Fréttablaðið - 26.08.2008, Blaðsíða 6

6 26. ágúst 2008 ÞRIÐJUDAGUR
Miele þvottavél verð frá kr.:
109.995
Sportlínan
frá Miele
Hreinn sparnaður
A B
Kynntu þér málið hjá sölumönnum Eirvíkur
VERSLUN Tilraunir Ferskra kjöt-
vara og Aðfanga, dótturfyrirtækja
Haga, til innflutnings á lambakjöti
frá Nýja-Sjálandi, Írlandi og Spáni
hafa steytt á synjunum eða drætti
á afgreiðslu innflutningsumsókna
hjá sjávarútvegs- og landbúnaðar-
ráðuneytinu.
Fyrirtækin sóttu í febrúar á síð-
asta ári um leyfi til innflutnings á
tæplega hundrað kílóum af lamba-
kjöti frá Nýja-Sjálandi. „Því var
hafnað vegna tæknilegra mistaka
við umsóknina. Eftir leiðréttingu
sóttum við um aftur og fengum
eftir þrjá mánuði jákvæða umsögn
Landbúnaðarstofnunar við inn-
flutningi,“ segir Leifur Þórsson,
framkvæmdastjóri Ferskra kjöt-
vara. „Landbúnaðarráðherra, sem
þá var Guðni Ágústsson, hafnaði
samt innflutningnum og vildi að
gerð yrði sérstök úttekt á landbún-
aðinum á Nýja-Sjálandi áður en
innflutningur lambs yrði heimilað-
ur. Nýja-Sjáland er stærsta útflutn-
ingsland lambakjöts í heiminum.“
Fyrirtækin kvörtuðu til umboðs-
manns Alþingis vegna málsins. Í
svari ráðuneytisins við fyrirspurn
umboðsmanns um málið kemur
fram að fyrirhugaðar séu viðræð-
ur við Nýsjálendinga um gerð tví-
hliða samnings um viðskipti með
lambakjöt.
Fyrirtækin sóttu í ágúst 2007
um innflutning á lambakjöti frá
Írlandi og í október 2007 um inn-
flutning á kindakjöti frá Spáni.
Umsóknirnar hafa ekki enn verið
afgreiddar. Þau hafa kvartað til
umboðsmanns Alþingis vegna
dráttarins. Leifur segir að almennt
séu umsóknir um innflutning kjöts
afgreiddar á örfáum vikum. „Ég
skil ekki af hverju maður fær
alltaf svör strax við innflutningi á
svína- og nautakjöti, en ekki á
lambakjöti,“ segir hann. Segist
hann velta fyrir sér hvort pólitísk-
ur vilji standi gegn innflutningi
lambakjöts.
Landbúnaðarráðuneytið hefur
síðari ár auglýst tollkvóta á inn-
flutningi landbúnaðarvarnings í
samræmi við alþjóðlegar skuld-
bindingar Íslands. Tollkvótinn
felur í sér heimild til innflutnings
á lægri tollum en almennt gerist.
Ekki hefur þó verið auglýstur toll-
kvóti fyrir lambakjöt og hafa fyrir-
tækin kvartað af þeim sökum til
umboðsmanns Alþingis. Ráðuneyt-
ið segir óvíst hvenær lambakjöt-
stollkvóti verði boðinn út. Það hafi
ekki verið gert því hingað til hafi
ekki verið áhugi fyrir innflutningi
lambakjöts.
gunnlaugurh@frettabladid.is
Innflutt lambakjöt
steytir á ráðuneyti
Umsóknum fyrirtækjanna Aðfanga og Ferskra kjötvara um innflutning lamba-
kjöts hefur ýmist verið synjað eða þær beðið afgreiðslu mánuðum saman í sjáv-
ar útvegs- og landbúnaðarráðuneytinu. Málið á borði umboðsmanns Alþingis.
LAMBAKJÖT Ferskum
kjötvörum og Aðföngum
hefur gengið erfiðlega
að fá leyfi til innflutnings
á lambakjöti.
FRÉTTABLAÐIÐ/VILHELM
LEIFUR ÞÓRSSON
FRÉTTABLAÐIÐ/INGÓLFUR
ARNARSON
Blá en ekki gul íþróttahús
Íþróttamannvirki á Jaðarsbökkum á
Akranesi verða blá að lit samkvæmt
ákvörðun byggðarráðs og þar með
í samræmi við eina af tillögum
arkitekts. Einn bæjafulltrúinn lét bóka
að hann teldi að mannvirkin ættu að
vera gul. Það er litur Íþróttabandalags
Akraness.
AKRANES
Bílvelta við Hellu
Ökumaður og farþegi jeppabifreiðar
voru fluttir á slysadeild Landspítalans
í Reykjavík eftir bílveltu við Hellu í
fyrrinótt. Meiðsl þeirra reyndust ekki
alvarleg en bílstjórinn skarst nokkuð
við veltuna. Tveir aðrir farþegar voru
í bílnum og sluppu þeir án teljandi
meiðsla.
