Fréttablaðið - 22.12.2009, Blaðsíða 74
58 22. desember 2009 ÞRIÐJUDAGUR
Real Madrid er stærsta fótboltafélag
í heimi og allt sem tengist liðinu er
í samræmi við það. Talið er að liðið
eigi um 300 milljónir stuðnings-
manna úti um allan heim og talan
fer hækkandi með hverjum deginum
sem líður. Þrátt fyrir að eiga mikla
peninga og vera ávallt með marga
af bestu leikmönnum heims innan-
borðs hefur liðið ekki náð að sanna
sig og vinna þær keppnir sem bestu
lið heims vilja vinna hverju sinni.
Í fyrri forsetatíð Florentino Pérez
(2000-2006) var gamla æfinga-
svæði liðsins selt. Þessi sala var
afar umdeild og þótti mörgum Real
Madrid hafa fengið of mikið greitt
fyrir svæðið. Margir töldu að það
hafi verið gert til þess að reisa við
fjárhag félagsins, sem stóð illa. Með
sölunni hreinsaði Real Madrid 270
milljóna evra skuld sína og keyptir
voru leikmenn eins og hinn brasil-
íski Ronaldo, Zidane og Figo.
Nokkrum árum síðar var opnað
nýtt æfingasvæði sem er það allra
stærsta sinnar tegundar í heiminum
í dag. Æfingasvæðið nefnist Ciudad
Real Madrid og myndi kallast Real
Madrid-borgin á íslensku. Svæðið er
1,2 milljón fermetrar og heldur utan
um æfingar og keppnir allra flokka
og liða Real Madrid, nema auðvit-
að aðalliðsins sem spilar á Santiago
Bernabeu. Ekki er búið að klára
allar framkvæmdir á svæðinu en
kostnaðurinn er nú um 100 milljónir
evra. Því mun svæðið kosta félagið
skildinginn þegar það er tilbúið.
Svæðið er því gríðarlega stórt
og á því má finna tíu fótboltavelli
í öllum stærðum og gerðum. Allir
vellirnir hafa sinn tilgang og þjónar
hver og einn hverjum flokki. Einn-
ig á hver flokkur sitt búningahús.
Grastorfurnar á völlunum eru þær
sömu og á Santiago Bernabeu og eru
þær fluttar inn frá Hollandi. Einn-
ig er að finna leikvöll varaliðs Real
Madrid sem er nefndur eftir Alfredo
di Stéfano og tekur hann um 6.000
manns í sæti en á í framtíðinni eftir
að taka 25 þúsund manns í sæti.
Stærsti hluti svæðisins er undir
aðstöðu og allt í kringum aðalliðið.
Á svæðinu er 3.000 fermetra
æfingasalur. Sextíu prósent af heitu
vatni sem er notað á svæðinu eru
hituð upp af sólarorku en ekki raf-
magni.
Á æfingasvæðinu starfa um 200
manns; þar má finna garðyrkju-
menn, kokka, móttökufólk, einka-
þjálfara og öryggisverði svo eitt-
hvað sé nefnt. Öryggisgæslan er
mjög öflug og er svæðið vel vakt-
að og öryggisverðir á hverju horni.
Enda engin furða þar sem fjölmarg-
ir aðdáendur liðsins reyna sitt besta
til að komast inn fyrir girðingarn-
ar til að þess að sjá stjörnurnar.
Svæðið er vel girt af og öryggis-
bifreiðar sveima um í leit að óboðn-
um gestum. Einn öryggisvarðanna
er hann Luis en hann hefur starf-
að frá opnun svæðisins og þekkir
hvern krók og kima þess eins og
lófann á sér.
Luis fékk það hlutverk að ganga
með undirrituðum um svæðið og
fræða hann um það sem fyrir augu
bar. Luis er langt frá því að vera
alvörugefinn og stutt er í hlátur-
inn þó að hann sinni starfi sínu
greinilega vel. Hann er mjög vin-
sæll meðal fólksins á svæðinu sem
heilsar honum og nánast hneigir sig
þegar hann gengur framhjá.
