Skinfaxi - 01.11.2010, Blaðsíða 14
14 SKINFAXI – tímarit Ungmennafélags Íslands
Björn Björnsson, einn
þjálfara Evrópumeistara
Gerplu í hópfimleikum:
„Hópurinn þéttur
og það ríkir innan
hans gleði og ást
fyrir fimleikum“
Kvennalið Gerplu í hópfimleikum náði
frábærum árangri þegar það gerði sér lítið
fyrir og vann Evrópumeistaratitilinn í Malmö
nú á haustdögum. Þessi árangur vakti mikla
athygli en sigur stúlknanna var afar sannfær-
andi. Þetta er besti árangur Íslendinga í fim-
leikum og kemst tvímælalaust á spjöld
íslenskrar íþróttasögu.
Björn Björnsson, einn þjálfara liðsins,
sagði eftir heimkomuna að stúlkurnar hefðu
sett sér markmið leynt og ljóst og þau hefðu,
þegar upp var staðið, gengið fullkomlega
eftir. Eftir að stúlkurnar lentu í öðru sæti í
Belgíu 2008 hefði ákveðinn kjarni hópsins
talað sig saman um það, eftir að heim var
komið, að farið yrði tveimur árum síðar og
málin kláruð. Æfingar og annar undirbún-
ingur fyrir mótið í Malmö gengu vel.
Bara undir okkur komið
„Við vissum undir niðri að við gætum far-
ið alla leið en eins og oft vill verða töldum
við að það væri kannski ekki algjörlega
undir okkur komið. Okkur þyrfti að sjálf-
sögðu að ganga vel á meðan keppninaut-
unum gengi illa. Á síðustu metrunum fyrir
mótið í Malmö var okkur að verða ljóst að
við höfðum þetta verulega í hendi okkar.
Þetta var því bara undir okkur komið og
það að hinir gætu sigrað okkur fælist í raun
og veru frekar í því að við gerðum mistök
heldur að þeim gengi vel. Viku fyrir mótið
vorum við í endanlegri markmiðasetningu
og ég spurði þær hvað þær vildu gera í
úrslitakeppninni. Þær voru á því að þær vildu
vinna en þá greip ein orðið og sagði að
henni fyndist ekki nóg að vinna. Henni
fyndist hópurinn ekki bara þurfa að vinna
heldur þyrfti að sigra með yfirburðum. Þetta
blés hópnum sjálfstrausti í brjóst og eftir
það var aldrei vafi í huga okkar að við mynd-
um sigra. Spurningin var heldur hversu stór
sigurinn yrði en segja má að þetta hafi haft
afgerandi áhrif á sjálftraustið sem var innan
hópsins. Þetta breytti líka mínum þanka-
gangi og ég fór að horfa á verkefnið með
öðrum augum,“ sagði Björn Björnsson í
spjalli við Skinfaxa um nýkrýnda Evrópu-
meistara í hópfimleikum.
Eftir fyrri dag keppninnar var Gerpla með
forystu. Að sögn Björns var liðið þá ekki enn
búið að ná markmiðum sínum sem það hafði
sett sér. Liðið hafði ætlað sér að skora 50
stig en skoraði 49,5. Björn sagði að liðið
setti sér það markmið að bæta sig á hverju
áhaldi á seinni deginum og ná líka 50
stigum og það gekk eftir.
FIMLEIKAR:
Við höfum ekki þurft
að fórna neinu
– Var ekki meiri háttar gaman að vinna í þessu
ferli með stelpurnar sem skilaði ykkur síðan
alla leið?
„Ég hef átt langt samstarf með mörgum
af þessum stelpum. Við erum mjög náinn
hópur að mörgu leyti og það ríkir mikið
traust innan hópsins. Það hefur að sjálfsögðu
hjálpað okkur í öllu þessu ferli. Þjálfarastarf-
ið er ekki mitt aðalstarf og ég væri ekki í
þessu nema mér þætti það mjög skemmti-
legt. Það sama á við um allar stelpurnar. Við
lítum því ekki á þetta sem eitthvað sem við
erum tilneydd til að gera heldur það sem
við veljum. Okkur þykir því leiðinlegt þegar
við heyrum hvernig íþróttamenn tala, að
þeir hafi þurft að fórna hinu og þessu til að
vera framúrskarandi íþróttamenn. Því höfum
við viljað snúa þessu við og segja að við höf-
um ekki þurft að fórna neinu heldur höfum
við valið að stunda íþróttir. Það sé okkar val
og við fáum miklu miklu meira í staðinn í
raun og veru. Við erum að fá holla og góða
hreyfingu. Við erum að setja okkur markmið
með að ná þeim og við erum að hitta bestu
vini okkar á hverjum einasta degi í kannski
þrjá klukkutíma í senn. Hvers meira er hægt
að óska?“ sagði Björn.
Stefnan að halda áfram
á sömu braut
– Nú hefur stefnan verið tekin á Norðurlanda-
mót næsta haust?
„Já, það mót verður haldið í Noregi í byrj-
un nóvember eftir tæpt ár. Við vorum Norður-
landameistarar 2007 og lentum í þriðja sæti
2009. Núna komum við á næsta mót sem
handhafar Evrópumeistaratitils og það er
alveg klárt mál að það eru mörg lið þarna
úti sem renna til þess hýru auga að standast
okkur snúninginn í Noregi. Stefna okkar er
sú að halda áfram á þeirri braut sem við
erum á en við eigum rosalega mikið inni í
þessu liði. Það eru miklir möguleikar á að
bæta sig þannig að við ætlum að halda
þeirri stefnu og reyna jafnvel að hafa meiri
yfirburði á þessu móti en því sem við vor-
um að klára. Þetta kemur kannski til vegna
þess að reglunum var breytt og það var
keppt í fyrsta sinn samkvæmt nýjum
keppnisreglum á Evrópumótinu. Þær fela
m.a. í sér að það er ekki lengur þak á þeim
erfiðleikum á æfingum sem þú getur gert.
Það var þannig áður að ef þú framkvæmd-
ir ákveðna erfiðleika þá fékkstu fulla eink-
unn. Svo skipti síðan engu máli hvort við
gerðum þetta erfiðara. Núna er búið að
opna þetta þannig að við njótum góðs af
því. Stelpurnar eru það góðar í tæknilegri
útfærslu og æfingum að þær geta gert
erfiðari æfingar en stúlkur af öðrum þjóð-
ernum þannig að við höfum grætt á því líka
og munum halda áfram að græða á því,“
sagði Björn.
Við erum fimleika-
fjölskylda
Björn sagði, þegar hann var spurður
hvort ekki væri búið að vera gefandi að
vinna með stelpunum, að starfið gæfi
honum mikið. „Mín aðalvinna er krefjandi
og því er starfið með Gerplustelpunum
stund á milli stríða. Maður lítur á það frekar
sem áhugamál en vinnu og í því felst að
maður getur dreift huganum. Við grínumst
stundum með það okkar á milli að við séum
fimleikafjölskylda. Hópurinn er það þéttur,
mikið traust ríkir innan hans, gleði og ást á
fimleikunum,“ sagði Björn Björnsson í
spjallinu við Skinfaxa.
Björn Björnsson,
einn þjálfara
Gerplu, ásamt
Helgu Guðrúnu
Guðjónsdóttur
formanni UMFÍ.
Helga Guðrún
færði liði Gerplu
blómvönd í sér-
stakri móttöku-
athöfn sem hald-
in var í Salnum í
Kópavogi.