Víkurfréttir - 15.12.2016, Side 52
52 fimmtudagur 15. desember 2016VÍKURFRÉTTIR
Hildur Björk Pálsdóttir
hildur@vf.is
Frá því hann man eftir sér hefur hann
ætlað sér að verða þyrluflugmaður.
„Líklegast kviknaði þyrluáhuginn
með því að sjá þyrlur Landhelgis-
gæslunnar reglulega á flugi sem
barn.“ Samhliða stúdentsnáminu í
Fjölbrautaskóla Suðurnesja tók Bjarki
einkaflugmannsréttindi á flugvélar
hjá Keili. Hann segir það hafa verið
góða reynslu til að taka með sér í
þyrlunámið. „Þrátt fyrir að hafa verið
svona handviss um hvað ég ætlaði að
verða þá langaði mig að prófa hvort
flug væri 200% fyrir mig. Og einnig
gat ég hreinlega ekki beðið eftir að
byrja fljúga svo ég skráði mig í einka-
flugið á flugvél. Þyrlunám er ekki
kennt á Íslandi svo það var ekki í
stöðunni að fá að læra á þyrlu strax,“
segir Bjarki.
Aðspurður hver helsti munurinn sé
á flugnámi flugvéla og þyrla segir
hann að flugvélar vilji fljúga en þyrlur
vilja helst ekkert með flug hafa. Þar
er átt við að flugvélar hafa vængi og
eru eðlisfræðilega hannaðar til að
fljúga og svífa en þyrlur aftur á móti
eru vængjalausar og hafa ekki mikið
svifgildi séu þær án afls frá mótor.
„Þetta er mikið til það sama í bóklega
náminu en flugeðlisfræðin er það sem
er ólíkast.“
Bjarki fór svo til Gautaborgar í skóla
sem heitir Northern Helicopters í
samtvinnað atvinnuflugnám á þyrlu
en samtvinnað þýðir að námið er sett
upp sem atvinnuflugnám frá byrjun
en ekki einkaflug fyrst. „Mér fannst
ég fá meira út úr verklegu kennslunni
fyrir vikið því markmiðið hjá kennur-
unum var að gera mann tilbúinn fyrir
verklega prófið sem fyrst og eins taka
fyrir mikilvæga hluti sem munu nýtast
þegar ég hef störf sem flugmaður.“
Skólinn fluttist svo til Hróarskeldu í
Danmörku og segir Bjarki það hafa
verið góða reynslu að prófa að fljúga
í báðum löndum. „Flugreglurnar í
Danmörku eru töluvert strangari en
þær sænsku á þann veg að ekki má
lenda hvar sem er eins og í Svíþjóð
heldur þarf að sækja um sérstakt leyfi
hjá Flugmálastjórn.“
Samtvinnaða námið tekur tólf til átján
mánuði en það er hægt að taka það
á styttri tíma ef maður er virkilega
duglegur. Ég viðurkenni að það var
erfitt að hanga inni og lesa yfir sumar-
mánuðina þar sem það voru 25 gráður
og heiðskírt nánast í fjóra mánuði.
Þetta er stutt nám en virkilega mikið
efni svo þetta er mikil keyrsla. Að-
spurður hvort þyrlunám sé mikið
dýrara en flugnám segir Bjarki að
munurinn sé töluverður, samtvinnað
atvinnuflugnám á flugvélar kosti um
9 milljónir en á þyrlu um 17 milljónir.
Er erfitt að fá starf sem
þyrluflugmaður á Íslandi?
„Já og nei, málið er það að þegar
maður er nýútskrifaður úr náminu
með fáa tíma verður alltaf mjög erfitt
að komast í fyrstu vinnuna og þess
vegna mjög mikilvægt að reyna að
skapa sér tengsl innan geirans því
þetta er mjög lítill heimur. Þetta er
líklega besti tíminn til að læra því
tækifærin fara ört vaxandi hér heima
fyrir nýmenntaða þyrluflugmenn
með þeim ferðamannastraumi sem
nú er á Íslandi.“ Draumur Bjarka er að
komast inn hjá Landhelgisgæslunni
en hann er einnig opinn fyrir því að
vinna úti í heimi. „Ég væri rosalega
til í að geta byrjað ferilinn hér heima
en annars eru Noregur og Grænland
þeir staðir sem ég myndi vilja prófa,“
segir Bjarki.
