Birtingur - 01.12.1967, Síða 27

EINAR BRAGI: HAUSTSÝNING
Horfðu undir hönd mér,
enginn veit nema þér birtist
tveggja nátta tungl
skimandi um hillur svörtulofta
líkt og alhvítur hvolpur
að sækja fé í kletta.
Horfðu undir hönd mér,
örvænt er ekki
að þú fáir greint,
jafnvel greypt þér í augu
tindrandi brot úr óskastjörnu haustsins
um leið og hún sundrast.
TÖÐUGJÖLD
Eins og draumlyndur smali
fari hljóður að fé
er morgunblærinn
að hverfa til heiða með skýin.
Þó skilur hann eftir á himni
dálítinn hóp
eins og hnappsetin lömb
í stóru kalhvítu túni:
töðugjöld bónda
á þessu grasleysissumri.