Breiðfirðingur - 01.04.2016, Qupperneq 186

BREIÐFIRÐINGUR186
til, að tækin hafi ekki verið fest nægilega vel eða fuglarnir hafi losað þau
en fuglar eins og fýlar og toppskarfar eru með sterka gogga með króki.
Hér eru raktar valdar niðurstöður úr rannsóknum með GPS­
tækjum. Þeim er lýst nánar í framvinduskýrslu frá sumrunum 2014
og 2015 (Brides o.fl. 2016). Ástæða er til að taka fram að hér er um
frumniðurstöður að ræða frá tiltölulega fáum fuglum af hverri tegund.
Toppskarfur
Fuglar voru merktir í varpinu í Klofningi við Flatey. Allir merktir
toppskarfar fóru tiltölulega stutt til að afla sér fæðu. Lengst fóru
þeir rúma sex kílómetra þvert yfir Flateyjarsund að grunnsævinu við
vestustu sker í Svefneyjalöndum. Nokkrir einstaklingar fóru á sömu
slóðir oftar en einu sinni. Sumir fuglar fóru aðeins tæpa tvo kílómetra
norður fyrir Flatey.
Fýll
Fæðuferðir fýla eru mun lengri en toppskarfa en nokkrir dagar geta liðið
milli þess að þeir komi aftur að hreiðrinu. Niðurstöður frá Flatey sýna
að fýlar með unga í hreiðri nýta mestallan Breiðafjörð til fæðuöflunar.
Einn fór út á mitt sundið milli Íslands og Grænlands. Nákvæmlega hvert
þeir fara getur m.a. farið eftir því hver dreifing fiskibáta er því fýlar eru
með algengustu sjófuglum sem hópast að bátum við veiðar. Fýlar tína
einnig ýmislegt sem flýtur á yfirborði sjávar og gleypa því fugla mest
alls konar drasl frá manninum, s.s. fljótandi plastflögur (Kühn & van
Franeker 2012). Hér er um að ræða umhverfisvandamál sem verður
sífellt umfangsmeira.
Rita
Ritur hafa svipaða fæðuhætti og fýlar að því leyti að þær tína æti af
yfirborði sjávar. Báðar tegundir eiga það til að stinga haus og hálfum
skrokk á kaf ef fuglarnir sjá að æti er að falla til botns. Ritur koma
einnig að fiskibátum að veiðum í von um æti.
Á árum áður þegar tíðkaðist að henda úrgangi í sjó flykktust ritur
að skipum. Þær eru einnig algengir gestir nærri þéttbýliskjörnum þar