Morgunblaðið - Sunnudagur - 26.07.2015, Blaðsíða 13

26.7. 2015 MORGUNBLAÐIÐ SUNNUDAGUR 13
urinn verði áfram. „En skipulagið gefur
jafnframt til kynna að ef hann hverfur,
sé gert ráð fyrir fleiri íbúðum á svæð-
inu.“ Hann telur þó meiri líkur en minni
á að slippurinn muni hverfa þegar fram í
sæki. „Ég tel það líklegra en ekki að
þessi starfsemi muni víkja, einfaldlega
vegna þess að það er verið að þrengja
að henni.“
Hann bendir á, að búið sé að gera
rammaskipulag um allt hafnarsvæðið,
ekki aðeins Vesturbugt. „Austurbakki,
svæðið í kringum Hörpu og nær allur
hafnarbakkinn er rammskipulagður sem
framtíðar íbúða- og atvinnusvæði sem er
liður í stækkun á miðborgarsvæðinu. Það
segir sig sjálft að þannig er verið að
þrengja að hefðbundinni hafnarstarfsemi.“
Ferðamennirnir sækja
í slippinn
Honum þykir áhugaverð sú staðreynd að
ferðamenn sæki í að gista við hliðina á
starfandi slippi og vísar þar með til
Hotel Marina við Mýrargötu. „Það er
frekar magnað að slippurinn trekki að
marga ferðamenn, þó svo að maður hefði
haldið að það væri óþægilegt að sofa við
hliðina á slipp,“ segir hann og bætir við
að eðlilega fylgi slippnum nokkurt rask.
Nefnir hann að dæmi séu um að málning
hafi slest á nálæga bíla þegar skip eru
sprautumáluð í slippnum.
„Þetta er ekki sérlega sniðug starfsemi
í kringum íbúðir og bíla og fólk. Ef
maður ætlaði að skipuleggja íbúðabyggð í
dag við hliðina á slipp, væri eflaust erfitt
að fá tilskilin leyfi, enda eru alls konar
reglur í gildi um mengunarstuðla og há-
vaðastuðla sem fara illa saman við hefð-
bundna íbúðabyggð.“
Í öðrum áfanga deili-
skipulagsins er gert
ráð fyrir skipaskurði
sem tengist út í sjó.
* Það er rómantískhugmynd margra aðslippurinn verði áfram á
svæðinu en slíkt getur
vissulega orsakað árekstra
í framtíðinni.“ Hrólfur
Jónsson, skrifstofustjóri
eigna og atvinnuþróunar
hjá Reykjavíkurborg.
Fáir geta neitað því, að veruleg uppbygging
hefur átt sér stað úti á Granda á undan-
förnum misserum og mannlíf þar blómstr-
að. Það er ekki síst að þakka verslunum,
veitingastöðum og kaffihúsum að ógleymd-
um Íslenska sjávarklasanum sem hafa flutt
starfsemi sína þangað. Fyrirtækjaeigendur á
svæðinu hafa flestir skoðanir á byggðaþró-
un á svæðinu.
Anna Svava Knútsdóttir, eigandi ísbúð-
arinnar Valdísar, fagnar tilkomu bílastæða
og segir jákvætt að fá enn meira mannlíf á
svæðið. Hún segist þó vilja sjá haftengda
starfsemi áfram á svæðinu, enda sjarm-
erandi starfsemi og gaman að fylgjast með.
„Fólk sem kaupir sér íbúðir á svæðinu
verður bara að vita að hverju það gengur
því að höfnin er þarna og hún er ekkert að
fara neitt,“ bætir hún við.
Mjöll Daníelsdóttir tók við rekstri Kaffi-
vagnsins árið 2013. Hún segir svæðið hafa
breyst ótrúlega hratt á þeim tíma og sé
mun líflegra nú en þá. Henni þykir jákvætt
að til standi að byggja félagslegar íbúðir fyr-
ir hina þurfandi og leikskóla fyrir börnin
þeirra. „Ég tel að framkvæmdirnar hefðu
jákvæð áhrif á svæðið,“ segir Mjöll og bætir
við að hún myndi vilja hraðahindrun á
Grandagarði og breyta götunni í ein-
stefnugötu.
Magnús Magnússon hjá Cafe Retro er
mótfallinn fyrirhuguðum framkvæmdum og
vill halda í óbreytta eða lítt breytta mynd
svæðisins. Hann leggur ríka áherslu á að
slippurinn fái að halda sér og bendir á að
hann sé hluti aðdráttaraflsins fyrir ferða-
menn. Það sama megi segja um smábáta,
ferðamennirnir hreinlega elski að horfa á
landanir á meðan þeir drekki kaffið sitt. ,,Ég
myndi vilja sjá meira af haftengdri starfsemi
á svæðinu, fleiri trillur og fiskilykt,“ segir
Magnús en hann kveðst ekki treysta því að
slippurinn fái að halda sér, eins og Reykja-
víkurborg hefur haldið fram. „Það skemmir
svæðið að vera með byggð alveg niður að
sjó. Auk þess er svæðið orðið verulega að-
þrengt,“ bætir hann við.
„Við sem erum með rekstur á svæðinu
teljum jákvætt að fá fleiri viðskiptavini og
tökum því vel á móti meira fólki hingað.
Aftur á móti eru plúsar og mínusar í öllu,“
segir Eirný Sigurðardóttir, eigandi Búrsins.
Hún óttast að mikil íbúðabyggð myndi
hægt og rólega ýta slippnum í burtu og á
erfitt með að sjá hvernig hann færi saman
við mikla íbúðabyggð.
„Ég vil ekki sjá slippinn og haftengda
starfsemi fara frá höfninni. Án haftengdrar
starfsemi er svæðið ekki höfn, heldur land-
skiki. Ég vil sjá hafnarsvæðið sinna sínu
hlutverki áfram eins og það hefur alltaf
gert. Eins tel ég að ný fyrirtæki eins og okk-
ar sem hafa komið sér fyrir á þessu svæði
geti lifað í sátt og samlífi við haftengda
starfsemi á svæðinu.“ Hún bendir á, að haf-
tengd starfsemi sé helsta ástæða þess að
fólk sæki Grandagarð heim.
„Það er allt sprungið hjá okkur í Húsi
sjávarklasans og við höfum verið að leita
að möguleikum til stækkunar við höfnina,“
segir Þór Sigfússon, stofnandi Sjávarklasans
að Grandagarði 16. „Þau rösklega 50 fyr-
irtæki sem eru hjá okkur þjóna ýmiss konar
haftengdri starfsemi og þau sjá mikinn hag
af nálægð við höfnina. Mörg þessara fyr-
irtækja hafa „snúið aftur“ niður á höfn þeg-
ar aðstaða bauðst enda er það hagkvæmt
fyrir þau og svo er það klárlega umhverf-
isvænt. Það er því mikið tækifæri að halda
áfram þessari uppbyggingu atvinnu-
starfsemi við höfnina. Ég er hlynntur bland-
aðri byggð en ofan í höfninni á að vera
hafnsækin starfsemi,“ segir Þór að lokum.
BLÓMLEG VERSLUN Í GRANDAGARÐI
Hvað segja rekstraraðilar?