Breiðfirðingur - 01.04.2016, Side 180

BREIÐFIRÐINGUR180
enn og aftur í tvær áttir. Hluti fuglanna fór beint til Weddellhafsins en
aðrir, þ. á m. íslensku kríurnar, flugu langleiðina til Ástralíu áður en þær
sneru við og héldu til Weddellhafsins.
Fuglarnir voru komnir á vetrarstöðvarnar í nóvember og héldu sig
þarna suður frá uns leið á útmánuði. Ferðalagið til vetrarstöðvanna
við Suðurskautslandið tók að meðaltali um 80 daga en ferðin til baka
helmingi styttri tíma. Þá flugu kríurnar í S­laga ferli eftir svo að segja
miðju Atlantshafi til varpstöðvanna á norðurslóðum. Að meðaltali fóru
kríurnar um 74 þúsund km milli sumar­ og vetrarheimkynna. Báðir
íslensku fuglarnir fóru reyndar mun lengra eða yfir 90 þúsund km krók
til austurs. Á þessari mynd má sjá ferðir grænlenskra og íslenskra kría.
Tvenns konar meginferðamynstur kría frá Grænlandi og Íslandi. Flestir fuglanna fara
suður á bóginn undan Afríkuströndum (mynd A) en hinar suður með Suður­Ameríku
(mynd B). Allar enda kríurnar á vetrarstöðvum í Weddellhafinu við Suðurskautslandið.
Grænn litur táknar suðurferðir kríanna, rauður vetrarstöðvar en gulu línurnar sýna
ferðir fuglanna norður. Myndin er fengin úr vísindagrein Egevang o.fl. (2010).
Þessum niðurstöðum á ferðalagi kríunnar var lýst í vísindagrein í
Proceedings of the National Academy of Science (Egevang o.fl. 2010)
og var þeirri birtingu ótrúlega vel tekið, bæði af vísindasamfélaginu
og almenningi. Nánast allir þekkja kríur og vita að þær ferðast fugla
lengst milli varpsvæða og vetrarstöðva. Í kjölfar greinarinnar var haft
samband við höfunda frá um 600 fréttaveitum, sjónvarpi, útvarpi og
vefmiðlum, í Norður­Ameríku, Grænlandi, Íslandi, Danmörku, ýmsum
öðrum Evrópulöndum og víða allt austur til Kína.
Tvær kríur með ljósrita sáust í Flatey til viðbótar þeim sem náðust.