Ský - 01.04.2007, Qupperneq 55

Sagan um kríuna sem sagði frí frí
Í eitt skipti bjó pabbi til sögu um mig. Það var
líka kría í sögunni. Krían flaug yfir hausnum á
mér og reyndi að gogga í mig og sagði: Frí frí,
frí frí. Ég hét Ella Stína í sögunni einsog í raun
og veru. Ég man ekki eftir að það hafi gerst neitt
meira. Það getur samt verið að það hafi gerst
alveg fullt. Ég held að krían hafi til dæmis elt
Ellu Stínu, kannski alla leið frá Seltjarnarnesi og
út að Ægisíðu. Ég veit ekki af hverju mér finnst
það en hvað um það, sagan er góð. Og engu lík-
ara en pabbi hafi reynst forspár í þetta sinn því
ég veit enga þyngri þraut en að fara í frí. Það er
helst að það þurfi að blæða úr höfðinu.
Fornminjar í Grikklandi
Í Grikklandi fórum við einu sinni að skoða forn-
minjar. Leiðsögumaður með kyndil hafði orð
fyrir hópnum sem gekk í hringi á eftir honum.
Fyrir innan stóra hofið var lítið hof og við fjöl-
skyldan rákumst þangað inn. Það var kolniða-
myrkur þar og grafarþögn. Þá sagði pabbi: Hér
var konungurinn þegar hann þurfti að hugsa.
Á Mokka
Stundum fór ég með honum á Mokka þar sem
hann sat og drakk kaffi með vinum sínum. Þar
voru sömu rólegheitin. Pabbi talaði langmest af
vinum sínum. Svo kom alltaf Guðný með kaffið.
Ég þekki hana enn. Hún gaf mér rör í sínalkóið
mitt. Pabbi þurfti alltaf að vera að fara á Mokka.
Það var mjög áríðandi. Ég held að mér hafi fundist
það áríðandi. Í einni ferðinni týndist ég í Banka-
strætinu. Ég var skelfingu lostin. Ég var viss um
að ég væri týnd að eilífu og enginn á jörðinni gæti
fundið mig aftur. Þá kom pabbi og fann mig. Ég
man samt ekki eftir því þegar ég fannst. sky
,
Engill útí Gróttu
Einu sinni fórum við Illugi með pabba útí
Gróttu en þar vorum við vel kunnug. Við
laumuðumst inní gamlan verkfæraskúr og
ég fann engil úr pappa undir gömlu drasli.
Engillinn hékk í spotta og blés í trompet
og fylgdi mér lengi.
sk‡ 55