meiri
uppbyggingu hér heima heldur en
að vera að spandera þessu alltaf í
útlöndum.“
Björn Ingólfsson hefur skráð
endurminningar Sveins sem
komu út í bók fyrir skemmstu. En
hvernig viðtökur hefur hún feng-
ið hjá vinum og sveitungum hans?
„Það þorir enginn að segja annað
en þetta sé bara alveg ágæt bók.
En ég hef svo sem engar áhyggj-
ur af viðtökunum, ég þekki margt
fólk, alla vega svona fjóra eða
fimm og þeir hljóta að álpast til
að kaupa hana.“
jse@frettabladid.is
Best að snúa sér að góðu hliðinni
SVEINN VIÐ BERNSKUSTÖÐVAR Hamhleypan kann að slaka á þó að venjulega fari hann mikinn í öllu því sem hann tekur sér fyrir
hendur. Hér situr hann á bagga en í baksýn má sjá bæinn Kálfskinn. FRÉTTABLAÐIÐ/HEIÐA.IS
„Ég hef nú ekki fylgst nógu mikið
með þessu máli, en það er kannski
slæmt ef þing-
menn hafa
mjög stuttan
ræðutíma
fyrir mál sem
þarf virkilega
að fjalla um,“
segir Inga Elín
Kristinsdóttir
myndlistar-
maður spurð
um skoðun sína
á fyrirhuguðum
takmörkunum
á ræðutíma á þingi. Lagt hefur verið
til að þingskapalögum verði breytt
þannig að ótakmarkaður ræðutími
verði afnuminn. Þingmenn Vinstri
grænna standa einir í andstöðu við
breytingar á lögunum og kalla þær
aðför að málfrelsi þingmanna. „Þeir
mega nú alveg tala svolítið lengi, er
þetta ekki vinnan þeirra?“ segir Inga.
Á þingi hefur einnig verið rætt um
að þingmenn fái sérstakan aðstoð-
armann, en forsætisnefnd Alþingis
fjallar nú um frumvarp þess efnis.
Um það segir Inga: „Er ekki nóg að
þeir leiti sér bara ráðgjafar í hverju
máli fyrir sig í staðinn fyrir að hafa
aðstoðarmann í fullu starfi? Annars
þekkir maður þetta starf ekkert
almennilega, maður veit ekki hversu
umfangsmikið það er.“
SJÓNARHÓLL
BREYTINGAR Á ÞINGSKÖPUM
Mega tala
svolítið lengi
INGA ELÍN
KRISTINSDÓTTIR
Myndlistamaður
„Platan mín var að koma út í vikunni. Þetta er
endurhljóðblöndun á tíu lögum af latínóplöt-
unum mínum sem menn af ýmsum þjóðernum
eru að kljást við,“ segir Tómas R. Einarsson
tónlistarmaður. „Þetta er töluvert ólíkt því sem ég
hef verið að fást við. Ég tók mér smá tíma til að
víkka út eyrun á mér en það kom án verulegrar
fyrirhafnar og ég er farinn að fíla þetta í tætlur. Ég
hafði bara heyrt ávæning af teknómúsík fram að
þessu. Stundum þegar Samúel Jón (Samúelsson)
hafði dregið mig á Kaffibarinn upp úr miðnætti
þá heyrði maður þetta,“ segir hann.
Platan nefnist Rommtommtechno þar sem
plötusnúðar frá ýmsum löndum spila lög Tómas-
ar. „Það eru mjög skemmtilegar pælingar í gangi
hjá þessum skífuþeyturum og þeir eru með mjög
forvitnilega hugsun.“
Tómas segir að nýja platan sé fyrir forvitið fólk
á öllum aldri þó svo að hún höfði líklega frek-
ar til ungs fólks. „Það er dálítið villimannslegri
tónn í þessu en hefur verið hjá mér venjulega
en til að vera ekki sífellt í þessu sama hjakki
verður maður að breyta til og gera eitthvað
spennandi og forvitnilegt.“
Áframhaldandi spilamennska er fram
undan hjá Tómasi. „Hvað kemur næst
í höfuðið á mér veit ég ekki og þótt
ég vissi það myndi ég ekki vilja segja
það,“ segir Tómas, sem er lítið jólabarn
í sér. „Ég fer kannski að velta fyrir mér
einhverjum gjöfum snemma á Þorláks-
messu. Síðan myndi ég kannski stinga
inn á mig læri á Þorláksmessu til að
elda daginn eftir. Jólaundirbúningurinn
er mjög aftarlega á verkefnalistanum hjá
mér.“
HVAÐ ER AÐ FRÉTTA? TÓMAS R. EINARSSON TÓNLISTARMAÐUR
Fyrir forvitna á öllum aldri
Skilur ekki stressið
„Ég hef alltaf notið mín best
í leikjum þar sem mikið er
í húfi og margir áhorfendur
eru að fylgjast með.“
PÉTUR PÉTURSSON, NÝR AÐSTOÐ-
ARÞJÁLFARI ÍSLENSKA LANDSLIÐS-
INS Í KNATTSPYRNU.
Fréttablaðið 2. desember
Peningarnir okkar?
„Við greiðum öll í þessa sjóði.
Svo kemur eitthvað upp á
og þá erum við bara einskis
virði.“
GUÐMUNDUR FELIX GRÉTARSSON
ER MEÐAL ÞEIRRA SEM MISSTU
TEKJUR ÚR LÍFEYRISSJÓÐUM UM
MÁNAÐAMÓTIN.
Fréttablaðið 2. desember