Morgunblaðið - 10.07.2015, Qupperneq 2

2 FRÉTTIRInnlent
MORGUNBLAÐIÐ FÖSTUDAGUR 10. JÚLÍ 2015
Morgunblaðið Hádegismóum 2, 110 Reykjavík. Sími 5691100 Fréttir Guðmundur Sv. Hermannsson, Sigtryggur Sigtryggsson ritstjorn@mbl.is Viðskipti Sigurður Nordal vidskipti@mbl.is Menning Einar Falur Ingólfsson menning@mbl.is
Íþróttir Víðir Sigurðsson sport@mbl.is mbl.is Sunna Ósk Logadóttir netfrett@mbl.is Smartland Marta María Jónasdóttir smartland@mbl.is Umræðan | Minningar | Bréf til blaðsins mbl.is/sendagrein Prentun Landsprent ehf.
Benedikt Bóas
benedikt@mbl.is
Þeir skálaverðir á hálendinu sem
Morgunblaðið náði tali af í gær voru
sammála um að veðrið hjá þeim væri
nokkuð gott – það væri bara misgott.
Gera má ráð fyrir töluverðum kulda
á hálendinu um helgina en það
stoppar ekki ferðalanga.
Sigurlaug Jónsdóttir, betur þekkt
sem Sóla skálavörður í Langadal í
Þórsmörk, segir Íslendinga alltaf
láta sjá sig á hálendinu.
„Hér erum við búin að eiga
dásamlega daga að undanförnu.
Rjómablíða, sól og sæla – eins og er
nú oft í Langadal. Hér blasir Eyja-
fjallajökull við og í sólsetrinu í gær
[fyrradag] lýstist hann upp eins og
rauður eldjökull. Enda var sungið;
Sjáðu jökulinn loga,“ segir hún.
Mun auðveldara er að komast í
Þórsmörk eftir að tönn var sett á
traktorinn á svæðinu þannig að bet-
ur gengur að eiga við vaðið yfir
Krossá.
„Krossá er eins og ljúft lamb
þessa dagana. Vaðið er orðið eins
slétt og á hraðbraut,“ segir hún og
hlær.
47 á biðlista
Sóla segir að langur biðlisti sé eft-
ir gistingu í skálanum í Langadal.
„Núna eru margir tjaldgestir og
skálinn er alltaf eftirsóttur. Hann er
svo fullur af gestum að 47 manns
voru á biðlista hjá mér. Það komast
færri að en vilja.“
Erlendir ferðamenn eru stærstur
hluti gesta í Þórsmörk en þó koma
margir Íslendingar til að berja nátt-
úrufegurðina augum.
„Þórsmörk og Langidalur eiga sér
djúpar rætur í þjóðarsálinni og
margra ára sögu meðal okkar. Hing-
að koma Íslendingar, margar kyn-
slóðir saman, ár eftir ár. Þórsmörk
er alltaf í hjartanu hjá þeim sem hafa
einu sinni komið. Þó að veðrið láti á
sér kræla er bara að klæða sig rétt.“
Snjór í júlí
Sandra Helgadóttir, skálavörður í
Sigurðarskála í Kverkfjöllum, segir
að undanfarið hafi verið rigning,
snjór og slydda.
„Það er hins vegar ávallt góð
stemning hér í Sigurðarskála.
Það er frekar rólegt hjá okkur
eins og er en þegar góðu dagarnir
koma flykkist fólk að.“
Jón Bragason í Múlaskála á Lóns-
öræfum segir veðrið hafa verið fínt
undanfarna daga, í það minnsta
kvarti bændur undan rigningarleysi.
„Það er spáð kulda en bókanir fyr-
ir sumarið eru heitar. Hingað koma
að mestu Íslendingar í gönguhópum
og hafa það gaman og gott. Lóns-
öræfi eru fyrir Íslendinga því það fer
ekkert fyrirtæki með ferðamenn
hingað inn eftir,“ segir Jón.
Hálendið sjóðheitt þrátt fyrir kulda
 Bókanir í skála á hálendinu margar
 Íslendingar sækja í fjallaloftið
Ljósmynd/Páll Guðmundsson
Við Álftavatn Fallegt veður var í gær á Laugaveginum, gönguleiðinni milli
Landmannalauga og Þórsmerkur. Snjór var þó í Hrafntinnuskeri.
Stefnt er að því að senda köfunar-
tæki til að mynda flak Jóns Hákons
BA 60 sem fórst á þriðjudags-
morgun. Rannsóknarnefnd sam-
gönguslysa mun hitta skipstjóra
skipsins í dag og fara yfir atburða-
rásina með honum.
Fjórir voru í áhöfn bátsins.
