Skólavarðan - 01.02.2009, Blaðsíða 22

22
NýTT AÐILdARFéLAG í dEIGLUNNI
SKÓLAVARÐAN 1.TBL. 9. ÁRG. 2009
Aðdragandi
Árið 2004 hófst umræða meðal leikskóla-
stjóra um stofnun eigin aðildarfélags inn-
an Kennarasambands Íslands. Í upphafi
einskorðaðist hún að mestu við kjaramál.
Mörgum leikskólastjórum þótti eðlilegt að
þeir sjálfir væru leiðandi í umræðu um eigin
kjaramál og kjarasamningagerð. Síðar urðu
fagleg rök meira áberandi í ljósi þess að
miklar breytingar hafa átt sér stað á umhverfi
stjórnenda í skólakerfinu undanfarin ár og
er leikskólinn ekki undanskilinn. Árið 2005
var þetta meginumræðuefni aðalfundar fag-
hóps leikskólastjóra undir yfirskriftinni: „Eru
leikskólastjórar á krossgötum?“ Á vettvangi
faghópsins hefur umræðan síðan að mestu
farið fram í nefndastarfi, á fundum og með
viðhorfskönnunum meðal þeirra sem í hlut
eiga. Stjórn FL hefur átt beina aðild að
þessari vinnu frá haustinu 2006.
Hverjir skipa nýja félagið?
Til að gera langa sögu stutta þá vildi mikill
meirihluti faghóps leikskólastjóra stofna
sjálfstætt aðildarfélag innan KÍ. Í ljósi þess
sendi stjórn faghópsins erindi til stjórnar KÍ
í nóvember 2007 þar sem óskað var eftir því
að settur yrði á laggirnar starfshópur stjórn-
ar KÍ og faghópsins til að undirbúa stofnun
nýs félags og ræða ýmis mál sem því tengd-
ust, m.a. hverjir skipuðu félagið, fjárhagsmál,
húsnæði/aðstöðu í Kennarahúsinu o.fl. Í um-
ræðu innan stjórnar KÍ kom strax fram að
eðlilegt væri að stjórnendafélag á leikskóla-
stigi væri uppbyggt með svipuðum hætti
og á öðrum skólastigum, þ.e. að í því væru
skólastjórar, aðstoðarskólastjórar og félagar
sem starfa á skólaskrifstofum og í tengdum
störfum.
Þegar hér var komið sögu, eða í upphafi
árs 2008, var komin ný sýn á málið og
í kjölfar þess var það rætt á fundi fag-
hópsins þar sem aðstoðarleikskólastjórar
mættu einnig. Þar kom fram að vilji þeirra
stóð til þess að eiga aðild að félaginu. Í kjölfar
þess gerði faghópurinn skoðanakönnun
meðal aðstoðarleikskólastjóra. Ríflega 60%
tóku þátt í henni og mikill meirihluti sagðist
vera mjög eða frekar hlynntur aðild að slíku
félagi, eða 87,6%.
Á grundvelli þessarar niðurstöðu hefur
málið síðan verið unnið á aðalfundi FL
sem haldinn var í mars 2008, á þingi KÍ í
apríl 2008 þar sem samþykkt var tillaga
um stofnun aðildarfélagsins og í stjórnum
faghópsins, FL og KÍ síðan.
Hvað er framundan?
Um þessar mundir er að fara af stað svo-
kölluð skipulagsnefnd á grundvelli sam-
þykktar frá aðalfundi FL. Nefndin á að fjalla
um uppbyggingu og skipulag félaganna,
m.a. í svæðadeildum. Þegar hún hefur lokið
störfum munu taka til starfa tvær nefndir.
Önnur skal semja lög fyrir kennarafélagið
og hin fyrir stjórnendafélagið ásamt því
að undirbúa stofnfund þess sem haldinn
verður árið 2010, en á honum verður nýja
félagið til, starfsskipulag þess mótað og
kosið í trúnaðarstörf. Í tengslum við þann
fund (deginum áður) verður haldinn auka-
aðalfundur FL þar sem samþykkt verða
lög og starfsskipulag kennarafélagsins
ásamt því að kjósa til trúnaðarstarfa. Nýja
félagið verður síðan „fullgilt“ aðildarfélag
á hefðbundnu þingi KÍ sem haldið verður
árið 2011. Þá verða liðin sjö ár frá því að
umræðan hófst.
Vangaveltur
Fram hafa komið spurningar um hvort þetta
sé eingöngu jákvætt skref eða hvort hætta
sé á að togstreita myndist milli kennara
og stjórnenda. Slíkar vangaveltur eru nauð-
synlegar því mikilvægt er að vera með-
vitaður frá upphafi um gryfjur sem kunna
að vera fyrir hendi. Í öllu þessu ferli er afar
brýnt að vanda vinnubrögð og stuðla að því
að starfsskipulagið gefi tækifæri til þess að
hóparnir vinni saman og komi auga á og nýti
þá snertifleti sem sameiginlegir eru, sem
eflaust eru miklu fleiri en hinir.
Mörgum spurningum er hins vegar ósvar-
að, m.a. um aðkomu félagsins að samninga-
borðinu, en það er háð vilja viðsemjenda.
Lög um kjarasamninga opinberra starfs-
manna gera ekki ráð fyrir nema einum
samningsaðila sem fer með kjarasamnings-
umboð fyrir hverja starfsstétt og stjórnendur
eru ekki skilgreindir sem sérstök starfsstétt
þar sem ekki er krafist annarrar menntunar
af þeim, samkvæmt lögum, en kennurum í
leikskólum.
Á grunnskólastigi hefur sú þróun orðið
að Skólastjórafélag Íslands náði þeim
áfanga í síðustu samningum (vorið 2008)
að vera viðurkennt af Launanefnd sveitar-
félaga sem sjálfstæður samningsaðili með
sjálfstæðan samningsrétt. Félag stjórn-
enda á leikskólastigi verður svipað og
SÍ að stærð eða með um 550 manns (í
kennarafélaginu verða um 1650). Því er
ekki óeðlilegt að svipaðar reglur gildi um
kjarasamninga stjórnenda í leikskólum og
gilda nú um stjórnendur í grunnskólum þar
sem viðsemjandinn er hinn sami.
Eðlileg þróun
Það er trú undirritaðra að þetta skref
sé eðlileg þróun og eigi eftir að styrkja
stjórnun í leikskólum, ekki síst hlutverk
og starfskjör aðstoðarskólastjóra, en ein
meginkrafa síðustu ára hefur verið að auka
vægi stjórnunar í starfi þeirra. Um leið
leggjum við mikla áherslu á nauðsyn þess
að sátt ríki um breytingarnar á félagsskipan-
inni og síðast en ekki síst að samstarf
félaganna verði náið og styrki leikskólastigið
í heild.
Björg Bjarnadóttir
formaður Félags leikskólakennara
Elín Ásgrímsdóttir
formaður faghóps leikskólastjóra
Stofnun aðildarfélags
stjórnenda á leikskólastigi
Björg Bjarnadóttir
Lj
ós
m
yn
d
:
ke
g
Lj
ós
m
yn
d
f
rá
h
öf
un
d
i
Elín Ásgrímsdóttir