Fréttablaðið - 08.08.2008, Blaðsíða 64
ÚR FIMM Í SEX
28 8. ágúst 2008 FÖSTUDAGUR
menning@frettabladid.is
Stóreflis myndlistarsýning, sem
tengir saman átta sýningar, var
opnuð um síðustu helgi í Döl-
unum og í Reykhólasveit. Sýn-
ingarnar standa yfir á nokkrum
stöðum á svæðinu frá Búðardal
til Reykhóla, nánar tiltekið á
Skarðsströnd, í Saurbæ og á
Króksfjarðarnesi.
Kveikjan að þessari hugmynd er
löngun aðstandenda sýningar-
innar til að sækja út fyrir hefð-
bundna sýningarsali og skapa
tilefni til að dveljast og vinna að myndlist úti á
landi; sækja hugmyndir og vinna út frá náttúru
og menningu landsins, efna til samstarfs við
heimamenn og að draga sýningargesti í ferðalag
um hinar fallegu sveitir Dalasýslu og Reykhóla-
sveitar.
Hver þátttakandi hefur valið sér sýningarstað til
þess að vinna með, og eru flest verkin unnin
út frá staðháttum og sögu
svæðisins.
Sýningarstaðirnir eru af ýmsum
toga, húsarústir, eyðibýli,
kaupfélag eða tiltekið svæði í
sveitinni.
Myndlistarmennirnir sem
standa að þessari sýningu eru
þau Eric Hattan, Hildigunnur
Birgisdóttir, Hreinn Friðfinns-
son, Kristinn G. Harðarson,
Magnús Pálsson, Sigurður
Guðjónsson, Sólveig Aðal-
steinsdóttir og Þóra Sigurðardóttir.
Vert er að vekja athygli á sýningu þessari þar
sem að henni lýkur nú á sunnudag. Þeir sem
hafa áhuga á að skoða verkin geta nálgast bæk-
ling sem inniheldur kort af svæðinu, þar sem
búið er að merkja sérlega við sýningarstaði, á
öllum bensínstöðvum og verslunum í Dölunum
og í Reykhólasveit. - vþ
Dalir og hólar um helgina
DALIR OG HÓLAR Áhugaverð verk á
víð og dreif um íslenskar sveitir.
Kl. 20
Tvíeykið Aurora Borealis, skipað
þeim Margréti Hrafnsdóttur sópran
og Ólöfu Sigurvinsdóttur sellóleik-
ara, heldur tónleika í Þjóðlagasetr-
inu á Siglufirði í kvöld kl. 20. Þær
munu flytja íslensk þjóðlög í
einföldum og tærum útsetningum
Sigursveins D. Kristinssonar,
Hallgríms J. Jakobssonar, Jórunn-
ar Viðar og Ferdinands Rauter.
Kammersveitin Ísafold flyt-
ur tónlist eftir tónskáldið
György Ligeti á tónleikum
á Kjarvalsstöðum í kvöld.
Tónleikarnir verða með
óhefðbundnu sniði þar sem
að safnarýmið verður nýtt
til tónlistarflutnings á ný-
stárlegan hátt.
Kammersveitin Ísafold ræðst ekki
á garðinn þar sem hann er lægstur
á tónleikum sínum í kvöld, heldur
flytur fjögur verk eftir einn mesta
áhrifavald 20. aldar tónlistar,
György Ligeti. Ligeti lést fyrir
tveimur árum en þó eru mörg verka
hans löngu orðin klassísk og eru
vinsæl bæði í geisladiskaútgáfu og
til flutnings í tónleikahúsum. Tón-
listin er þrungin mikilli spennu og
notaði kvikmyndaleikstjórinn
Stanley Kubrick verk Ligetis í
þremur kvikmynda sinna, 2001: A
Space Odyssey, The Shining og
Eyes Wide Shut.
Kristján Orri Sigurleifsson,
kontrabassaleikari Ísafoldar, segir
verkin sem flutt verða vera fremur
ólík innbyrðis. „Við flytjum tvö
verk fyrir kammersveit og einnig
tvö minni verk, blásarakvintett og
strengjakvartett. Þessi minni verk
eru frá því snemma á ferli Ligetis;
hann var rétt um þrítugt þegar
hann samdi þau og í þeim má heyra
áhrif frá ungverskum tónlistararfi
og menningu. Stærri verkin tvö
samdi hann eftir að hann var búinn
að helga sig því um nokkurn tíma
að semja svokallaðar míkrópólý-
fóníur, sem eru afar flókin tónverk.
