Bændablaðið - 05.06.2014, Page 7

7Bændablaðið | Fimmtudagur 5. júní 2014
síðasta þætti skildum við
við þá bræður Gísla og
Pál Ásgeir Ásgeirssyni
hvar þeir voru í miðjum
klíðum að yrkja um Batman og
fjölskyldu! Í sögum um Batman
kemur fram að hann heiti Bruce að
fornafni þegar hann er í mannslíki.
Þess á milli bregður hann sér í líki
leðurblöku. Gísli yrkir svo:
Átti hús hinn ungi Brús,
undir grúsarnesi,
veiddi mús til flugsins fús,
frægur lúsablesi.
Þá kom þessi frá Páli:
Barnsskónum hér Batman sleit,
blaka úr góðu leðri.
Hvarf svo brott úr sinni sveit,
í sunnanofsaveðri.
Síðan lá leið þeirra bræðra um
Austfirði, brá þá Gísli fyrir sig
alkunnum austfirskum rithætti:
Útlitið mig ekki gleður,
úti ganga kveðurnar.
Tæpast þetta tel ég veður,
til að fara skreðurnar.
Sennilega hefðu mér getað farist
betur orð, þegar ég í síðasta
þætti kynnti vísur Einars
Kolbeinssonar, þar sem ég vændi
hann um ritstuld. Heldur ofsafengin
viðbrögð hans bárust mér í símann
með svofelldum hætti:
Fráleitt efa aukið hef,
efli í skrefum hróður,
þó ég gefi stolin stef,
stundum í refafóður.
Þetta eru nú launin fyrir að koma
vísum hans á framfæri! En svo
merkilega vildi til að daginn eftir
að vísan barst var Einar úti við
að sýsla við lambfé og sá þá tófu
rétt ofan við túngarðinn. Skjótur
var hann að vígbúast og skondraði
þungvopnaður upp í brekkur og
náði að bana skolla:
Refir meta rangt sinn hag,
er ræna og leika skjöldum.
Hér var að snapa dýr í dag,
og dó af þessum völdum.
Giska drjúgur yfir verkum
sínum boðar hann mér svipuð
örlög og refnum, komi ég aftur í
Bólstaðarhlíð til efnisöflunar:
Feigð að refum fregnin ber,
sem frakkir spilla næði.
Ætlarðu að fara aftur hér,
um, að snapa kvæði?
En víkjum nú tali að öðrum málum.
Nýafstaðnar eru kosningar til
sveitarstjórna. Fágætt vísnasafn
færði mér Sigríður Ívarsdóttir
húsfreyja á Vatnsleysu í
Fnjóskadal. Meðal annars er þar
að finna kosningavísur frá gömlum
tíma. Eftirfarandi tvær vísur frá
Ágústi Vigfússyni kennara bárust
Morgunblaðinu á sínum tíma en
geta eins átt við í dag:
Mín leit hefur staðið lengi,
mér leiðist að finna ekki þann
flokk sem ég eitt sinn átti.
Hver andskotinn varð um hann?
Ef finnurðu flokkinn minn vinur,
félagi reyndu þá brátt,
að vísa honum rétta veginn,
ég veit hann tapaði átt.
Frá svipuðum tíma er vísa Bjarna
Jónssonar frá Gröf:
Kosningarnar koma senn,
kurteisin að bæta.
Þá heilsa allir heldri menn,
hverjum sem þeir mæta.
Umsjón:
Árni Geirhjörtur Jónsson
kotabyggd1@gmail.com
Líf og starf
MÆLT AF
MUNNI FRAM
Í
Minkabændur í Mön kynntu
almenningi starfsemi sína
– Reyna með upplýsingagjöf að brjóta niður fordóma gagnvart búgrein sem skapar mikinn gjaldeyri
Á þriðja hundrað manns mættu
á opið hús laugardaginn 24.
maí síðastliðinn hjá Katrínu
Sigurðardóttur og Stefáni
Guðmundssyni, minkabændum í
Mön í Skeiða- og Gnúpverjahreppi.
Tilgangur þessa viðburðar var
að uppfræða og kynna starfsemi
minkabúsins fyrir almenningi.
Athygli vakti að eigendur
búsins og starfsmenn klæddust
Pollapönksbúningum í ýmsum
skærum litum í tilefni dagsins.
Með því vildu þeir vekja athygli á
fordómum sem gjarnan ber á gagnvart
búgreininni vegna þekkingarleysis.
Boðskapur Pollapönkara um enga
fordóma átti því vel við.
Dagurinn mæltist vel fyrir.
Gestir fengu að halda á litlum
minkahvolpum en got er nú
nýafstaðið. Fólk fékk leiðsögn um
búið og fræðslu um búskapinn og
vinnslu skinnanna. Til sölu var
handunnið minkaskart sem Katrín
vinnur. Fyrir yngstu kynslóðina
var barnahorn þar sem hægt var að
taka þátt í teiknimyndasamkeppni
og blása í blöðrur. Allir fengu svo
heimabakaðar veitingar í lokin.
Heppnaðist þessi dagur hið
besta og gestir fóru fróðari heim.
/HKr.
Starfsfólkið í minkabúinu Mön í Skeiða- og
Gnúpverjahreppi var íklætt Pollapönkarabúningum
þegar það tók á móti gestum í opnu húsi
laugardaginn 24. maí. Eigendur búsins, þau Katrín
Sigurðardóttir og Stefán Guðmundsson, eru fyrir
miðri mynd. Að sjálfsögðu undirstrikuðu þau sjálf
andstöðu við fordóma á táknrænan hátt með því
að Katrín klæddist bláum búningi og Stefán var í
bleikum. Mynd / MÖN
Á þriðja hundrað manns mættu á opið hús hjá Katrínu Sigurðardóttur og Stefáni Guðmundssyni, minkabændum í Mön í Skeiða- og Gnúpverjahreppi,
laugardaginn 24. maí síðastliðinn. Tilgangur þessa viðburðar var að uppfræða og kynna starfsemi minkabúsins fyrir almenningi. Þau hafa verið dugleg
við að sýna almenningi starfsemina og þótti Ingjaldi Breka Haukssyni mikið til koma þegar hann fékk að líta nýlega gotna minkahvolpa í návígi þegar
hann heimsótti búið ásamt fylgdarliði í síðustu viku. Myndir / HKr.