„Þetta er mjög stórt svæði og því
þarf öryggisgæslan að vera í lagi.
Það eru alltaf einhverjir að reyna
komast inn og það er mitt starf sem
og hinna öryggisvarðanna að koma í
veg fyrir að það gerist því leikmenn
liðsins vilja ekki óþarfa áreiti,“
segir Luis og kallar um leið í tal-
stöðina á félaga sinn og spyr frétta.
Svar félagans er á þann veg að tvær
ungar stúlkur séu við bílastæði leik-
manna, óvelkomnar. Öryggisgæslan
hefur greinilega brugðist aðeins en
Luis segist vera á leiðinni. Undir-
rituðum þótti þetta hið besta mál
og var gaman að sjá hvernig Luis
myndi bregðast við þessu. „Afsakið,
en við þurfum aðeins að fara út úr
leið, ég þarf að sinna smá vanda-
máli sem kom upp,“ segir Luis og
strunsar áfram, greinilega ekki
sáttur. Stúlkurnar sem reyndu að
fá áritun hjá fyrirliða liðsins, Iker
Casillas, áttu ekkert í Luis, sem
vísaði þeim umsvifalaust á brott og
sagði þeim að fara annað, því þetta
væri bannsvæði. „Öryggisgæslan
hefur greinilega brugðist eitthvað
og trúlega var það fólkið við aðal-
hliðið,“ útskýrir Luis.
Ferðin hélt áfram og Luis sýndi
svæðið og sagði undirrituðum frá
öllu. Fyrir hvaða flokka hvaða völl-
ur var og hvaða starfsemi var í
hverri byggingu. Ekki var nóg með
það því þegar glæsikerra ók fram-
hjá var Luis með það á hreinu hvaða
leikmaður var við stýrið. Aftur
blöstu við okkur óboðnir gestir en
að þessu sinni saklaus fjögurra
manna fjölskylda sem stoppaði allar
glæsikerrurnar og fékk áritanir eða
myndir. Luis gekk brosandi fram-
hjá fólkinu og veifaði vinalegra til
þess og sagði að fólk mætti vera á
vissum stöðum en ekki á bílastæði
leikmanna.
Luis hefur alla sína hunds og
kattar tíð stutt Real Madrid og
segir of seint að breyta því. „Bestu
ár liðsins voru frá 1980 til 1990. Þá
voru hér alvöru leikmenn með Real
Madrid-hjarta. Þá spiluðu leikmenn
eins og Emilio Butragueño, Míchel,
Hugo Sánchez, Manuel Sanchís og
Martín Vázquez,“ segir Luis með
bros á vör.
Svæðið hefur allt sem þarf til
þess að þjálfa og æfa þá bestu í
knattspyrnu. Ekkert hefur verið
sparað við uppbygginguna á svæð-
inu og er þetta merki um að Real
Madrid er miklu meira en bara fót-
boltafélag. Allt sem fylgir þessu
félagi er eins gott og hægt er að
vera. Það á stórkostlegan heimavöll
og áhorfendur sem mæta hvað best
á völlinn að meðaltali í Evrópu. Þó
að árangurinn undanfarið hafi ekki
skilað mörgum titlum í hús er ekki
hægt að kenna aðstöðu og umgjörð
félagsins um, en oftast sannast hið
fornkveðna að peningar og sýndar-
mennska kaupa ekki titla, meira
þarf til.
Real Madrid-borgin
Æfingasvæði spænska stórliðsins Real Madrid er engu líkt. Þetta er stærsta æfingasvæði heims og hefur upp-
bygging þess þegar kostað yfir 100 milljónir evra. Þar er allt til alls og vel er hugsað um hinar rándýru stjörnur
félagsins. Mikael Marinó Rivera kíkti við og fékk skoðunarferð um svæðið.
