Són - 01.01.2006, Page 33

KENTUCKY FRIED CHICKEN 33
Til fanga var tekin af framandi höndum
og flutt inn í örlítið búr
og dyrum þess lokað með línum og böndum
sem lyktuðu óhrein og súr.
Og þrengslin í búrinu þjökuðu hana
og þrýstu á bringu og legg.
Hún óttaðist kannski að kremjast til bana
er kuðluð hún lá út í vegg.
En svo var hún færð út í fallegan daginn
í fyrsta og einasta sinn.
Í fjarskanum glitti í sólgylltan sæinn
og sumarið hitaði kinn.
Já, þar voru rósirnar, rauðar og bleikar
og rennislétt, steinilagt hlað.
En púturnar tístu og titruðu smeykar
og trailerinn brunaði af stað.
Nú sá hún vegina, skóginn og skýin
og skuggana, grasið og blóm.
Og hlustaði á vélina, vindinn og gnýinn,
svo villtan og framandi hljóm.
Og augunum fannst henni örðugt að trúa
þó allvíða fengi um horft
því nú sá hún skrítna og framandi fljúga
þar fugla af ókunnri sort.
En ferðin tók enda og flutningabíllinn
loks fór inn á sláturhúslóð,
en hissa og kvartandi hænsfuglaskríllinn
þar hjálparlaus dauðvona stóð.
Hér fékk ekki nokkur í felur að skríða
né falla í dá eða mók.
Hún þurfti að horfa á hanann sinn fríða
upp hengdan á gljáandi krók.