Breiðfirðingur - 01.04.2016, Page 204

BREIÐFIRÐINGUR204
í náttúruverndarlögunum má svo m.a. rekja til Ramsarsamningsins en
allir þessi samningar hafa sömu meginmarkmið þó sumir séu sértækari
en aðrir og helgast það m.a. af því hvenær samningarnir urðu til og þær
kröfur sem voru uppi á þeim tíma.
Á að tilnefna Breiðafjörð sem Ramsarsvæði?
Þegar fjallað er um að tilnefna svæði, t.d. sem Ramsarsvæði, heyrast
oft efasemdaraddir og oft óttast menn aukin afskipti erlendis frá og
íslenskra stjórnvalda. Hvað Breiðafjarðarsvæðið varðar hefur það sýnt
sig að bæði lög um vernd Breiðafjarðar og lög um náttúruvernd tilgreina
ekki sérstaklega hvað það er sem er verndað eða hvernig nákvæmlega
eigi að viðhalda vernd og skynsamlegri og sjálfbærri nýtingu við
fjörðinn. Einnig er umsýsla og leyfisveitingar oft á gráu og óljósu
svæði. Nýlegt dæmi eru óskir um aukna þang­ og þaratekju í firðinum
sem kom öllum í opna skjöldu. Upp komu spurningar eins og: Hver á
að leyfa þang og þaratekju, hvað má taka mikið, hver verða áhrifin á
lífríkið, hvaða rannsóknir hafa verið stundaðar svo taka megi upplýstar
ákvarðanir? Hvað með landeigendur, hver er þeirra réttur? Hvað með
almenna náttúruvernd og mat á umhverfisáhrifum o.s.frv. Ákveðið var
að bregðast við þessu með því að laga lög um stjórn fiskveiða og kynnt
drög að frumvarpi um þær lagabreytingar. Þegar þetta er skrifað hefur
verið bent á marga annmarka við frumvarpsdrögin og þá ekki síst í
sambandi við leyfisveitingar og rétt landeigenda og þeirra sem nú nýta
þara og þang og hvernig eigi að ákveða hvað sé sjálfbær nýting og hvað
ekki. Einnig hefur verið bent á nauðsyn þess að byggja allar ákvarðanir
um nýtingu þara og þangs á alhliða rannsóknum og vöktun en ekki
eingöngu litið til vaxtarhraða þeirra tegunda sem eru nýttar.
Með tilnefningu Breiðafjarðar í samræmi við Ramsarsamninginn
skuldbindur Ísland sig til að fara að þeim leikreglum sem gilda um
Ramsarsvæði og í raun þýðir það að þess skuli gætt til framtíðar að
svæðið sé verndað t.d. gegn ofnýtingu og er það í anda sjálfbærrar
nýtingar og í samræmi við bæði stefnu stjórnvalda, lög um vernd
Breiðafjarðar og lög um náttúruvernd.
Þegar svæði hefur verið tilnefnt sem Ramsarsvæði hefur skrifstofa