Læknablaðið - 15.03.1987, Blaðsíða 40

96
LÆKNABLAÐIÐ
milljónir króna. Ég þykist þess fullviss að það
hefði lést brúnin á stjórnarmönnum hjá okkur við
slíka búbót. Stöðin á Egilsstöðum er þó ekki dýr í
rekstri vegna þess að hún er rekin með sjúkrahúsi.
Fyrir rannsókna- og slysavarðstofukostnað fá
heilsugæslustöðvar miklu minna greitt en
sjúkrahús fá frá T.R. fyrir sömu þjónustu.
Þá ber að hafa í huga að starfsemi
heilsugæslustöðvar er miklu fjölþættari en það að
vera einungis læknisstofa og heilsugæsluna þarf
að borga og skipuleggja sérstaklega í
einkarekstrinum.
Á sama tíma og þeir sem reka heilsugæslustöðvar
upp á punkt og prik eftir gildandi
heilbrigðisþjónustulögum þurfa að leggja
nefskatt á íbúa sína á bilinu 300 til 1300 kr. á íbúa
á ári greiddi Reykjavíkurborg kringum 180 kr. á
ibúa á ári vegna reksturs þeirra heilsugæslustöðva
sem þar eru.
Þetta segi ég hér til þess að sýna annarsvegar
hvernig sá einkarekstur sem verið er að gera
tilraunir með er í raun meira ríkisgreiddur en
rekstur heilsugæslustöðva og hins vegar til þess að
sveitarstjórnir hér fylgist með þróun þessara mála
og reyni að gæta þess að þær sitji við sama borð
peningalega og sveitastjórnir sem ef til vill kjósa
annað rekstrarform en núgildandi lög gera ráð
fyrir.
Ég hef hér gert rekstrarmál
utanspítalaþjónustunnar að nokkru máli en
aðeins lauslega vikið að þjónustunni sem þessi
starfsemi veitir. Ekki gefst tóm til að fara mikið
út í það hér en ég vil aðeins geta þess að reynslan
af þjónustu heilsugæslustöðvanna virðist í
megindráttum vera góð og kostnaður við þetta
kerfi ekki vera óeðlilegur.
Ég er þeirrar skoðunar að heilbrigðisþjónusta
okkar væri styrkari ef
heilbrigðisþjónustulögunum væri framfylgt og
við stæðum betur að vígi gagnvart verkefnum
framtíðarinnar. Það er orðið brýnt að samræma
þessi mál þannig að ein lög gildi í þessum efnum
hér á landi.
Koma þarf á þjónustu heilsugæslustöðva um allt
land og hafa starfssvæði þeirra og ábyrgð vel
skilgreinda. Einfalda þarf og samræma
fjármögnun heilbrigðisþjónustunnar og tengja
saman faglega- og fjármálaábyrgð. Samkrull ríkis
og sveitarfélaga um þennan rekstur ýmist beint og
eða í gegnum T.R. hefur mistekist.
Það sem ég hef sagt hér að framan er aðeins lítið
brot af því sem fram þarf að koma til þess að
málin verði skilin til fulls. Ég hef sagt hvernig
þessi mál koma mér fyrir sjónir en þau hafa
margar hliðar og menn eru ekki allir sammála hér
því sínum augum lítur hver á silfrið.
Hafi mér tekist að vekja áhuga eða skilning á
umræðuefninu þá er tilganginum náð.
HEIMILDIR
1. Helseplan for 80 - árene. Jan Grund o.fl. Gyldendal
forlag 1983.
2. Könnun á heilbrigðisþjónustu.
Landlæknisembættið 1985.
3. Óbirtar upplýsingar frá T.R.
4. Kostnaður við heilbrigðisþjónustu í Reykjavík á
tímabilinu 1970-1981. Skrifstofa borgarlæknis,
október 1982.
5. Skýrsla byggðanefndar þingflokkanna. Alþingi
1985.