Magnús Kristján Björnsson stýri-
maður fórst en þrír björguðust
giftusamlega. Þeir náðu ekki að
fara í flotgalla né björgunarvesti,
og er mörgum spurningum um slys-
ið ósvarað.
„Nú er unnið að búnaði og öðru
til að unnt sé að senda myndavél
niður að flakinu. Það er fjarstýrð
vél sem fer niður og þá sjáum við
vonandi hvernig þetta lítur út,“
segir Jón A. Ingólfsson hjá Rann-
sóknarnefnd samgönguslysa, sjó-
slysasviði. benedikt@mbl.is
Ljósmynd/Jón Páll Jakobsson
Rannsókn Báturinn Jón Hákon BA 60.
Myndavél
send að
flakinu
 Rætt við skipstjóra
Jóns Hákons í dag
Bændur eru á fullu í heyskap þessa dagana.
Menn nýttu sér þurrkinn vel í Kjósinni í gær þeg-
ar ljósmyndari Morgunblaðsins átti þar leið um.
Þar var verið að rúlla upp heyinu en samkvæmt
spá Veðurstofunnar gæti vætutíð tafið heyskap
víða um sveitir, einkum sunnanlands og austan.
Þá verður kalt í veðri norðanlands og á Vest-
fjörðum í dag. Helst eru það bændur á Vestur-
landi sem geta heyjað óhindrað um helgina.
Morgunblaðið/Styrmir Kári
Heyannir í sveitum landsins
Auður Albertsdóttir
Kristján H. Johannessen
Sigmundur Davíð Gunnlaugsson forsætisráðherra
átti í gær fund með Jean-Claude Juncker, forseta
framkvæmdastjórnar Evrópusambandsins. Segir
Sigmundur Davíð fundinn, sem fram fór í Brussel,
hafa verið „óvenju afslappaðan og skemmtilegan“.
„Kannski tengist það því að Juncker er afslöpp-
uð týpa en hann er einnig búinn að vera að fást við
mjög erfið mál innan Evrópusambandsins í [gær]
og undanfarna daga. Þannig að ég get ímyndað
mér að það hafi verið ágætis tilbreyting að hitta
hóp frá Íslandi og geta rætt um uppbyggileg já-
kvæð mál,“ segir Sigmundur Davíð.
Aðspurður segir hann þá hafa rætt hvernig þeir
sæju fyrir sér samband Íslands og Evrópusam-
bandsins nú þegar ljóst þyki að Ísland sé ekki
lengur á leið þangað inn.
„Við fórum aðeins yfir það með vísan til síðasta
fundar sem ég átti við forvera hans, Barroso, en þá
fór Barroso fram á að áður en við ræddum fram-
tíðina þyrftum við fyrst að útlista hvernig við sæj-
um fyrir okkur umsóknina. Hvort hún ætti að
halda áfram eða ekki. Þar sem nú er orðið ljóst að
Ísland er ekki lengur umsóknarríki getum við far-
ið að ræða framhaldið,“ segir Sigmundur Davíð.
Gott að komin sé fram niðurstaða í málið
Spurður hvort Juncker hafi tjáð sig um ákvörð-
un ríkisstjórnar Íslands um að draga aðildarum-
sóknina til baka kveður Sigmundur Davíð nei við.
„Hann sagði ekkert til um það hvort hann væri
ánægður með niðurstöðuna. En hann var ánægður
með að það væri komin niðurstaða í málið þannig
að við gætum farið að huga að framtíðinni á nýjum
forsendum,“ segir hann um samskiptin við ESB.
Þá ræddu þeir Sigmundur Davíð og Juncker
meðal annars um mikilvægi EES-samstarfsins,
málefni norðurslóða, sjávarútvegsmál og jarðhita.
Hugað að samskiptum ESB og
Íslands á nýjum forsendum
 Forsætisráðherra fundar með forystumönnum Evrópusambandsins í Brussel
Ljósmynd/ESB
ESB Sigmundur Davíð Gunnlaugsson og Jean-
Claude Juncker hittust í gær á fundi í Brussel.
Þeir sem leggja í
stæði hreyfi-
hamlaðra án
heimildar hugsa
sig væntanlega
tvisvar um eftir
að Bílastæða-
sjóður Reykja-
víkurborgar
hækkaði gjald-
skrá fyrir stöðv-
unarbrotagjald.
Nú kostar 20 þúsund krónur að
leggja í stæði hreyfihamlaðra en
gjaldið var 10 þúsund krónur.
Stöðvunarbrotagjald vegna ann-
arra stöðubrota verður 10.000
krónur. Dragist greiðsla um tvær
vikur hækkar sektin um 50% og sé
enn ekki búið að greiða sektina eft-
ir 28 daga er álagningin 100%.
benedikt@mbl.is
Stöðubrotasekt
hækkuð um 100%
Stöðubrot Sektar-
greiðslur hækka.