Tímarit Máls og menningar - 01.03.1978, Qupperneq 125

Til félagsmanna
Á síðastliðnu ári urðu gleðileg umskipti í rekstri Máls og menningar. Tekjur
jukust stórlega um leið og gjöldum var haldið niðri eftir mætti. Þótt reikningar
liggi ekki fyrir enn er þó auðséð að liðið ár var okkur hagstætt. Við höfum grynnt
verulega á skuldum félagsins og greiðslustaðan er viðunandi.
Á árinu gengu um fjögur hundruð manns í félagið og hefur sú snögga aukning
sem hófst í fyrra haust, með dreifiritinu þar sem boðin voru á sérstökum vildar-
kjörum verk meistara Þórbergs um leið og starfsemi félagsins var kynnt, haldið
áfram.
Við settum okkur það markmið í upphafi síðastliðins árs að fjölga félagsmönn-
um um eitt þúsund. Þetta tókst ekki þótt árangurinn hafi samt sem áður orðið
umtalsverður. Á yfirstandandi ári verðum við að ná því sem á vantaði til að fylla
þúsundið.
Ef rétt er á haldið höfum við allar forsendur til að auka tölu félagsmanna enn
verulega, og þeim sem þetta skrifar er nær að halda að fimm þúsund félagar sé
ekki óraunhæft markmið. Bókmenntaáhugi meðal þjóðarinnar en enn mjög mikill
og efnahagur er ekki lengur sá Þrándur í Götu sem áður, þannig að vel flestir
geta orðið sér úti um þær bækur sem þeir hafa áhuga á. Félagsaðild í Máli og
menningu er hlægilega ódýr, nær ekki einu meðalbókarverði á ári. Það er því fyrst
og fremst undir okkur komið sem að útgáfunni stöndum hvort við stöðnum eða
höldum fram á leið. Þar veldur mestu um bókavalið sem verður í senn að vera
fjölskrúðugt og vandað. Það sama gildir um Tímaritið. Menningarleg einstefna er
ekki aðall Máls og menningar og má aldrei verða. Skemmtun og fræðsla verða að
fylgjast að. Útgáfa síðastliðins árs hygg ég hafi fært mönnum heim sanninn um
að við séum að færast nær markinu. Bækur útgáfunnar fengu afskaplega góðar
undirtektir og munu fimm þeirra vera uppseldar en tvær aðrar eru til í takmörkuðu
upplagi. En betur má ef duga skal. Næstu verkefnin sem blasa við eru að auka að
mun barnabókaútgáfuna og koma henni á traustari grundvöll. Okkur er ljós sú
skylda sem á okkur hvílir í þessu efni. Barnabækur eru gefnar út hérlendis í
hundraðatali ár hvert, en þó hefur útgáfa þeirra orðið á vissan hátt einhæfari. Þar
ruddu gróðasjónarmiðin veginn eins og svo oft áður, enda er árangurinn eftir því.
Myndabækur með textauppfyllingu ráða ferðinni og móta smekk og lestrarvenjur.
Þótt margar þokkalegar bækur leynist þar innan um eru flestar bækurnar sniðnar
eftir auglýsingaþörfum. Auð-auglýsanlegar bækur sitja í fyrirrúmi. Hér verðum
við að finna nýtt form sem hentar okkar þörfum: útgáfuform sem hentar vönd-
uðum barnabókum.
Annað stórverkefni er efling útgáfu rita um þjóðfélagsmál. Nú eru liðin tíu ár
síðan fyrsta kiljan kom út hjá Máli og menningu. Komið hafa út sextán bækur í
kiljuflokknum, en aðrar þrjár í sams konar broti og útliti þótt ekki hafi þær til-
heyrt flokknum.
111