AÐALVÖLLURINN Margir knattspyrnuvellir í fullri stærð eru á svæðinu. Þar sem aðal-
liðið æfir er pláss fyrir þúsundir áhorfenda. NORDIC PHOTOS/AFP
SJÓÐHEITUR Eldheitur stuðningsmaður Real fær hér að snerta goðið Cristiano Ronaldo við bílastæði leikmanna. NORDIC PHOTOS/AFP
■ Um sextíu prósent af heita
vatninu sem notað er á svæðinu
eru hituð með sólarorku.
■ Fleiri en sextíu vellir í sex
löndum voru skoðaðir áður en
ákveðið var hvers konar gras
skyldi nota á vellina. Grasið sem
að lokum var valið kemur frá
Hollandi.
■ Aðallið félagsins er með heila
byggingu undir sig. Þangað
mega minni spámenn ekki stíga.
■ Ekki eru bara fótboltavellir á
svæðinu því þar eru einnig
strandblaksvellir sem leikmenn
liðsins nota iðulega. Þeir hita
venjulega upp í skallatennis í
sandinum.
■ Líkamsræktarsalurinn er yfir
3.000 fermetrar.
■ Risastór salur með gervigrasi
er við hlið búningsklefans en
þar geta menn hitað upp eða
hlaupið sig niður þegar veðrið
er vont.
■ Æfingavöllur aðalliðsins, sem
er nefndur í höfuðið á Alfredo
di Stefano, er með stúku fyrir
6.000 manns en mun rúma 25
þúsund manns þegar fram-
kvæmdum er lokið.
■ Alls eru tólf fótboltavellir í fullri
stærð á svæðinu.
STAÐREYNDIR
UM SVÆÐIÐ
LUIS Hefur unnið á svæðinu frá
opnun og leiddi útsendara Frétta-
blaðsins í allan sannleika um það.
FRÉTTABLAÐIÐ/MIKAEL
Aldrei hefur rekstrarkostnaður Real Madrid verið meiri
en nú, enda engin furða þar sem dýrustu og bestu
knattspyrnumenn heims leika með liðinu. Real
Madrid eyddi metfé í leikmannakaup síðastliðið
sumar og má þá helst nefna þá Kaka og Ronaldo.
Stjórnendur félagsins með Florentino Perez í
broddi fylkingar ætla sér mikið þetta tímabilið
og liðinu gengur vel þó svo að yfirburðir
þess hafi ekki verið algjörir eins og margir
héldu.
Nú eru aðvörunarbjöllur farnar að
hringja og það þarf peninga í kassann.
Miklum flugeldasýningum fylgir mikill
kostnaður og stuðningsmenn Real Madrid
fá svo sannarlega að finna fyrir því.
Stjórnendur Real Madrid tóku upp á
því að hækka miðaverð mikið í upphafi
þessarar leiktíðar.
Fyrir tveimur árum kostaði ódýrasti miðinn
á heimavöll Real Madrid 25 evrur en nú kost-
ar sá ódýrasti fjörutíu evrur. Það er gríðarleg
hækkun fyrir meðaljóninn hér í Madríd sem
hefur gaman af því að skella sér á heimaleiki
liðsins. Ekki gengu allar áætlanir stjórnarinnar eftir
um að treyjusala af þeim félögum Kaka og Ronaldo
myndi slá öll met.
Annað kom á daginn og salan hefur verið afar
dræm frá því að kapparnir skrifuðu undir við Real
Madrid.
Þessir nýju leikmenn eiga sameiginlega ekki
roð í David Beckham en treyjurnar hans
seldust eins og heitar lummur og stjórn-
endur Real Madrid brostu allan hringinn.
Brosið er hins vegar ekki alveg eins breitt
núna.
Þar sem gamla æfingasvæðið var hafa
nú risið fjórir miklir og virðulegir turnar
sem sjást um alla borgina. Þessir
turnar eru tákn nýja viðskiptahverfisins
í Madríd.
Frá nýja æfingasvæðinu tróna
turnarnir í fjarska og segja margir
Madrídarbúar sem og aðrir Spánverjar
að þetta sé áminning fyrir Real Madrid
um það af hverju liðið er jafn vel sett og
það er í dag.
REAL FARIÐ AÐ OKRA Á ÖLLU
FLORENTINO
PEREZ