LÖGREGLUFRÉTTIR
UMHVERFISMÁL Fimmtungur sorphirðu frá íbúðar-
húsum í Reykjavík verður einkavæddur samkvæmt
tillögu sem meirihlutinn í borgarstjórn lagði fram í
síðustu viku. Bjóða á út sorphirðu í ákveðnum
hverfum til reynslu í þrjú ár. Frekari ákvarðanir um
útboð verði teknar að þeim tíma liðnum.
„Það hefur verið mjög mikil sátt um sorphirðu í
Reykjavík,“ segir Þorleifur Gunnlaugsson, borgar-
fulltrúi Vinstri grænna, sem sæti á í umhverfis- og
samgönguráði.
Hann segir þjónustukannanir sýna að Reykvíking-
ar séu mjög ánægðir með þjónustuna. „Þetta er
grunnþjónusta sem er lífsnauðsynleg fyrir borgar-
samfélagið.“
Hann óttast fákeppni og segir aðeins tvo einkaaðila
sinna sorphirðumálum á suðvesturhorninu, sem sé
ekki sérlega gott umhverfi fyrir útboð.
Þá segir hann starfsaldur starfsmanna mjög langan
og nefnir sem dæmi tvo starfsmenn sem starfað hafa
í yfir 50 ár við sorphirðu. „Þarna myndi missa
vinnuna fólk sem yrði mjög mikil eftirsjá að.“
Þorleifur segir rök meirihlutans fyrir útboðinu
vera óstaðfestar fregnir af því að það sé hugsanlega
tíu prósenta lægri kostnaður af sorphirðu í Kópavogi.
„Það er ekki hægt að minnka kostnaðinn öðruvísi
en að ganga á starfsfólkið. Það held ég að sé verið að
gera í þessum nágrannasveitarfélögum og það er
nokkuð sem ég vil ekki sjá.“ - ovd
Meirihluti borgarstjórnar stefnir á útboð sorphirðu frá íbúðarhúsum í Reykjavík:
Lífsnauðsynleg grunnþjónusta
RUSL Í REYKJAVÍK Meðalstarfsaldur starfsmanna sorphirðu
Reykjavíkur er 12 ár. FRÉTTABLAÐIÐ/HEIÐA
VÍSINDI Koma á á fót Kötlusetri í
Mýrdalshreppi.
Samkvæmt tillögu sem
sveitarstjórnin samþykkti
samhljóða verður setrið sjálfs-
eignarstofnun með það að
meginmarkmiði að stunda
rannsóknir á eldfjallinu Kötlu og
áhrifum Kötlugosa á mannlíf og
náttúrufar.
Þá er Kötlusetrinu sömuleiðis
ætlað hlutverk á sviði land- og
ferðamálafræða og á sviði
menningarmála.
Leita á eftir samstarfi við þá
aðila sem kunna að hafa áhuga á
málinu.
- gar
Nýtt fræðasetur í Mýrdalnum:
Rannsaka Kötlu
og áhrif eldgosa
Ert þú sátt(ur) við silfrið?
Já 93,6%
Nei 6,4%
SPURNING DAGSINS Í DAG:
Vilt þú virkja Bitru á Hellis-
heiði?
Segðu skoðun þína á vísir.is
LÖGREGLUMÁL Tveir karlmenn milli tvítugs og
þrítugs voru í gær fluttir í fangageymslur lögregl-
unnar eftir að hafa ekið inn á skólalóð við Austur-
bæjarskóla og viðhaft þar glæfraakstur. Hópur
barna var á skólalóðinni og mátti vel sjá á myndum
sem tökumaður mbl.is náði að ökuníðingurinn ók
ítrekað mjög nálægt börnunum með afar glæfraleg-
um hætti. Kristján Ó. Guðnason, yfirmaður umferð-
ardeildar lögreglunnar á höfuðborgarsvæðinu,
segist vart muna eftir öðru eins háttarlagi og að
ströng viðurlög væru við slíku framferði.
Ökumaður bílsins er grunaður um brot á umferð-
arlögum, svo sem að hafa ekki sýnt nægjanlega
aðgát við akstur, hraðakstur og akstur undir
áhrifum fíkniefna. Þá er hann grunaður um að hafa
með akstrinum gerst sekur um brot gegn hegningar-
lögum með því að stefna lífi eða heilsu annarra í
háska. Hann er einnig grunaður um vörslu fíkniefna.
Bifreið ökumannsins var haldlögð af lögreglu og
bíður skoðunar með tilliti til öryggisbúnaðar hennar.
Ákvörðun verður tekin síðar um hvort krafist verður
upptöku á henni.
- kdk
Ökuníðingar handteknir eftir ofsaakstur innan um börn við Austurbæjarskóla:
Grunaður um fíkniefnaakstur
OFSAAKSTUR Á SKÓLALÓÐ Ef eitthvað hefði farið úrskeiðis við
glæfraakstur ökumannsins hefði geta farið mjög illa. MYND/MBL.IS
KJÖRKASSINN