Fréttablaðið - 25.04.2008, Qupperneq 42

● fréttablaðið ● austurland 25. APRÍL 2008 FÖSTUDAGUR6
Árlegur fuglaskoðunardagur
Ferðafélags fjarðamanna og
Náttúrustofu Austurlands fer
fram 10. maí næstkomandi.
„Yngri kynslóðin er sérstaklega
áhugasöm en áhuginn er almennt
að aukast. Flestir koma með eigin
kíki en við erum líka með sérstak-
ar fjarsjár til að gefa fólki kost
á að sjá fuglana betur. Á þessum
tíma finnast mest anda- og gæsa-
hreiður,“ segir Halldór Stefáns-
son, fuglafræðingur hjá Náttúru-
stofu Austurlands, um árlegan
fuglaskoðunardag á leirunum í
Norðfirði og á Reyðarfirði 10. maí
næstkomandi.
Þar er um að ræða bæði fugla-
skoðun og fuglatalningu en sér-
fræðingar frá Náttúrustofunni
stjórna talningunni. Dagurinn
hefst klukkan 9 á leirunum í Norð-
firði undir leiðsögn Skarphéðins
G. Þórissonar náttúrufræðings en
klukkan 10.30 á Reyðarfirði undir
leiðsögn Halldórs.
Í fyrra sáust 33 tegundir fugla
á báðum stöðum og nokkur hreið-
ur fundust með eggjum. Flest-
ar tegundirnar voru algengir ís-
lenskir fuglar eins og fýll, álft og
grágæs, en einnig sjaldgæfar teg-
undir, sem millilenda hér eða eru
tímabundnir gestir.
„Bjartmávurinn er dæmi um
fugl sem hefur hér vetursetu og
tildran er skrautlegur vaðfugl,
sem millilendir hér á vorin á leið
sinni til varpstöðvanna á Græn-
landi. Eins sjáum við talsvert af
bjargdúfu sem menn eru að velta
fyrir sér hvort sé villidúfa komin
frá Færeyjum og Skotlandi eða
afkomandi eldisdúfu hérlendis,“
segir Halldór.
Nánar á www.na.is og www.sim-
net.is/ffau/. -kþb
Farfuglar boðnir velkomnir
Stelkur er einn af vaðfuglunum sem alltaf sjást að sögn Halldórs.
MYND/SKARPHÉÐINN G. ÞÓRISSON
Mikið er af æðarfugli á Norðfirði, þar sem fuglaskoðunardagur verður haldinn 10.
maí. MYND/SKARPHÉÐINN G. ÞÓRISSON
Að sögn Halldórs Stefánssonar hjá Náttúrustofu Austurlands er áhugi á fuglaskoðun alltaf að aukast. MYND/SKARPHÉÐINN G. ÞÓRISSON