Bændablaðið - 01.03.2012, Blaðsíða 18

18 Bændablaðið | fimmtudagur 1. mars 2012
Það var fallegt á fjöllum laugar-
daginn 18. febrúar þegar rit-
stjóra Bændablaðsins var boðið
í jeppaferð með Páli Halldóri
Halldórssyni, sölustjóra Mercedes-
Benz atvinnubíla hjá Öskju. Var
ferðinni heitið upp á Kjöl og inn
í Kerlingarfjöll. Þó meira hafi
snjóað í byggð á suðvesturhorni
landsins í byrjun þessa árs en í
fjölda ára, þá reyndist vera furðu
snjólétt á hálendi Íslands og veðrið
þennan dag eins og best verður á
kosið.
Páll á einhvern öflugasta fjalla-
bíl landsins, sem hann smíðaði
upp úr Mercedes-Benz Sprinter
sendibíl. Hann fékk tæknimenn
Benz-verksmiðjanna í lið með sér
til að gera nauðsynlegar breytingar
á tölvubúnaði og öðru. Fleiri slíkir
bílar eru nú í breytingum og segir
Páll að einn til viðbótar sé langt
kominn og tveir aðrir eigi að verða
tilbúnir í byrjun júní. Þá verða
breyttu Sprinter-ofurbílarnir orðnir
fjórir. Björgunarsveitir víða um land
hafa einnig sýnt slíkum bílum mikinn
áhuga en um er að ræða fjölhæfa bíla
sem geta m.a. hæglega tekið fernar
sjúkabörur ef á þarf að halda. „Svona
bílar ættu að vera til á hverjum ein-
asta sveitabæ,“ segir Páll og glottir
til blaðamanns.
Hefur Páll prófað sinn bíl við
ólíkar og erfiðar aðstæður og
reyndist hann t.d. afar vel við flutn-
inga á fólki upp að gosstöðvunum
í Eyjafjallajökli 2010. Þá hefur
erlendum ferðamönnum þótt mikið
sport að aka um landið með Páli.
Þar á meðal var hópur fyrrverandi
norskra kúabænda sem áttu vart orð
til að lýsa hrifningu sinni. Trúlega
voru það þó ekki síður samskiptin
við ökumann en bíllinn sjálfur sem
drógu fram sólskinsbrosið á andlitum
norsku kúabændanna.
Nýliðakennsla
Litla nefnd Ferðaklúbbsins 4x4 var
með þrjá hópa jeppamanna sem
stefnt var í Kerlingarfjöll þennan
sama laugardag, eða samtals 33 bíla.
Ólafur Magnússon var þar í forsvari
fyrir hópinn og segir hann að í ár sé
Litla nefndin tíu ára. Var hún sett á
fót á sínum tíma þar sem mönnum
fannst of lítið gert fyrir þá félaga
4x4 sem voru á lítið breyttum eða
óbreyttum jeppum, þ.e. „litlu bílana“
í flotanum.
„Enn þann dag í dag erum við að
standa fyrir ferðum fyrir þennan hóp.
Við vinnum þetta þannig að innan
4x4 er nokkuð góður hópur sem er
á bílum með 35 tommu dekkjum
og með allt upp í 49 tommu breytta
jeppa. Þessi hópur er okkur innan
handar með fararstjórn og hópstjórn
í Litlu nefndinni. Þeim almennu þátt-
takendum sem skrá sig í ferðirnar er
skipt upp í minni hópa sem hver um
sig er með einn eða tvo hópstjóra.
Að þessu sinni voru einungis þrír
hópar og einn hópstjóri í hverjum,
nema síðasta hópnum með minnstu
bílunum þar sem hópstjórarnir voru
tveir. Stundum höfum við verið
að fara með allt upp í átta hópa. Í
síðustu ferð þar á undan fórum við
upp á Skjaldbreiðarsvæðið með um
55 bíla.“
Ólafur segir mikið um að fjöl-
skyldur séu saman í þessu sporti.
Síðustu árin hafi Litla nefndin farið
með um 250 til 300 bíla og um 700
manns á fjöll yfir vetrartímann í 6-7
ferðum.
Leggja mikið upp úr góðri
umgengni um landið
Það vakti athygli blaðamanns hvað
þessir jeppamenn virtust meðvit-
aðir um að skemma ekki landið og
sneiddu hjá öllum melum og móum
þó gaddfreðnir væru og illmögulegt
að marka í þá spor.
„Við viljum kalla þetta uppeldis-
starf þar sem við kennum fólki að
ferðast á þennan máta og ganga vel
um landið okkar. Við byrjum á því
áður en farið er í svona ferðir, sem
farnar eru á laugardögum, að vera
með kynningarkvöld miðvikudags-
kvöldið áður. Þar förum við yfir
ferðatilhögun og einnig hvernig
menn eiga að haga sér á fjöllum og
útbúa sig. Þar er lögð áhersla á að
ekki sé verið að keyra utan vega og
að menn tíni upp eftir sig allt rusl
og sýni heilbrigða skynsemi í ferða-
mennsku. Við sem erum að ferðast
þetta mikið viljum gjarnan koma að
landinu hreinu og óskemmdu aftur
og aftur,“ segir Ólafur.
Minna um alvarlegan
utanvegaakstur en áður
Ólafur segir að þrátt fyrir allt tal um
að utanvegaakstur fari vaxandi þá sé
það sín tilfinning að því sé þveröfugt
farið.
„Við sem erum mikið að ferðast
sjáum æ minna af utanvegaakstri
með alvarlegum skemmdum á landi.“
Erfitt sé að segja til um hverjir hafi
helst verið að valda slíkum spjöllum
enda engar rannsóknir eða skráning
til um það. Trúlega sé þar oft um að
kenna hreinum fíflagangi og kunn-
áttuleysi ökumanna. Segir Ólafur að
með skipulagningu og kennslu hafi
menn náð verulegum árangri í að
koma í veg fyrir slíkt. Reynslan sýni
einnig að án þjálfunar og kunnáttu
í meðferð fjórhjóladrifsbíla komist
menn ekki ýkja langt, sama hversu
jeppinn er öflugur. /HKr.
Bændablaðið í jeppaferð í fallegu vetrarveðri á Kjalvegi og í Kerlingafjöllum:
Tiltölulega snjólétt á hálendi Íslands
- Líklegt að snjóa taki upp snemma í vor – Óvanir jeppamenn teknir í kennslustund í vetrarferðamennsku og í umgengni um landið
Myndir / HKr.