Fréttablaðið - 20.06.2013, Qupperneq 5

Alþýðusamband Íslands, Samtök atvinnulífsins og Ríkisskattstjóri
munu í sumar taka höndum saman á nýjan leik og ráðast í sérstakt
átak til þess að hvetja bæði atvinnurekendur og launafólk til að
standa rétt að samningum sín í milli. Fulltrúar aðilanna þriggja munu
heimsækja vinnustaði, kanna aðstæður, veita ráðgjöf og fræðslu um
viðeigandi reglur og lagaramma og hvetja bæði atvinnurekendur og
launafólk til að gera nauðsynlegar úrbætur ef þurfa þykir.
Svört atvinnustarfsemi, undanskot á launatengdum gjöldum og brot
á kjarasamningum eru skaðleg fyrir alla hlutaðeigandi og samfélagið
í heild sinni. Hún eykur skattbyrði þeirra sem fara að settum reglum
og kemur í veg fyrir að fyrirtæki geti keppt á jafnréttisgrunni. Það er
ósanngjarnt að láta aðra borga reikningana sína.
Athyglinni verður sérstaklega beint að litlum og meðalstórum
fyrirtækjum í ýmsum atvinnugreinum og nauðsynlegra úrbóta og
leiðréttingar gjalda krafist þar sem við á. ASÍ, SA og RSK hvetja
forráðamenn atvinnurekstrar í landinu til að hafa tekjuskráningu sína
í lagi og alla starfsmenn skráða. Jafnframt að nota vinnustaðaskilríki
þar sem það á við og fara að lögum um færslu bókhalds og skil á
staðgreiðslu, virðisaukaskatti og öðrum lögboðnum gjöldum.
Átak gegn svartri
atvinnustarfsemi