Morgunblaðið - 13.12.2017, Qupperneq 4

4 FRÉTTIRInnlent
MORGUNBLAÐIÐ MIÐVIKUDAGUR 13. DESEMBER 2017
Ágúst Ingi Jónsson
aij@mbl.is
Forsvarsmenn Vísis hf. í Grindavík
skrifuðu í gær undir samning um ný-
smíði á 45 metra löngu og 10,5 metra
breiðu línuskipi við skipasmíðastöð-
ina Alkor í Póllandi. Skipið kemur til
landsins á miðju ári 2019 og er fyrsta
nýsmíðin af þessari stærðargráðu í 75
ára sögu útgerðar á vegum Vísis-
fjölskyldunnar og sú fyrsta í rúmlega
50 ára sögu Vísis. Samningsverðið er
7,5 milljónir evra eða sem nemur tæp-
lega einum milljarði króna.
„Með nýja skipinu fáum við öflugt,
hefðbundið þriggja þilfara línuskip
þar sem eitt þilfarið verður fyrir
áhöfnina. Skipið er hannað af skipa-
verkfræðingum hjá NAVIS og Kjart-
ani Viðarssyni, útgerðarstjóra Vísis.
Við hyggjumst áfram leggja áherslu á
línuveiðar og vera með fimm skip í
rekstri, þannig að hvert skipanna eigi
sinn virka dag til löndunar í hverri í
viku. Nýjasti fiskurinn fer til vinnslu í
frystihúsinu, en sá eldri verður unn-
inn í salt eins og áður,“ segir Pétur H.
Pálsson, framkvæmdastjóri Vísis hf.
Nýsmíðin er þriðja verkefnið sem
pólska skipasmíðastöðin vinnur fyrir
Vísi. Á næsta ári kemur Arney alger-
lega endurbyggð frá Póllandi, og
verður nýr Sighvatur GK 57, en eldra
skip með sama nafni hverfur úr flota
Vísis. Fyrir hálfu öðru ári kom Fjölnir
GK 657 úr allsherjar klössun þar sem
allt er nýtt um borð nema vélarrúmið.
Páll Jónsson GK 7 fer úr flota Vísis-
manna fyrir nýtt skip með sama nafni
og að sögn Péturs er vonast til að end-
urnýjun flotans ljúki á næstu þremur
árum með endurbyggingu á Jóhönnu
Gísladóttur GK 557 og væntanlega
nýsmíði fyrir Kristínu GK 457.
Dagsetningin ekki tilviljun
Sögu útgerðar fjölskyldunnar má
rekja allt til ársins 1930 þegar Páll
Jónsson, skipstjóri á Þingeyri, hóf út-
gerð bátsins Fjölnis. Páll var afi
systkinanna sex í Vísi og það var ekki
tilviljun að gærdagurinn var valinn til
að skrifa undir samning við skipa-
smíðastöðina.
12. desember var fæðingardagur
Páls Jónssonar, en hann fórst ásamt
allri áhöfn á Hilmi og farþegum á
Faxaflóa 25. nóvember 1943 í sínu
fyrsta verkefni, sem var að flytja vik-
ur milli Arnarstapa og Reykjavíkur,
samkvæmt upplýsingum Péturs. Í
stað fertugsafmælis var haldin minn-
ingarathöfn um Pál og áhöfn hans
þennan dag. Þá eru núna rétt um 75
ár frá því að Páll gekk frá samningum
um smíði á Hilmi á Akureyri.
Páll átti bátana Fjölni og Hilmi og
hélt Jóhanna Daðey Gísladóttir,
ekkja Páls, áfram útgerð Fjölnis til
síldveiða og fiskflutninga í stríðinu,
þar til hann sökk eftir árekstur við
enskt póstskip í lok stríðsins, í mars
1945. Þau voru foreldrar Páls H. Páls-
sonar, sem ungur hóf að sækja sjóinn,
en hann var 11 ára þegar faðir hans
fórst. Páll stofnaði með fleirum Vísi í
Grindavík árið 1965, en hann lést í
febrúar 2015.
