Morgunblaðið - 03.07.2013, Blaðsíða 20

20 FRÉTTIRErlent
MORGUNBLAÐIÐ MIÐVIKUDAGUR 3. JÚLÍ 2013
Hjá Parka færðu flottar innréttingar
í hæsta gæðaflokki. Mikið úrval.
Bjóðum aðeins það besta fyrir þig!
Dalvegi 10-14 • Kópavogi
Vandaðar
innréttingar
Sótti um hæli í 21 landi
 Edward Snowden segist hafa verið sviptur ríkisfangi utan dóms og laga
 Umsóknir hans fá óvíða meðferð þar sem hann getur ekki verið á staðnum
Hólmfríður Gísladóttir
holmfridur@mbl.is
Tilkynning birtist á heimasíðu Wikileaks í gær
þess efnis að uppljóstrarinn Edward Snowden
hefði sótt um hæli í 21 landi en stjórnvöld í Rúss-
landi sögðu í gærmorgun að hann hefði dregið
umsókn sína um hæli þar til baka.
Í yfirlýsingu, sem birtist á heimasíðu Wikileaks
á mánudag, gagnrýnir Snowden Barack Obama
Bandaríkjaforseta fyrir að beita aðra þjóðarleið-
toga þrýstingi til að hafna hælisumsóknum sínum
og segist enn trúr sannfæringu sinni.
„Þrátt fyrir að ég hafi ekki verið sakfelldur fyr-
ir neitt hefur hún [ríkisstjórn Baracks Obama]
einhliða afturkallað vegabréfið mitt, gert mig að
einstaklingi án ríkisfangs,“ segir Snowden m.a. í
yfirlýsingunni en þar segir hann einnig að yfirvöld
í Bandaríkjunum óttist ekki uppljóstrara á borð
við hann sjálfan, Bradley Manning eða Thomas
Drake, heldur upplýstan, reiðan almenning.
Umsókn send til sendiráðsins í Moskvu
Forseti Frakklands, Francois Hollande, sagði í
gær að Evrópusambandið þyrfti að taka afstöðu
til þess hvernig það ætlaði að taka á ásökunum
um að Þjóðaröryggisstofnun Bandaríkjanna,
NSA, hefði njósnað um bandamenn í Evrópu.
Hann sagði að sér væri ekki kunnugt um að
stjórnvöldum í París hefði borist hælisumsókn frá
Snowden en Frakkland var eitt ríkjanna sem
Wikileaks sagði að hælisumsóknir hefðu verið
sendar til.
Talsmaður utanríkisráðuneytisins á Indlandi
sagði í gær að stjórnvöld þar í landi sæju enga
ástæðu til að verða við hælisbeiðni Snowdens. Þá
staðfesti Guido Westerwelle, utanríkisráðherra
Þýskalands, að þarlendum stjórnvöldum hefði
borist hælisumsókn og að hún myndi fara í lög-
formlegt ferli en sagðist jafnframt ekki geta
ímyndað sér að hún yrði samþykkt.
Holland, Noregur, Austurríki, Finnland og
Spánn eru einnig meðal þeirra landa þar sem
Snowden sótti um hæli en þar, líkt og á Íslandi,
þarf umsækjandi að vera í landinu til að umsóknin
sé tekin til meðferðar.
AFP sagði frá því í gær að utanríkisráðuneyti
Íslands hefði staðfest að sendiráði þess í Moskvu
hefði borist hælisumsókn frá Snowden og að
henni hefði verið komið áfram til innanríkisráðu-
neytisins.
John Kerry, utanríkisráðherra
Bandaríkjanna, sagði í gær að
Bandaríkin og Rússland hefðu
skuldbundið sig til þess að efna til
friðarráðstefnu um Sýrland en hún
yrði líklega ekki haldin fyrr en í
haust.
