Gerðir kirkjuþings - 2010, Blaðsíða 155

155
• Námsumhverfi þarf að taka mið af þroska og þörfum barnanna og þurfa húsgögn
og annar búnaður að miðast við þetta. Börn þurfa gott rými og aðstöðu til athafna
eins og t.d. til leikja og föndurs.
• Barna- og unglingastarf í kirkjunni skal hafa fastan samastað og það skal ekki
látið víkja fyrir öðru starfi á vegum kirkjunnar.

3.6 Framkvæmd starfsins
Skipulagsstarfið er ákveðið ferli og felur í sér greiningu á aðstæðum og þörfum
barnanna og safnaðarins. Markmiðasetning byggir á þessari greiningu og í
safnaðarnámskrá, sem hver söfnuður tekur saman, eru allir þessir þættir settir fram.
Til að geta stöðugt bætt og endurskipulagt starfið þarf að fara fram stöðugt endurmat á
því.
• Greining á söfnuðinum. Gott er við undirbúning og skipulagningu á
fræðslustarfinu að afla upplýsinga um samsetningu safnaðarins. Hversu mörg börn
eru í söfnuðinum? Hver er aldursdreifingin? Hvar búa börnin? Þessar upplýsingar
og aðrar sem þurfa þykir ættu að vera góð hjálp við kortlagningu á aðstæðum og
þörfum barnanna í söfnuðinum.
• Þarfir og markmið starfsins. Þegar þessi greining hefur farið fram ættu þarfir
safnaðarins að hafa komið í ljós. Út frá þessum forsendum ætti að vera
grundvöllur fyrir markmiðasetningu starfsins. Hvers væntum við með starfinu?
Hvert viljum við stefna og hvaða marki viljum við ná?
• Safnaðarnámskrá. Þegar markmiðin hafa verið sett fram þarf að velja leiðir til að
ná settu marki. Mikilvægt er að markmið og leiðir sem valdar eru séu settar fram á
skýran og raunhæfan hátt. Safnaðarnámskráin á að veita upplýsingar um tilgang
starfsins og þær leiðir sem fara á. Hún er bæði ætluð starfsfólki safnaðarins til
leiðbeiningar og á að veita foreldrum upplýsingar um starfið. Safnaðarnámskráin
er unnin í samvinnu og samin af starfsmönnum safnaðarins með hliðsjón m.a. af
námskrá barnastarfsins.
• Mat. Til þess að fá upplýsingar um hversu vel hafi tekist til og hvort
markmiðunum hafi verið náð er nauðsynlegt að leggja eitthvert mat á starfið. Vel
má fá börnin til að bregðast við – hvað fannst þeim? Hvað fannst okkur sjálfum?
Hvað með foreldrana? Matið er forsenda fyrir breytingum á skipulagi starfsins.

3.7 Leiðsögn
Nauðsynlegt er að starfsmenn barnastarfsins fái þann stuðning sem þeir þurfa á að
halda í starfinu. Ýmis vandamál geta komið upp sem þarf að takast á við. Þetta geta
verið samstarfsörðugleikar eða persónulegir erfiðleikar. Æskilegt er að leiðtogar hafi
opinn aðgang að aðilum sem þeir geta leitað til þegar álitamál eða erfiðleikar koma
upp í starfinu.

4. Menntun barnafræðara
Öflug fræðslustarfsemi fyrir fræðara er forsenda árangursríks starfs. Fræðslan þarf
bæði að ná til trúarlega þáttarins og þess uppeldis- og félagslega. Góð þekking á
boðskap kristninnar er mikilvæg. Einnig er sú þekking mikilvæg er snýr að almennri
félagsstarfsemi og því hvernig eigi að umgangast og ná til barnanna.