Ægir - 01.10.2018, Blaðsíða 46
Aukinnar samstöðu
er þörf meðal sjómanna
„Verkefnin á okkar borði hér í VM eru
alltaf næg enda um að ræða 3.600
manna félag með tengsl vítt og breitt í
atvinnulífinu. Innan okkar vébanda er
um fimmtungur félagsmanna á sjó og er
langstærstur hluti þeirra á fiskiskipum.
Stærsta verkefnið hvað sjómennina okk-
ar varðar er að tryggja meira gagnsæi
við útreikninga á aflahlutnum og skapa
um leið meira traust á milli þeirra og út-
vegsmanna. Því miður er það traust
ekki fyrir hendi í dag og það þurfum við
að laga,“ segir Guðmundur Helgi Þórar-
insson, formaður Félags vélstjóra og
málmtæknimanna.
Lægstu taxtar þjóðarskömm
„Við hjá VM erum aðilar að einum 28
kjarasamningum, stórum og smáum. Um
næstu áramót verða 8 þessara samninga
lausir, þar á meðal almenni samningur-
inn sem nær til flestra okkar félags-
manna. Við erum að ganga frá kröfu-
gerðum þessa dagana og mér sýnist ljóst
að það geti slegið í brýnu áður en yfir
lýkur. Okkar menn á sjó eru langt í frá
ánægðir með sinn hlut og þá er ég m.a.
að tala um að hagsmunasamtök sjó-
manna og félagsmenn okkar fái fullan
aðgang að útreikningi á aflahlut sem á
ávallt að endurspeglast í markaðsverði
að okkar mati. Svo þarf að nást sátt um
mönnunarmálin. Almennt talað er það
verkefni okkar í verkalýðshreyfingunni
að bæta kjör þeirra sem lakast standa
með því að þrýsta á um hækkun dag-
vinnukaupsins og styttingu vinnuvik-
unnar. Það þarf m.a að gera með því að
afnema lægstu taxtana og færa þá nær
markaðslaunum því í dag eru þeir nær
einungis notaðir til að halda niðri laun-
um hjá erlendu launafólki sem þekkir
ekki nægjanlega vel sinn rétt. Það er
þjóðarskömm að slíku framferði.“
Menn snúi bökum saman
Við víkjum talinu að hagsmunabaráttu
sjómanna en Guðmundur Helgi hefur
lengi verið á sjó og einnig virkur í samn-
ingagerð fyrir sína stétt um langt árabil.
„Við höfum ekki verið að ná nægjanlega
góðum árangri, m.a. vegna þess að sam-
stöðuna hefur tilfinnanlega skort meðal
stéttarfélaga sjómanna. Milli þeirra hef-
ur löngum verið núningur sem mótaðilar
við samningaborðið hafa getað nýtt sér.
Fulltrúar sjómanna verða að snúa bök-
um saman við samningagerðina og
sækja fram sem ein heild. Aðeins þannig
náum við tilætluðum árangri fyrir hönd
okkar umbjóðenda. Sjómenn eiga svo
margt sameiginlegt og eiga sérstakra
hagsmuna að gæta sem kemur þeim öll-
um til góða, óháð því hvaða starfi við
gegnum um borð. Við eigum svo margt
annað sameiginlegt heldur en kjölinn
undir skipinu.“
Ríkisvaldið gyrði sig í brók
Guðmundur Helgi segir dapurlegt að
fylgjast með viðbrögðum atvinnurekenda
og stjórnvalda við kröfugerðum nýrrar
forystu verkalýðshreyfingarinnar á liðn-
um vikum. „Auðvitað er þessi harmagrát-
ur atvinnurekenda kunnuglegur en for-
ystumenn stjórnmálanna verða að átta
sig á því að sú ólga sem er á vinnumark-
aði stafar m.a. af því að almenningi of-
býður gríðarlegar launahækkanir þing-
manna og ríkistoppa á liðnum misserum.
Þá hefur ríkisvaldið breytt skatta- og
bótakerfinu á síðustu árum sem hefur
skert ráðstöfunartekjur fólks, þá sér í lagi
þeirra tekjuminni. Þarna nefni ég lækkun
barna- og vaxtabóta og skattalækkanir
sem hafa komið þeim tekjuhærri betur en
þeim tekjuminni. Loforð um að persónuaf-
slátturinn fylgdi verðlagi hafa verið svik-
in og eftirlaunaþegar verið skertir krónu
á móti krónu. Þannig má áfram telja. Í
þessum efnum verða stjórnvöld að gyrða
sig í brók og afnema óréttlætið. Um það
munu komandi kjarasamningar meðal
annars snúast.“
vm.is
46
Guðmundur Helgi Þórarinsson, formaður Félags
vélstjóra og málmtæknimanna. „Ólgan sem er á
vinnumarkaði stafar m.a. af því að almenningi
ofbýður gríðarlegar launahækkanir þingmanna
og ríkistoppa á liðnum misserum.“
Sjávarútvegur
á 100 ára afmæli fullveldis Íslands