Skólavarðan - 01.10.2006, Blaðsíða 10
10
KJARAMÁL
SKÓLAVARÐAN 7.TBL. 6. ÁRG. 2006
Tónlistarskólakennarar hafa staðið í
kjarasamningaviðræðum frá því í vor
og þegar þetta er skrifað hillir undir
samning. Í samninganefnd Félags
tónlistarskólakennara eru Sigrún
Grendal Jóhannesdóttir formaður
Félags tónlistarskólakennara, Árni
Sigurbjarnarson, Jón Hrólfur Sigur-
jónsson, Jón Sigurðsson, Kristjana
Helgadóttir, Ólafur Flosason, Sigurður
Sævarsson, Sæmundur Rúnar Þórisson
og Vilberg Viggósson.
„Kjarasamningar eiga að endurspegla um-
hverfið og þjóna því,“ segir Sigrún Grendal
en að hennar sögn er þessi forsenda ávallt
í lykilhlutverki hjá tónlistarskólakennurum
í samningaviðræðum. „Það er svolítil
kúnst að halda samningum opnum og
sveigjanlegum og mikilvægt að glata
ekki þáttum sem þessu tengjast þegar
nýir samningar eru gerðir. Aldrei má
gleyma að standa vörð um þessi gildi
kjarasamningsins, ekki eitt andartak.
Hann, eins og reyndar fleiri plögg, er
mikill mótunarvaldur starfsumhverfis. Ef
ekki er hlúð að þessum þáttum í samn-
ingnum verður hann íþyngjandi. Starfsemi
skólans getur þá í raun orðið fangi kjara-
samningsins.“
Sigrún segir samningaviðræður hafa
gengið samkvæmt áætlun. Nokkrir fundir
voru haldnir í vor og þráðurinn tekinn
upp eftir sumarfrí um miðjan ágúst
með tveimur fundum í viku að jafnaði.
Undanfarið hefur verið fundað nokkrum
sinnum allan daginn og reynt að láta
einstök atriði ríma þar sem ber á milli.
„Lokaglíman er að hefjast,“ segir Sigrún
og bætir við að allt eins geti verið búið að
semja þegar Skólavarðan berst lesendum.
Tónlistarskólakennarar eru að því leytinu til
í sömu stöðu og leikskólakennarar að báðir
hóparnir gerðu nokkurs konar fyrri hluta
samning fyrir tveimur árum og nú er seinni
hlutinn að renna í hlað. Sigrún segir góðan
stuðning frá hinum kennarastéttunum í
Kennarasambandinu og þær séu helstu
viðmiðunarhópar tónlistarskólakennara
ásamt tónlistarmönnum.
Gengið hefur vel að ræða margar af
helstu áherslum FT og FÍH í samningavið-
ræðunum. Þar má nefna þá kröfu að
starfsheiti hljómsveitarstjóra verði skil-
greint í kjarasamningi, kennarar fái greitt
fyrir afnot af eigin hljóðfærum og öðrum
búnaði í vinnunni og loks endurskoðun á
launapottsákvæði og úrbætur á því.
„Það er margt jákvætt í stöðunni,“
segir Sigrún, „og við höfum þá afstöðu að
vinna með viðsemjendum vegna þess að
það fellur saman við hagsmuni skóla og
starfsins sem þar er unnið. Við reynum að
hafa þau áhrif á viðræðurnar að þær séu
með þessum hætti og höfum undanfarin
ár aukið vægi þess að vinna á forsendum
fagsins og faglegs skólastarfs. Það er
mikilvægt að vinna að kjarasamningum
með heildrænni hugsun þar sem ekki er
vafamál að markmið og þar með hagur
kennara, stjórnenda, fags, skóla og
þjónustunnar sem veita ber fara saman,“
segir Sigrún að lokum.
keg
Tónlistarskólinn í samningum
Námskeið fyrir trúnaðarmenn um
vinnuumhverfismál hafa verið haldin
víða um land í október og send með
fjarfundabúnaði til enn fleiri staða
á landinu. Á námskeiðunum mætast
trúnaðarmenn í leikskólum, grunnskól-
um, tónlistarskólum og framhalds-
skólum og þetta er því vettvangur þvert
á skólastig þar sem kjörið er að spjalla
og bera saman bækur sínar.
Námskeiðin voru haldin á vegum Vinnu-
umhverfisnefndar KÍ sem tók til starfa
í janúar sl. í framhaldi af ályktun 3.
þings KÍ um stefnumótun og aðgerðir í
vinnuumhverfismálum. Til samstarfs um
námskeiðin fékk nefndin Vinnueftirlit
ríkisins og fulltrúar þaðan fjölluðu
um félagslega og andlega þætti í
starfsumhverfi skóla; álag í starfi og
kulnun, streitu og einelti og samskipti á
vinnustað.
Nú þegar námskeiðatörninni er
lokið hefjast nefndarmenn handa við
stefnumótun í vinnuumhverfismálum
og framundan eru meðal annars vinnu-
umhverfisdagar í skólum með vorinu. Þá
verða skólar hvattir til að velja sér einn
dag af nokkrum sem í boði eru, tileinka
hann vinnuumhverfismálum og taka þau á
dagskrá með myndarlegum hætti. Tillögur
og ráðgjöf verða í boði fyrir skólana um
hvað sé hægt að taka fyrir og hvernig.
Vinnuumhverfið skiptir okkur öll miklu máli
Myndskreyting úr bókinni „Teachers
have it easy“. Fyrri myndin er af
forsíðu bókarinnar. Seinni myndin
fylgir dagbókarfærslu kennara þar
sem bornir eru saman dagur hans og
dagur sölumanns hjá lyfjafyrirtæki.
Samanburðinn (ekki skáldskapur)
er hægt að lesa á www.campus-
progress.org/soundvision/273/
teachers-have-it-easy
Góða skemmtun!
keg
Vinna með mótherjanum
Falls asleep in front of the TV
while grading papers.
Sigrún Grendal
Lj
ós
m
yn
d:
k
eg