SunnudagsMogginn - 18.09.2011, Blaðsíða 9

18. september 2011 9
S
hakin’ Stevens, ellegar Stebbi
hristingur eins og aðdáendur
kappans hér í fásinninu kalla
hann, fæddist í úthverfi Cardiff í
Wales árið 1948, yngstur ellefu systkina,
og hlaut nafnið Michael Barratt. Faðir
Stebba fæddist árið 1897 og barðist fyrir
hönd Breta í fyrri heimsstyrjöldinni.
Stebbi fiktaði ungur við tónlist en vakti
lengi vel litla athygli. Nítján ára festi hann
ráð sitt með æskuástinni, Carole, og réð
sig í vinnu sem mjólkurpóstur í Cardiff.
Saman eiga þau þrjú börn.
Snemma varð ljóst að Stebbi var ólseig-
ur rokkari og næsta áratuginn eða svo túr-
aði hann grimmt með ýmsum rokka-
billíböndum, lengst af Shakin’ Stevens
and the Sunsets, auk þess að senda frá sér
efni.
Stóra breikið kom svo 1977 þegar Stebbi
var ráðinn til að fara með hlutverk Elvis
Presleys í söngleik á West End í Lund-
únum. Þótti hann standa sig vel og varð í
kjölfarið reglulegur gestur í sjónvarpi.
Árið 1979 tók umboðskonan kunna
Freya Miller Stebba upp á sína arma og
gerði honum að hrista af sér Sólsetrið.
Hann lét ekki segja sér það tvisvar – sóló-
ferillinn var hafinn.
Og vinsældirnar létu ekki á sér standa.
Fyrsti smellur Stebba, This Ole House, fór
rakleiðis á topp breska vinsældalistans.
Næstu fjögur árin kom Stebbi hvorki fleiri
né færri en tíu lögum á topp fimm, þar af
þremur alla leið á toppinn, Green Door,
Oh Julie og Merry Christmas Everyone.
Breiðskífa söngvarans, Shaky, átti sömu-
leiðis greiða leið á toppinn.
Ekki með á Live Aid
Synd væri að segja að frumleikinn hafi
dropið af Stebba en það bætti hann upp
með taumlausri gleði og gáska. Almenn-
ingur hreifst með. Hann var líka flinkur að
fá fræga tónlistarmenn til samstarfs við
sig, svo sem Hank B. Marvin, Albert Lee,
Roger Taylor og Bonnie Tyler.
Þrátt fyrir vinsældirnar var Stebbi ekki
allra, einkum litu djúptþenkjandi tónlist-
armenn hann hornauga. Það kom því
fáum á óvart að Stebba væri hvergi að
finna á Live Aid-tónleikunum sumarið
1985. Sama ár varð hann þó fyrsti lista-
maðurinn til að koma fimmtíu sinnum
fram í hinum geysivinsæla sjónvarpsþætti
Top of the Pops. Sennilega hafa gleði og
gáski ekki þótt fara nægilega vel saman
við hungursneyðina í Afríku.
Vinsældir Stebba dvínuðu er leið á ní-
unda áratuginn enda þótt hann héldi
áfram að dæla út plötum. Árið 1991 dró
kappinn sig hins vegar í hlé eftir að hann
var dæmdur til að greiða gömlu félögum
sínum í Sunsets ógoldin höfundarrétt-
argjöld.
Stebbi komst aftur á kreik um aldamót-
in og hefur túrað grimmt síðan – með alla
gömlu slagarana í farteskinu. Best of-plata
hans seldist til að mynda vel árið 2005 og
fyrir þremur árum kom hann fram á
svaðalegum eitís-tónleikum í Póllandi
ásamt kempum á borð við Kim Wilde,
Samönthu Fox, Thomas Anders (úr Mod-
ern Talking), Söndru og Limahl. Maður
finnur bara „möllettið“ síkka á ný við
þessa upptalningu!
Sama ár kom Stebbi fram á hinni vin-
sælu Glastonbury-hátíð en var því miður
sendur á svið áður en myndatökumenn
BBC fóru á fætur. Góður rómur var eigi að
síður gerður að söng hans.
Fékk svæsið hjartaáfall
Eins og við öll hefur Stebbi orðið fyrir
áföllum á lífsleiðinni. Árið 2002 var hann
tekinn ölvaður undir stýri og missti bíl-
prófið í tvö ár, auk þess að vera látinn rífa
budduna upp á gátt. Fyrir hálfu öðru ári
þurfti hann öðru sinni að punga út, núna
eftir að hafa verið dæmdur fyrir að ganga í
skrokk á norður-írskum ljósmyndara.
Stebbi áfrýjaði dómnum og fékk honum
hnekkt.
Sumarið 2010 var Stebbi síðan fluttur í
ofboði á spítala eftir að hafa hnigið niður á
heimili sínu í Windsor. Reyndist hann
hafa fengið svæsið hjartaáfall.
Stebbi hristi þau veikindi af sér og er
stálsleginn í dag. Ekki veitir af enda hefur
okkar maður flengst um allar jarðir að
undanförnu til að halda upp á þrjátíu ára
einherjaafmæli í bransanum.
Ætli húsbændur í Hörpunni séu með
símanúmerið hans?
orri@mbl.is
Stebbi hristingur, eða Shakin’ Stevens, á hátindi ferils síns snemma á níunda áratugnum.