Hvernig var að læra í Svíþjóð?
Að læra í Svíþjóð fannst mér virkilega
fínt. Svíar eru mjög opnir og auðvelt
að kynnast þeim. Skólinn sem ég var
í kennir námið á ensku svo það voru
strákar og stelpur alls staðar að úr
heiminum komin í skólann til að læra.
Skólinn var á gömlum herflugvelli í
15 mínútna fjarlægð frá Gautaborg og
ég bjó á heimavist skólans sem var við
völlinn. Það var ódýrt og hentugt að
vera nálægt skólanum og kynntist ég
öllum mínum vinum á heimavistinni
sem marga hverja ég er í sambandi við
vikulega í dag.
Aðspurður hvort hann hafi alltaf haft
áhuga á þyrlum svarar Bjarki játandi.
„Allt mitt líf hef ég verið með þessa
bakteríu í mér. Ég held að margir
Suðurnesjamenn séu með flug bakt-
eríuna í sér enda lítið annað hægt
þegar maður horfir á eftir flugvélum
lenda og taka á loft alla daga, allan
ársins hring.
Það skemmtilegasta númer 1, 2 og 3
er frelsið sem þyrlan bíður upp á. Ef
mann langar að borða nesti uppi á jökli
þá lendir maður bara uppi á jökli, ekk-
ert mál svo lengi sem veður leyfir. Þú
ert ekki háður flugvöllum og útsýnið
úr þyrlu er á allt öðrum „standard“
en í flugvél þar sem þú ert ekki með
hreyfil í sjónlínunni og gólfið fram í
er í flestum tilvikum mjög gegnsætt.
Einnig er það fjölbreytileikinn sem
þyrlurnar þjóna sem gerir þetta að
mjög spennandi starfi, til dæmis kvik-
myndaverkefni, „heli skiing,“ útsýnis-
flug, „sling“ verkefni þar sem verið er
að hífa þunga hluti með þyrlunum og
margt fleira.
Hver er skemmtilegasti
staðurinn sem þú hefur lent á?
Í Svíþjóð er rosalegt magn af eyjum
og margar hverjar eru virkilega
flottar með villtum dýrum svo að í
aðfluginu sér maður alls kyns dýr á
hlaupum, mjög skemmtilegt. En minn
skemmtilegasti staður var þegar ég
og einn vinur minn tókum þyrlu og
pöntuðum borð á fínum stað á eyju
fyrir utan Gautaborg og lentum síðan
við hliðina á staðnum, borðuðum og
flugum svo heim. Aðflugið krafðist
ákveðinnar vindáttar til að geta lent
og svo voru ljósastaurar allt í kringum
litla lendingarflötinn svo þetta var
erfitt en klárlega þess virði.
Bjarki Þór Valdimarsson er 23 ára keflvískur flugþjónn með at-
vinnuþyrluflugmannsréttindi. Draumur Bjarka frá barnsárum er að
starfa sem þyrluflugmaður hjá Landhelgisgæslu Íslands en hann fór
til Svíþjóðar fyrir tveimur árum og lærði atvinnuflug á þyrlu. Námið
er krefjandi og dýrt en aftur á móti er það frekar stutt, skemmtilegt
og inniheldur án efa flottasta skólastofuútsýni sem hugsast getur.
LAUTARFERÐ
UPPI Á JÖKLI
●● Bjarki●Þór●Valdimarsson●segir●mikið●frelsi●fólgið●í●
því●að●geta●lent●hvar●sem●er●á●þyrlu
„Ég held að margir
Suðurnesjamenn séu með
flug bakteríuna í sér“
Sólóflug á flottum sumardegi með enga vinstri hurð á þyrlunni. Fegurð eyjanna á vesturströndinni leynir sér ekki.
Stoppað til að teygja úr sér á heitum sumardegi.
Haukur og Bjarki eftir fyrsta þyrluflug Bjarka þar sem hann fékk að prófa að
fljúga.