Þessi kammerverk mynda þannig
eins konar brú frá míkrópólýfón-
íunum og yfir í það sem hann ein-
beitti sér að næst, sem var að semja
tónlist sem byggði á afrískum tökt-
um.“
Kammersveitin Ísafold mun í
kvöld nýta rými Kjarvalsstaða á
óvenjulegan hátt sem minnir í raun
fremur á myndlistarsýningar en
hefðbundna tónleika. Sveitin mun
flytja verkin fjögur hvert í sínum
sal og mun tónlistarflutningurinn
að auki vera merktur með nafni,
höfundi og efniviði líkt og um
myndlistarverk væri að ræða.
„Hugmyndin að baki þessari upp-
setningu á tónleikunum spratt út
frá því að við gengum um safnið,
virtum fyrir okkur húsnæðið og
sýninguna sem það hýsir og kom-
umst að þeirri niðurstöðu að okkur
þótti sum verkanna sem við flytj-
um eiga betur við suma salina en
aðra,“ útskýrir Kristján. „Okkur
þótti á endanum upplagt að leyfa
forminu á sölunum dálítið að ráða
forminu á tónlistarflutningnum og
því ákváðum við að halda tónleik-
ana með þessu sniði.“
Tónleikarnir hefjast á Kjarvals-
stöðum í kvöld kl. 20. Miðaverð er
2500 kr., en 1500 kr. fyrir náms-
menn og eldri borgara. Miða má
nálgast á www.midi.is og við inn-
ganginn. vigdis@frettabladid.is
Ligeti í fjórum sölum
KAMMERSVEITIN ÍSAFOLD Leikur á áhugaverðum og frumlegum tónleikum á Kjarvalsstöðum í kvöld.
Sýningin Hole Up verður opnuð í
Listasal Mosfellsbæjar á morgun
kl. 14. Myndlistarkonan Jóna Hlíf
Halldórsdóttir sýnir þar sam-
nefnda innsetningu sem er mynd-
uð úr skúlptúr og hljóðverki.
„Hole Up er lokahnykkurinn á
röð innsetninga þar sem ég hef
verið að prófa mig áfram með ljós
og efni til að kveikja hughrif í
rýmum,“ segir Jóna. „Áður hef ég
haldið einkasýningu á Akureyri og
tekið þátt í samsýningu í Portúgal
þar sem ég nota rýmið í bland við
ákveðna grunnþætti til að búa til
nokkurs konar hella eða hreiður.
Lokaniðurstaðan í ferlinu er ólík í
hvert skipti, innsetningarnar
verða aldrei eins í uppsetning-
unni, þótt spilað sé með sömu
grunnþætti. Einhver óræður kuldi
er samt kjarninn í öllum hellun-
um, eins og líklega í flestum hell-
um, nema mínir hellar hafa líka
við sig einhver notalegheit.“
Titill sýningarinnar vísar að
sögn Jónu til árstímans, nú þegar
dagur er tekinn að styttast og nótt-
in að lengjast. „Rökkrið er farið að
sækja á,“ segir Jóna Hlíf. „Fólk
fer að sækjast í að marka sér holur
og híði og sumir draga sig í hlé
fram í apríl eða maí. Kannski er
þetta hellalíf á veturna partur af
útileguarfleifðinni, ég veit það
ekki. Allavega er það enn þá ríkt í
okkur að geta hjúfrað okkur upp
að sjónvarpinu, sófanum og tepp-
inu þegar veturinn er sem kaldast-
ur.”
Jóna Hlíf fæst við innsetningar,
skúlptúra, vídeó, málverk og texta
í listsköpun sinni. Hún starfar sem
sýningarstjóri við Gallerí Ráðhús
og VeggVerk á Akureyri og var
einn af umsjónarmönnum Gallerís
BOX frá stofnun til 2008. Fram
undan hjá Jónu er sýning í D-sal
Listasafns Íslands, Grasrótarsýn-
ing í Verksmiðjunni á Hjalteyri og
á næsta ári tekur hún þátt í sam-
sýningu í Vancouver. - vþ
Skriðið í vetrarhíði
HOLE UP Brot úr verki eftir Jónu Hlíf
Halldórsdóttur.
