SunnudagsMogginn - 01.05.2011, Blaðsíða 29

1. maí 2011 29
Ég drekk ekki, reyki ekki og reyni að stunda heilbrigt
líferni, þótt ég viðurkenni að stundum verður sykurátið
of mikið og ég er sólginn í góðan mat. Áfengið er mesti
óvinur kvíðasjúkdóma. Ég drakk mikið á tímabili og
drykkjan magnaði kvíðann. Ég hætti að drekka fyrir ell-
efu árum því ég gat ekki lifað því lífi sem ég lifði. Það að
segja skilið við áfengið er einhver besta og mikilvægasta
ákvörðun sem ég hef tekið á ævinni.“
Myndirðu segja að þú værir hamingjusamur maður?
„Í dag er ég mjög sáttur við líf mitt en ég vil gera betur.
Ég hef ákveðna framtíðarsýn eins og ég held að allir hafi.
Ég er líka búinn að læra að dagurinn í dag er dagurinn
sem við höfum. Og til þess að maður lifi vel er nauðsyn-
legt að sýna fólki virðingu. Ég legg mikið upp úr því að
koma fram við fólk eins og það kemur fram við mig.“
Hvað með einkalífið, þú býrð einn er það ekki rétt?
„Ég hef ákveðið að meðan ég er að vinna í mínum mál-
um sé best fyrir mig að vera einn og styrkja sjálfan mig.
Ég trúi því að ef mér sé ætlað að deila lífinu með ein-
hverjum þá muni það gerast. Ég held að það sé mjög mik-
ilvægt að vera ekki mjög leitandi í þeim efnum. Allt hefur
sinn tíma. Ef maður styrkir sjálfan og vinnur í sér þá eru
meiri líkur á að maður hitti sterkan einstakling sem deili
með manni lífinu. Ég trúi því að það gerist einn daginn.“
Æðrulaus gagnvart gagnrýni
Hversu miklu máli skiptir söngurinn þig?
„Ég hef alla tíð haft mikla unun af tónlist. Ég hef hins
vegar aldrei unað mér jafn mikið við tónlistina og ég geri í
dag. Ég hef metnað í því sem ég er að gera, vil leggja mig
fram og vera sjálfum mér til sóma. Þegar ég hóf söngnám
í Söngskóla Reykjavíkur haustið 2004 þá fann ég að ég
var að gera eitthvað mjög rétt í lífi mínu. Ég var hjá stór-
kostlegum kennara sem heitir Már Magnússon og hann
kenndi mér í fjögur ár og leiddi mig inn í undraheima
klassískrar tónlistar. Nú er Kristján Jóhannsson, sá mikli
stórsöngvari, kennari minn og hefur opnað fyrir mér
nýja vídd í tónlist. Hann hefur haft mikil áhrif á líf mitt og
söng minn. Það er ómetanlegt að vera hjá kennara eins og
honum og njóta auk þess vináttu hans.“
Þú syngur opinberlega og hefur gefið út plötur og ert
þekktur maður. Þú hefur stundum fengið harkalega
gagnrýni, hvernig tekurðu henni?
„Hvernig sem dómar hafa verið þá hafa þeir greinilega
ekki stoppað mig í því sem ég er að gera. Maður verður að
gera sér grein fyrir því að ef maður er í áberandi starfi þá
er gagnrýni alltaf til staðar, bæði jákvæð og neikvæð,
rætin og ekki rætin. Það skiptir kannski ekki svo miklu
máli hvernig hún er. Það sem skiptir máli er að vera trúr
sjálfum sér og því sem maður er að gera.
Með Guðs hjálp eru manni allir vegir færir. Ef Guð er
með manni hver er þá á móti manni? Ég er mjög trúaður
og það á sinn þátt í því að ég er æðrulaus þegar kemur að
gagnrýni. Ég hef verið mjög heppinn því ég hef aldrei
orðið fyrir aðkasti frá fólki. Fólk hefur reynst mér vel og
það er mikilvægt.“
Hvað finnst þér vera það mikilvægasta í lífinu?
„Það er öllum einstaklingum hollt að líta í eigin barm,
skoða sjálfan sig og vinna út frá því sem þeir hafa til að
bera og reyna að bæta sig. Ef hver einstaklingur í heim-
inum tæki einn og sama daginn til að líta í eigin barm þá
yrði heimsfriður á þeirri sömu stundu. Við getum öll lagt
okkur fram við að bæta samfélag okkar, en af hverju ger-
um við það ekki? Það er vegna þess að við erum full af
eigingirni og hroka og náum þess vegna ekki að þrífast í
kærleika. Allt þetta myndi breytast ef við værum óhrædd
við að líta í eigin barm.“
Morgunblaðið/Sigurgeir S
’
Það þurfa allir að kljást við eitthvað og ég þarf að berj-
ast við kvíðann. Þessum kvíða fylgdu líkamleg ein-
kenni sem eru enn þann dag í dag til staðar hjá mér,
eins og hraður hjartsláttur og hjartsláttartruflanir. Maður er
nokkuð miður sín eftir svona köst og verður mjög þreyttur.“