Tölvumynd/NAVÍS
Nýr Páll Jónsson Skipið er væntanlegt til Vísis í Grindavík á miðju ári 2019 frá Alkor í Gdansk Póllandi.
Fyrsta nýsmíðin fyrir
Vísismenn frá byrjun
 Línuskip frá Póllandi 2019  Floti Vísis endurnýjaður
Ljósmynd/Jón Steinar Sæmundsson
Formlegt Pétur H. Pálsson, forstjóri Vísis, og Jan Pukalski og Andrzej Zolc,
fulltrúar Alkor, skrifuðu undir samninga við skrifborð Páls Jónssonar.
Höskuldur Daði Magnússon
hdm@mbl.is
Hafmeyjan eftir Nínu Sæmundsson
hvarf af stalli sínum í Reykjavíkur-
tjörn í óveðrinu sem gekk yfir í
byrjun nóvember. Sigurður Trausti
Traustason, deildarstjóri hjá Lista-
safni Reykjavíkur sem hefur um-
sjón með útilistaverkum í borginni,
þurfti að vaða út í Tjörn í leit að
Hafmeyjunni og fann hana á kafi
skammt frá stöplinum sem hún á
að standa á.
„Þetta var nú með furðulegri
símtölum sem ég hef fengið. Ég
hélt að það væri verið að grínast í
mér þegar ég var spurður hvar
Hafmeyjan væri. En þetta er auð-
vitað bara áframhald af sögu þessa
verks,“ segir Sigurður Trausti í
samtali við Morgunblaðið.
Hafmeyjunni var komið á sinn
upprunalega stað í Tjörninni sum-
arið 2014. Þetta er önnur afsteypa
af tveimur sem gerðar voru af verki
Nínu en hin var sprengd í loft upp
eins og frægt varð á nýársnótt árið
1960. Verkið hafði þá aðeins verið í
Tjörninni í nokkra mánuði en hart
var deilt um uppsetningu þess og
ágæti. Þessi afsteypa hafði staðið
við Smáralind frá árinu 2001 en
Smáralind gaf borginni verkið árið
2014.
Hreinsuð ef þurfa þykir
„Það var mjög slæmt veður dag-
inn áður og styttan er nokkuð
framþung. Hún hefur bara stungið
sér til sunds í óveðrinu,“ segir Sig-
urður Trausti um atburðinn.
„Það er þegar farið að huga að
því að koma henni upp á stall aftur.
Það er búið að bora fyrir teinum
sem fara í undirstöðuna. Hún situr
á öðrum steini sem svo situr á und-
irstöðunum. Nú verður hún dyggi-
lega fest. Það er verið að bíða fær-
is, bíða eftir að veðurguðirnir verði
okkur hliðhollir. Þá verður hún hífð
upp,“ segir Sigurður.
Áður en Hafmeyjan verður sett
aftur á stall sinn mun forvörður á
vegum safnsins skoða verkið og það
verður hreinsað ef þurfa þykir.
„Henni finnst greinilega að hún
eigi heima í vatninu en það finnst
okkur ekki,“ segir Sigurður í létt-
um tón.
Hafmeyjan stakk sér til sunds
 Enn ferðalag á umdeildri styttu Nínu Sæmundsson  Þoldi ekki óveðrið sem
gekk yfir í nóvember  Verður nú dyggilega fest og hífð upp þegar veður leyfir
Morgunblaðið/Ómar
Hafmeyjan Svona leit hún út í sumar en nú svamlar hún um í Tjörninni.
Einn heppinn miðaeigandi hlaut 70
milljónir kr. í milljónaveltu Happ-
drættis Háskóla Íslands en dregið
var í gærkvöldi. Um er að ræða
hæsta vinning sem greiddur hefur
verið út í íslensku happdrætti á
þessu ári. Úlfar Gauti Haraldsson,
rekstrarstjóri flokkahappdrættis
Háskóla Íslands, þurfti að beita öll-
um sínum sannfæringarkrafti til að
fá vinningshafann til að trúa frétt-
unum þegar hann hringdi í hann.
