Læknablaðið - 15.03.1987, Blaðsíða 48
104
LÆKNABLAÐIÐ
Húsnæðið er því rúmgott og fullnægjandi í alla
staði. Deildin er sömuleiðis vel tækjum búin. Það
sem á vantar eru fyrst og fremst fleiri stöðugildi
fyrir aðstoðarlækna og hjúkrunarfræðinga.
Svipað er að segja um svæfingadeildina. Hún býr
við gott húsnæði en starfsmannaskortur háir
deildinni nokkuð.
Á gjörgæsludeild eru fimm rúm, og frá því hún
tók til starfa hafa milli 300 og 400 sjúklingar verið
meðhöndlaðir þar árlega. Gjörgæsludeild hefur
tekið við sjúklingum frá öllum legudeildum
sjúkrahússins, en flestir koma frá þremur stærstu
deildunum, þ.e. handlækningadeild,
lyflækningadeild og bæklunardeild.
Á vegum svæfingadeildar er rekin sérstök deild
»pain klínik». Þar eru sjúklingar með
langvarandi verki teknir til meðhöndlunar.
Síðasta ár hafa læknar svæfingadeildar einnig
haft opna móttöku á göngudeild FSA. Þar eru
sjúklingar skoðaðir fyrir væntanlegar aðgerðir og
rannsóknir ákveðnar. Á þann hátt er hægt að
fjölga sjúklingum sem teknir eru til aðgerða án
innlagna á sjúkrahúsið, einnig er hægt að stytta
verulega innlagningartíma fyrir aðgerð.
Barnadeild: Síðla árs 1961 hóf barnalæknir störf
við sjúkrahúsið. Fyrstu árin var sú starfsemi rekin
á blandaðri deild á efstu hæð gömlu
byggingarinnar, en 1972 var formlega stofnuð
staða yfirlæknis við barnadeild. Fjórum árum
síðar var barnadeildinni komið fyrir í núverandi
húsnæði, sem fyrir löngu er orðið allt of lítið fyrir
starfsemi deildarinnar. Það hlýtur því að verða
eitt af brýnustu úrlausnarefnum stjórnar
sjúkrahússins í náinni framtíð að sjá
barnadeildinni fyrir fullnægjandi húsnæði.
Deildin hefur nú yfir að ráða tíu rúmum. Fyrsta
ársfjórðunginn vistuðust 24 börn, en undanfarin
ár hefur sjúklingafjöldi verið um og yfir 700 börn
á ári.
Þrír barnalæknar starfa við deildina, sem veitir
alhliða sérfræðiþjónustu í barnalækningum, þar
á meðal gjörgæslu nýbura og er deildin eina
barnadeild landsins utan höfuðborgarsvæðisins.
Rétt er að geta þess að frá upphafi hefur
bamadeildin notið sérstakrar velvildar og
umhyggju Kvenfélagsins Hlífar á Akureyri. Segja
má að kvenfélagskonur hafi búið deildina hart
nær öllum þeim tækjum sem hún hefur yfir að
ráða.
Göngudeild FSA er mjög öflug. Hún er ætluð
fólki sem er heima en nýtur þjónustu sérfræðinga
sjúkrahússins. Frá upphafi höfðu yfirlæknar og
sjúkrasamlagslæknar móttöku í húsakynnum
sjúkrahússins.
í byrjun síðasta áratugar, þegar ákvörðun var
tekin um að FSA þjónaði sem varasjúkrahús og
tæki upp deildaskiptingu á borð við sjúkrahúsin í
Reykjavík, var þessi hluti starfseminnar aukinn
og þarna starfa eingöngu sérfræðingar á sama
hátt og sérfræðingar starfa í læknahúsum í
Reykjavík.
Á göngudeildinni geta heimilislæknar vísað til
allra lækna sjúkrahússins, einnig svæfingalækna,
og trúlega er það einsdæmi að hægt sé að vísa á
þennan hátt til sérfræðinga í svæfingum og
deyfingum. Eina sérfræðimóttakan sem vantar á
göngudeildina er í röntgengreiningu.
HVAR KREPPIR HELST AÐ?
Brýnast er að ljúka því húsnæði sem hafist hefur
verið handa við undanfarin ár og framkvæma
áætlanirnar frá 1971-1973. Síðan verður að
skipuleggja það sem orðið hefur útundan í þeirri
beinagrind sem verið er að byggja eftir.
Sérstaklega voru nefndar röntgendeild,
rannsóknastofur og endurhæfingardeild. Þessar
deildir búa allar við ónógt húsnæði og þarfnast
aukins tækjabúnaðar og mannafla.
Einnig er brýnt að koma nútíma
öldrunarlækningadeild á laggirnar við FSA. Hún
þyrfti að vera í nánum tengslum við
Iyflækningadeild til að tryggja samfellu í meðferð
Tafla I. Yfirlit yfir starfsemi F.S.A. 1983-1985.
1983 1984 1985
Fjöldi sjúklinga 4.206 3.817 3.948 •
Fjöldi legudaga 46.520 47.087 46.194
Meðallegutími 11.1 12.3 11.7
Meðalnýting rúma 84.4 85.2 83.8
Röntgenrannsóknir 12.668 13.311 14.979
Fjöldi aðgerða á skurðdeild 2.049 2.222 2.265
Fjöldi rannsókna 123.213 131.064 147.353