>Ekki missa af …
Hinum árlegu Kammertónleik-
um á Kirkjubæjarklaustri sem
fara fram í félagsheimilinu
Kirkjuhvoli í kvöld kl. 21, á
morgun kl. 17 og á sunnudag
kl. 15. Flytjendur á tónleikun-
um í ár eru Ágúst Ólafsson,
Ástríður Alda Sigurðardóttir,
Eyjólfur Eyjólfsson, Sigrún
Eðvaldsdóttir og Trio Nordica.
Á tónleikunum blandast því
fögur tónlist fögru umhverfi.
Sigurgeir Sigurjónsson tók
á móti Myndstefsverðlaun-
unum 2008 úr hendi herra
Ólafs Ragnars Grímssonar
við hátíðlega athöfn í Lista-
safni Íslands í gær.
Viðurkenninguna hlýtur Sigurgeir
fyrir ljósmyndir sínar af mönn-
um, dýrum og landi sem draga
upp sterka drætti úr íslenskum
veruleika og sem sjá má í fjöl-
mörgum og margvíslegum ljós-
myndabókum hans sem hafa
komið út með jöfnu millibili á síð-
sutu tveimur áratugum.
Heiðursverðlaun Myndstefs
nema samtals einni og hálfri millj-
ón króna og var þeim nú úthlutað í
fjórða sinn. Helming verðlauna-
fjárins leggur Landsbanki Íslands,
sem er fjárhagslegur bakhjarl
þeirra, til á móti framlagi Mynd-
höfundasjóðs Íslands. Aðrir til-
nefndir listamenn voru að þessu
sinni Eggert Pétursson listmálari,
Snæfríður Þorsteins og Hildigunn-
ur Gunnarsdóttir hönnuðir, Stein-
unn Sigurðardóttir tískuhönnuður,
Studio Grandi, Vík Prjónsdóttir
vöruhönnun og Vytautas Narbutas
sviðsmyndahönnuður. Dómnefnd
var skipuð þeim Guju Dögg
Hauksdóttur, arkitekt, Kristjáni
Pétri Guðnasyni, ljósmyndara, og
Björgólfi Guðmundssyni, stjórnar-
formanni Landsbanka Íslands.
Sigurgeir er einn af þekktustu
ljósmyndurum okkar. Hann nam
listgrein sína á gerólíkum stöðum;
Reykjavík, Stokkhólmi og Kali-
forníu. Fyrst á ferli sínum vann
hann einkum við iðnaðarljósmynd-
un á stofunni Ímynd sem hann
stofnaði ásamt Guðmundi Ingólfs-
syni. Hann stofnaði síðar fyrir-
tækið Svipmyndir og tók þá að
vinna skipulega að bókagerð og
fylgdi þar í fótspor Hjálmars
Bárðarsonar og fleiri, en útgáfu
ljósmyndabóka tók að vaxa fiskur
um hrygg með bókverkum Sigur-
geirs á áttunda og níunda áratugn-
um. Má nefna syrpu einstakra
landslagsbóka um Ísland sem
hófst með bókunum Íslandslag
(1992), Ísland - landið hlýja í norðri
(1994), Amazing Iceland (1998),
The World of Moving Water (1999),
og í kjölfar þeirra komu Lost in
Iceland / Íslandssýn (2002), Found
in Iceland/Landið okkar (2006) og
Made in Iceland/Innan Lands
(2007). Þá vakti hann mikla athygli
fyrir bók sína Íslendingar/Ice-
landers (2004) þar sem myndavél-
in fangar hreina og beina lands-
menn í sínu eigin umhverfi,
sterkar myndir sem settar voru
upp á sýningu á Austurvelli sum-
arið 2004 og fyrir stuttu kom út
bókin Hestar (2008).
pbb@frettabladid.is
Sigurgeir vann
LJÓSMYNDIR Sigurgeir Sigurjónsson tekur við heiðursverðlaunum Myndstefs í gær.
FRÉTTABLAÐIÐ/STEFÁN