Stebba hristing
Hvað varð um …
Stebbi eins og hann lítur út í dag.
B
reska tónskáldið Tony Britten hóf leik eins og venjulega; þegar Meist-
aradeildarlagið hans hljómar grípur marga sérstök tilfinning og svo
var einnig á þriðjudagskvöldið. Veislan um það bil að hefjast, tugþús-
undir saman komnar á völlum vítt og breitt um Evrópu, milljónir í
sófanum heima.
Fátt kom verulega á óvart í þessari fyrstu umferð riðlakeppninnar; aðallega
sigur Trabzonspor frá Tyrklandi á Evrópumeisturunum frá 2009, Inter, og það í
Mílanó. Tyrkneska liðið átti ekki einu sinni að vera með í keppninni en kom í
stað Fenerbahce sem sett var í skamm-
arkrókinn fyrir að hagræða úrslitum
leikja heima fyrir.
Í sjálfu sér er ómögulegt að spá um
það svo snemma hverjir vinna Meist-
aradeildina í vor, þó svo ég hafi haldið
því fram hér fyrir viku að Manchester
United hreppti bikarinn. En hafa ber í
huga að sú spá var sett fram af óhefð-
bundnum ástæðum!
Flestir þekkja Barcelona, Real Ma-
drid og Manchester-liðin. Á fyrstu
stigum keppninnar er því upplagt að
gefa gaum þeim lítt þekktu. Gaman að
nota jafnvel tækifærið til lúmskrar
kennslu í sögu og landafræði. Ungum
áhugamönnum um fótbolta verður
örugglega ekki meint af því að vita að
borgin Trabzon við Svartahafið í Norð-
austur-Tyrklandi liggur við Silkiveg-
inn fræga, verslunarleiðina sem
tengdi Asíu og Evrópu allt frá
því á annarri öld fyrir
Krist. Eða að í borginni
kom í heiminn Suleman,
kallaður hinn mikli, tí-
undi soldán Tyrkjaveldis
frá 1520 til dauðadags
1566 og sá sem lengst sat
þar á valdastóli.
Hvernig væri að halda spurn-
ingakeppni fyrir fjöl-
skylduna, jafnvel
kvöldið áður, og sigur-
vegarinn fær besta sætið við sjónvarpið
meðan á leiknum stendur?
Eða að kynna sér matarmenningu frá
einhverjum leikstaðanna? Þar sem ég
ákvað að fylgjast með leik Barcelona og
AC Milan á þriðjudaginn varð hvunn-
dagslegur saltfiskur fyrir valinu. Þetta
ætti að duga fyrir fimm.
Kíló af útvötnuðum saltfiski, 1 rauðlaukur,
1 græn paprika, 2 dósir niðursoðnir mauk-
aðir tómatar. Hvítlaukur. Slatti af kartöflum.
Ekki verra ef þær eru nýuppteknar úr eigin garði! Olía til steikingar.
Skerið rauðlauk og papriku, ekki mjög smátt. Steikið grænmetið á pönnu þar
til það mýkist. Saxið hvítlaukinn og bætið á pönnuna, steikið í smástund í við-
bót, ekki þó þannig að hvítlaukurinn brúnist.
Bætið tómatmaukinu út í og látið malla í nokkrar mínútur.
Raðið fiskinum í eldfast mót, skerið soðnar kartöflur og leggið ofan á. Þokka-
lega stóra kartöflu er gott að skera í fjóra bita. Hellið öllu af pönnunni yfir.
Bakið þetta í ofni við 180 gráður í 20-22 mínútur. Athugið að ekki er gefið upp
magn af hvítlauk í uppskriftinni. Hefðbundið er þó að skera niður einn hvít-
lauksgeira, en sé enginn viðkvæmur á heimilinu má nota fleiri. Að mínu mati er
það góð regla í matargerð að aldrei er of mikið af hvítlauk!
Á Meistaradeildarkvöldi er heppilegast að setja fiskinn í ofninn þegar klukkan
er um það bil stundarfjórðung gengin í sjö – á meðan leikirnir byrja jafn
snemma að íslenskum tíma og nú; þá passar að setjast niður með diskinn fyrir
framan sjónvarpið þegar flautað er til leiks. Best ef fjölskyldan situr öll saman,
borðar og horfir á leikinn.
Ef bjóða á eftirrétt er sniðugt að vera við öllu búinn. Eftir að Milan jafnaði
óvænt í uppbótartíma var til dæmis ekki annað við hæfi en fá sér smá Gorgon-
zola-ost. Eins gott að huga að öllu sem máli skiptir við innkaupin …
Knattspyrna
og hvítlaukur
Meira en
bara leikur
Skapti Hallgrímsson
skapti@mbl.is
’
Hvernig væri að
halda spurn-
ingakeppni fyrir
fjölskylduna, jafnvel
kvöldið áður, og sig-
urvegarinn fær besta
sætið við sjónvarpið?
Ekki var mikið eftir af saltfiskréttinum góða í leikslok.
Ondrej Celustkam, í miðjunni, fagnar
marki sínu í glæsilegum sigri Trabzon-
spor á Internazionale í Mílanóborg.
Reuters
Morgunblaðið/Skapti