Breiðfirðingur - 01.04.1995, Side 88

Einar G. Pétursson
Greftrun Benedikts Gabríels
Ósamhljóða sagnir
bornar saman við heimildir*
Flestar sóknarkirkjur hér á landi eiga sér mjög gamla sögu og
er oftast ekki hægt að fullyrða hvenær tiltekin kirkja var fyrst
byggð. Nokkrar undantekningar eru þó frá þessu og þar á
meðal er kirkjan í Dagverðarnesi í Dalasýslu. Þar var lengi
bænhús, en með konungsbréfi frá 9. apríl 1758 var það gert að
sóknarkirkju, sem sókn áttu til í upphafi aðeins byggðar eyjar
undan Klofningi og Langeyjarnes. Ormsstaðir, Stakkaberg og
aðrir bæir á landi áttu eftir sem áður sókn alla leið að Skarði,
þótt þangað væri miklu lengri leið. Sóknaskipanin komst ekki
í núverandi horf fyrr en eftir að kirkjan í Búðardal á Skarðs-
strönd var lögð niður með konungsbréfi 14. sept. 1849. Þetta
er í raun sérstæð saga, sem ekki verður rakin hér nánar. Af
þessum sökum er víst að í kirkjugarðinum í Dagverðarnesi
hefur verið minna um það en víðast annars staðar að margoft
hafi verið grafið á sama stað, enda jarðvegur í garðinum víða
* Það sem hér á eftir fer er skráð og athugað að beiðni frænku minnar, Ólafar
Elimundardóttur á Stakkabergi (f. 1905). Feður okkar voru systrasynir og þess vegna
er Jóhannes Þórðarson sem síðar verður nefndur sameiginlegur langafi okkar. Henni
fannst hallað á Jóhannes og Benedikt Gabríel með því orðspori sem fór af greftrun
Benedikts og bað mig að skoða málin og hér sést árangurinn.
Einnig var þessi samantekt borin undir Baldur Gestsson á Ormsstöðum og sam-
þykkti hann það sem hér er skrifað. Afkomanda Benedikts Gabríels, Sveini Einars-
syni var þetta einnig sýnt og samþykki hans fengið fyrir birtingu. Frá honum eru
komin bréfin frá Benedikt Gabríel sem birt eru með formála hér aftan við.