„Þegar viðkomandi vissi upp-
hæðina þá bað hann mig um að
hinkra aðeins því hann vildi setjast
niður. Ég þurfti að leggja mig fram
um að fá viðkomandi til að trúa
þessu. Ég held að ég hafi aldrei
þurft að leggja mig jafn mikið fram
og þarna,“ sagði Úlfar í samtali við
mbl.is. Annar heppinn miðaeigandi
fékk 25 milljónir kr. í vinning á
trompmiða og fjórir fengu 5 millj-
ónir hver.
Einn miðaeigandi
fékk 70 milljónir
Morgunblaðið/Golli
Helgi Bjarnason
helgi@mbl.is
Margt í tillögum um borgarlínu
byggist á veikum grunni og gæti svo
farið að farið verði út í mjög vafa-
samt samgöngukerfi. Það er niður-
staða athugunar Trausta Valssonar
skipulagsfræðings og Þórarins
Hjaltasonar umferðarverkfræðings
en þeir hafa sent punkta um niður-
stöður sínar til borgarstjóra og bæj-
arstjóra á höfuðborgarsvæðinu.
Bæjarstjórinn í Garðabæ mun taka
málið upp á vettvangi Samtaka sveit-
arfélaga á höfuðborgarsvæðinu og
leggur til að Trausta og Þórarni
verði boðið á fund.
Borgarlínan gengur út á að greiða
fyrir strætisvögnum á höfuðborgar-
svæðinu, meðal annars með sérstök-
um akreinum og betri biðstöðvum.
Trausti og Þórarinn segja að taka
þurfi tvær akreinar fyrir borgarlín-
una – og meira þar sem biðstöðvar
með breiðum brautarpalli verða sett-
ar á milli akreina. Taka verði þetta
pláss frá viðkomandi göturými. Til
dæmis þyrfti að fækka bílaakreinum
á Hringbraut vestur í bæ niður í eina
í hvora átt.
Mat á áhrifum ótrúverðugt
Það kemur þeim undarlega fyrir
sjónir að hlutur ferða með einkabíl
eigi að minnka um 18 prósentustig
og hlutfallslega um 24% með þessum
framkvæmdum. „Í ljósi þess að
höfuðborgarsvæðið er bílaborg verð-
ur að telja þessa niðurstöðu ótrú-
verðuga,“ segir þeir og nefna að
óraunhæft sé að reikna með að hlut-
ur ferða með strætó þrefaldist frá
því sem er í dag og mjög hæpið að
hlutur gangandi og hjólandi aukist
um 10 prósentustig eða hlutfallslega
50% vegna mikilla vegalengda og
veðurfarsaðstæðna.
Boðaðir á fund hjá SSH
„Þeir eru búnir að kanna þetta
eitthvað og eru eldri en tvævetrir.
Við erum einnig búnir að láta gera
allskyns athuganir. Mér finnst sjálf-
sagt að taka þetta allt til umræðu,“
segir Gunnar Einarsson, bæjarstjóri
í Garðabæ og fyrrverandi formaður
SSH. Hann segir að hann muni taka
málið upp á vettvangi samtakanna
og hafi rætt við formann þeirra um
að bjóða Trausta og Þórarni á fund
til að fara yfir athugasemdir þeirra.
Grunnur borg-
arlínu veikur
FALLEG OG VÖNDUÐ
LEIKFÖNG
Kíktu á netverslun okkar
bambus.is
Borgartún 3, sími 847 1660, www.bambus.is, bambus@bambus.is
bambus.is bambus.is • Opið mánudaga og fimmtudaga frá kl. 10-14
úr náttúrulegum efnivið,
tré og silki