Kerry átti fund með utanríkis-
ráðherra Rússlands, Sergei Lavrov,
í smáríkinu Brúnei í gær en sagði að
honum loknum að þeir hefðu verið
sammála um að æskilegt væri að
halda ráðstefnuna fyrr en seinna til
að finna friðsamlega lausn á átök-
unum í Sýrlandi.
Kerry lauk í gær tólf daga ferða-
lagi þar sem hann leitaði eftir stuðn-
ingi við uppreisnarmenn í Sýrlandi.
Rússland og Íran eru helstu banda-
menn forsetans sýrlenska Bashars
al-Assads en Kerry sagði í gær að
hann og Lavrov deildu þeirri skoðun
að farsælasta lausnin á deilunni í
Sýrlandi væru pólitísk umskipti, þar
sem bæði stjórnvöld í landinu og
stjórnarandstaðan skipuðu fulltrúa í
bráðabirgðastjórn.
Kerry hefur kallað eftir auknum
stuðningi til handa uppreisnar-
mönnum, þar sem hann telur ólík-
legt að Assad fáist að samningaborð-
inu ef hann eygi möguleika á sigri.
Efna til frið-
arráðstefnu
í haust
 Safnar stuðningi
Friðarumleitun John Kerry
Fimm ráðherrar sögðu af sér í Egyptalandi í gær, þeirra á meðal utanrík-
isráðherrann Mohammed Kamel Amr, í kjölfar þess að herinn gaf forset-
anum Mohamed Morsi 48 klukkustunda frest til þess að koma til móts við
kröfur fólksins í landinu. Milljónir mótmælenda fylktu liði í borgum og
bæjum víða um Egyptaland í gær en í tilkynningu frá forsetaembættinu
sagði að embættið myndi áfram leitast við að mynda þjóðarsátt. Viðmæl-
endur AFP-fréttastofunnar í Kaíró í gær sögðust óttast að átök brytust út í
kjölfar yfirlýsingar hersins og að stuðningsmenn Morsi myndu berjast þar
til yfir lyki. Talsmenn helsta bandalags stjórnarandstæðinga, Þjóðfrels-
isfylkingarinnar, sögðust ekki myndu styðja valdarán hersins.
Fimm ráðherrar Morsi segja af sér
AFP
Evrópuþingið
samþykkti í gær
að aflétta frið-
helgi Marine Le
Pen, leiðtoga
Þjóðfylking-
arinnar í Frakk-
landi, en hún á
yfir höfði sér
ákæru í Lyon
fyrir að hafa líkt
bænagjörð músl-
ima við hernám nasista í seinni
heimsstyrjöldinni á fundi með
stuðningsmönnum Þjóðfylking-
arinnar árið 2010.
Áður en atkvæðagreiðsla um
málið fór fram sagðist Le Pen vera
andófsmaður og að hún hefði að-
eins verið að nýta sér tjáningar-
frelsið.
Þetta er ekki í fyrsta sinn sem
Evrópuþingið samþykkir að aflétta
friðhelgi þingmanna en faðir Le
Pen, Jean-Marie Le Pen, fyrrver-
andi leiðtogi Þjóðfylkingarinnar,
var m.a. sviptur friðhelgi árið 1998
þegar hann sagði að gasklefar nas-
ista væru „smáatriði“ í sögu heims-
styrjaldarinnar.
EVRÓPUÞINGIÐ
Þingið afléttir frið-
helgi Marine Le Pen
Marine Le Pen
Nítján létust þegar farþegaþyrla
með þrjá áhafnarmeðlimi og tutt-
ugu og fimm farþega innanborðs
brotlenti í barrskógabeltinu í Aust-
ur-Síberíu í gær. Af farþegunum
tuttugu og fimm voru ellefu börn.
Þyrlan var á leið frá bænum
Deputatsky til bæjarins Kazachye
þegar slysið varð og voru um 240
björgunarmenn og átta þyrlur
sendar á slysstað en aðstæður til
björgunar voru erfiðar sökum veð-
urs.
RÚSSLAND
19 látnir í þyrluslysi
í Austur-Síberíu